Read Kahua TOMAHA NINUNI 3 Bible Online

TOMAHA NINUNI 3 - Kahua bible

TOMAHA NINUNI 3

¹Na ahemata iaterua o Aroni mo Moise igê na matena na Araha i tamasi tanga o Moise igê na hungana i Sinai kani igê.

²O Aroni ki aparara o karena ge he: o Nataba na bêbê ni kare iana, o Abihu, o Eleasare mo Itamare.

⁴Ma o Nataba mo Abihu karu me, matena garu tagarenia na gi pe apuna tanga na Araha igê na bagamasusu raha i Sinai. Ngairerua karu pe apara kare. Tahema o Eleasare mo Itamare karu hita râ, hanana garu mane ni vogasiha igê na matena i tahitahi mênga igê o Aroni.

⁵Na Araha ki vi tanga o Moise, ki vi:

⁶Gu merarâ me na raraha iana o Levi ma ko kasira ka tamanira o Aroni mo karena na mane ni vogasiha.

⁷Ngaira ka tagara nga igê na ruma na gahu apuna iaku urusira na mane ni vogasiha ma na Isiraelita hato.

⁸Ngaira ka bâbâsurigi nga na ara ni marâ hato tanga na hagarahenga igê na ruma na gahu apuna ma ka katogi na tagaraha iata urusira na Isiraelita.

⁹Ngaira ka tamanira o Aroni mo karena.

¹⁰Gu kasira nga o Aroni mo karena ka mane ni vogasiha. Na ani getera râ ga tagara mangara na mane ni vogasiha ka nahuira ka meme.”

¹¹Na Araha ki tamasi tanga o Moise, ki vi:

¹²“Na raraha iana o Levi ka na aniku. Matena gê nahuira ka me na ara ni bêbê ni kare iata na ai ni Esipito, inê kê hagapunarira tangê inê mareku: na ara ni kare mane hagenago surigi na ara ni ahemata iata na Isiraelita ma na kareta hagâkani na togoha iata. Hoi, inê kê urusira na kare mane hagenago iata na Isiraelita renira na raraha iana o Levi, hanana ga voravora re na aniku. Inê kê nahunira na raraha iana o Levi. Ngaira ka na aniku. Inê nga ka na Araha.”

¹³

¹⁴I ngekana igê na bagamasusu raha i Sinai na Araha ki bonasia igê o Moise,

¹⁵hanana i segera so na raraha iana o Levi surigi na hagosi ninuni ma na ahemata iata, ga tonga na hageha gi tage iata se i teha râ.

¹⁶O Moise ki kato vikana.

¹⁷O Levi ki aparara o karena gi oru: o Geresone, o Kehata ma o Merari. Ngaira ka na êvarita na hagosi ninuni iata ga tora na atata. O Geresone ki apararerua o karena gi rua: o Libini mo Simi. O Kehata ki aparara o karena ge he: o Amarama, o Isihare, o Geberoni mo Usiele. O Merari ki apararerua o karena girua: o Magili mo Musi. Ngaira ka na êvarita na hagosi ninuni iata, ga tora na atata. Ngaira hato ka na raraha iana o Levi.

¹⁸

¹⁹

²⁰

²¹Na varo ninuni iana o Geresone ka na hagosi ninuni iaterua o Libini mo Simi.

²²Ngaira hato na mane igê ga tonga na hageha gi tage iata se i teha râ ka vora na 7,500.

²³Na hagosi ninuni ngegana ka tênga nga bêso i murina na ruma na gahu apuna

²⁴i ruguhana o Eliasapa karena o Laele na bêta.

²⁵Na tagaraha iata ngaira ka bâsurigi na ruma na gahu apuna henirerua na bubuhina ma na gerina ma henia na gahu i kuku i maana,

²⁶ngaigi na gahu ni mahera, i rihirerua na ruma na gahu apuna ma na bea ni vogasiha ma na gahu i kuku i maana na mahera ma na varo tangagi na marâ ngegana.

