Read Kahua TOMAHA NINUNI 30 Bible Online

TOMAHA NINUNI 30 - Kahua bible

TOMAHA NINUNI 30

¹O Moise ki vatera na bêni na varo ninuni iata na Isiraelita renigi na ramata igê.

²Manga vi na mane ma ki surusuru vi tagarenia na votovoto tanga na Araha se i tohetohe vi naka vê ta na marâ, hoi, siana ki aharêngia na suruha se na tohenga iana, ma ki katogi nga hete na ara ni marâ i suru se i tohe renigi.

³Manga vi na kere gete haoru, i gâga mênga i ruma iana o vaemana, ma ki suru vi vatea ta na marâ tanga na Araha se i tohetohe vi naka vê ta na marâ,

⁴hoi, ngaia ki hagamonaria nga na suruha se na tohenga iana, manga vi o vaemana ma ki pe usisitenia na tarana ngekana, matena i rongoa.

⁵Ma ki manga o vaemana ma ki manimania, vi siana ki hagamonaria na suruha se na tohenga iana ka karena, matena i rongoa, hoi, ngaia ka karena ki araria ma i naka vê. Na Araha ki bonotenia, suria o vaemana ki manimania, vi siana ki hagamonaria.

⁶Manga vi na kare viru ma ki surusuru, henaka vi takusia gatagata se i ata ni surusuru râ ma, se i tohetohe, vi naka vê ta na marâ, ma hemuri ki kahu auragi,

⁷hoi, ngaia ki katogi nga na ara ni marâ i suru se i tohe renigi, manga vi o vaniana ma ki pe usisitenia na tarana ngekana, matena i rongoa.

⁸Ma ki manga o vaniana ma ki manimania vi siana ki hagamonaria na suruha se na tohenga iana kaniana, matena i rongoa, hoi, kaniana ki araria ma i naka vê. Na Araha ki bonotenia.

⁹Na gete na nâ se na gete o vaniana i kasia, ki tuguhia ki hagamonaria tare nga na suruha se na tohenga iana.

¹⁰Manga vi na gete êragi ma ki surusuru se i tohetohe, vi naka vê ta marâ,

¹¹hoi, ngaia ki hagamonaria nga na suruha se na tohenga iana, manga vi o vaniana ma ki pe usisitenia na tarana ngekana, matena i rongoa.

¹²Ma ki manga o vaniana ma ki manimania vi siana kaniana ki hagamonaria na suruha se na tohenga iana, hoi, ngaia kaniana ki araria ma i naka ma vê. Na Araha ki bonotenia, suria o vaniana ki manimania vi siana kaniana ki hagamonaria na suruha se na tohenga iana.

¹³O vaniana ki oto tanga vi hagagatagatania se i taruhi kasia na suruha se na tohenga iana kaniana.

¹⁴Manga vi o vaniana ma ki pe manimania i rarona na tangiana gi tage i murina i bani rongoa, hoi, kaniana ki hagamonaria nga na suruha se na tohenga iana. O vaniana ki hagagatagatania na suruha se na tohenga iana kaniana, suria ngaia ki pe manimania i rarona na tangiana gi tage i murina i bani rongoa.

¹⁵Manga vi o vaniana ma ki taruhi kasia na suruha se na tohenga iana kaniana i ta na matena i hemuri, ngaia o vaniana ki hagaratena marena, suria i manimania kaniana, vi siana ki hagamonaria na suruha se na tohenga iana.

¹⁶Ngaigi nga ka na ramata na Araha i vatea o Moise renigi tangagi na suruha se na tohenga iana na kare viru i gâga mênga i ruma iana o vaemana se na gete êragi.