²⁷Na varo ninuni iana o Kehata ka na hagosi ninuni iata o Amarama, o Isakare, o Geberoni ma o Usiele.

²⁸Ngaira hato na mane ngegê ga tonga na hageha gi tage se i teha râ ka vora na 8,600.

²⁹Na hagosi ninuni ngegana ka tênga nga bêrâ i otona na varo ninuni iana o Geresone.

³⁰Na bêta ka no Elisapane karena o Usiele.

³¹Na tagaraha iata ngaira ka bâsurigi na bokesi na suruheri, na bea tangagi na bereti, na atohana na laiti, ngaigi na bea ni vogasiha, na marâ apuna na mane ni vogasiha ga tagara igê i rarona na kiboru apuna ma na gahu i kuku i maana na kiboru apuna teha ngavê henigi na varo ma na kavikavi tanga.

³²Na bêta na raraha iana o Levi ka no Eleasare karena o Aroni na mane ni vogasiha. Ngaia ki bâsurira na ani ga tagara igê na kiboru apuna.

³³Na varo ninuni iana o Merari ka na hagosi ninuni iaterua o Magili mo Musi.

³⁴Ngaira hato na mane ngegê ga tonga na hageha gi tage iata se i teha râ, ka vora na 6,200.

³⁵Na hagosi ninuni ngegana ka tênga nga i utumigana na ruma na gahu apuna ga tênga igê na varo ninuni iana o Kehata. Na bêta ka no Suriele karena o Abigaile.

³⁶Na tagaraha iata ngaira ka bâsurigi na apê na apinige na ruma na gahu apuna, na bênivoro, na u henigi na kiru ma na marâ getigi tangagi.

³⁷Ngaira ka bâsurigi nikâ na marâ rihia na mahera: na u henigi na kiru tangagi, na rapurapu ma na varo.

³⁸O Moise mo Aroni mo karena o Aroni ka tênga nga bêkê i maana na ruma na gahu apuna. Na tagaraha iata ka tagara i rarona na kiboru apuna urusira na Isiraelita. Manga vi na enoni getea ma ki katokato vikana, ka nahuia nga ki meme.

³⁹Ngaira hato na mane na raraha iana o Levi ga tonga na hageha gi tage iata se i teha râ ma o Moise ki tomanira ma ki segera suria na bonasiha iana na Araha tanga, ka vora na 22,000.

⁴⁰Na Araha ki tamasi tanga o Moise, ki vi: “Na ara ni bêbê ni kare mane hato iata na Isiraelita ka na aniku. Vikana gu segegi so na atata na ara ni bêbê ni kare mane iata na Isiraelita, ga tonga na hageha gi tage iata se i teha râ. Inê kê urusira renira na raraha hato iana o Levi. Ngaira ka na aniku. Inê nga ka na Araha. Nikâ na togoha iata ka na aniku urusira na kareta hagâkani na togoha iata na Isiraelita.”

⁴¹

⁴²O Moise ki kato vikana ma ki segera so na ara ni bêbê ni kare mane hato,

⁴³ga tonga na hageha gi tage iata se i teha râ. Ngaira hato ka vora na 22,273.

⁴⁴Na Araha ki vi tanga o Moise, ki vi:

⁴⁵“Hoi, gu hagapunarira na raraha iana o Levi ke vora na aniku urusira na ara ni bêbê ni kare mane hato iata na Isiraelita ma ku hagapunarira nikâ na togoha iata na raraha iana o Levi urusira na kareta hagâkani na togoha iata na Isiraelita.

⁴⁶Suria na bêbê ni kare mane iata na Isiraelita ka teharira na raraha iana o Levi renira na 273, gu vurira aporo na bêbê ni kare mane ga hita râ.

⁴⁷Na ara ni hitangita ko vuria nga renigi na maana gi rima na siliva suria na ramata,

⁴⁸ma na haga ko vatera o Aroni mo karena.”

⁴⁹O Moise ki kato vikana ma ki tagarenigi

⁵⁰na 1,365 na maani na siliva

⁵¹tangara o Aroni mo karena.