Read Kahua TOMAHA NINUNI 31 Bible Online

TOMAHA NINUNI 31 - Kahua bible

TOMAHA NINUNI 31

²“Gu hagaitangira na ai ni Mitiani marabarura na Isiraelita. I murina ngekana igo ko page meme.”

³Ngekana o Moise ki vi tangara na Isiraelita, ki vi: “Mu hagananê tanga na hearihatana, hanana mu girara mu teharira na ai ni Mitiani ma kamu hagaitangira marabarugia igia na kariana na Araha.

⁴Na ara ni varo ninuni hehegitigi iami ki hagatorangenira nga na rehagaro gi tage na mane ni me tanga na hearihatana.”

⁵Hoita, vikana ngaira ka atera na rehagaro gi tage na mane ni me tenia na ara ni varo ninuni. Ngaira hato ka vora na 12,000 na mane ni me, ga nanêa na hearihatana.

⁶O Moise ki atea o Pinegasi karena o Eleasare na mane ni vogasiha, ki bêngenira tanga na hearihatana. O Pinegasi ki migirâ na marâ apuna ma na ahuri ni hagagiraraha.

⁷Ngaira ka taharira na ai ni Mitiani suria na bonasiha iana na Araha tanga o Moise. Ngaira ka mutera hato na mane

⁸henira na maneraha gi rima i Mitiani: o Evi, o Rekeme, o Sure, o Gure ma o Reba. Ngaira ka nahuia ki me nikâ o Bileama karena o Beore.

⁹Na Isiraelita ka henahuraura na gete ni Mitiani henira na kareta, na puruka iata, na togoha ni sipi ma ni goti iata ma ka rurugugi na nahuninga hato iata.

¹⁰Ngaira ka hagamakakagi na hinua ma na tênga iata na merongata.

¹¹Ngaira ka migiaporo na nahuninga hato ga rurugugi henira na enoni hato ma na togoha ga henahuraura,

¹²tangara o Moise mo Eleasare ma na Isiraelita, ga oga vê igê na tênga igê na bena i Moaba i na akerena na ve i Jotano i avorana tarê i Jeriko.

¹³O Moise, o Eleasare ma na meraha getera iata na Isiraelita ka hura tenia na tênga ma ka râ vurusira na mane ni me iata.

¹⁴O Moise ki mangariaga tangara na mane ga bêngenira na mane ni me, ga aporo me tenia na hearihatana.

¹⁵Ngaia ki hagatera, ki vi: “Tanu hega kanimu pe nahuira ke me na gete hato?

¹⁶Ngaira nga ka na gete ga râ surigi na tamasinga iana o Bileama ma ka katora na tamaka ka pe toto suria na Araha ma ka vogasia ma o Bala na Ataro i Peore. Suria na tarana ngekana tahema na ringa ki tarahugia igia na kariana na Araha.

¹⁷Hoita, mu nahuira nga ka meme na kare mane hato ma na gete hato ga bani meramêru na mane,

¹⁸ma siana kamu mutera na kere gete hato ma na gete hato ga mamêngara vige meramêru rârâ na mane ma kamu nahunira hete.

¹⁹Hoi, na ara ni hitangimi i nahuia ki meme na enoni se i hataria na gahuana, mu gâga tarege râ nga tenia na tênga surigi na tangiani gi pi. Igê na oruta ma na pita na tangiani mu hagamatarotarogamu maremi henira na gete mu henahuraura.

²⁰Mu hagamatarotarogi nga na gahu iami ma na ara ni marâ ga tagarahigi renigi na gavota na puruka, na varehuta na goti se na apinige.”

²¹O Eleasare na mane ni vogasiha ki vi tangara na mane ni me ga bani aporo me tenia na hearihatana, ki vi: “Na ramata nga na Araha i bani vatea o Moise renigi kani igê.

²²Na ara ni marâ hato i asa vige tete, na golo, na siliva, na kapa higa, na aiani, na kapa se na poro, mu hagamatarotarogi igê na gi. Na ara ni marâ getigi mu tananigi hanana ga matarotaro.

²³

²⁴Igê na pita na tangiana mu tananigi nga igê na gahu iami ma hemuri kamu kahu matarotaro aporo ma ki kahu ararigamu vigamu aporo banu igê na tênga.”

²⁵Na Araha ki vi tanga o Moise, ki vi:

²⁶“Igo henira o Eleasare ma na meraha getera i berarogata na enoni, ko tomanigi nga na ara ni marâ hato ga bani henahuraugi henira na enoni ma na togoha ga henahuraura.

²⁷Gu voasigi na marâ hato ngegana henira na enoni ma na togoha, ga henahuraura, ki voravora gi rua ma karu hetagenani: tani tangara na mane ni me ma tani tangara na enoni getera.

²⁸Tenia na apaneta na mane ni me ko tavoa hura nga na ani gi tage tenia na ara ni 500 na enoni, na puruka, na tonki ma na goti ga henahuraura. Ngaira ka na votovoto tangê inê na Araha.

²⁹Go vatea nga re o Eleasare na mane ni vogasiha, hanana i tagarenira tangê inê na Araha.

³⁰Tenia na apaneta na enoni getera ko tavoa hura nga na ani gi tage tenia na ara ni 50 na enoni, na puruka, na tonki, na sipi ma na goti ma ko vatera re na raraha iana o Levi ga bâbâsuria na ruma na gahu apuna iaku.”

³¹O Moise mo Eleasare karu râ suria na bonasiha iana na Araha.

³²Ngaigi haku na apaneta na enoni ma na apaneta na mane ni me kani igê: 675,000 na sipi ma na goti, na 72,000 na puruka, na 61,000 na tonki ma na 32,000 na kere gete ga pe meramêru rârâ na mane.

³³

³⁴

³⁵

³⁶Na apaneta na mane ni me tenira ngaira hato ngegana ki manga ikê: na 337,500 na sipi ma na goti ma ka tavora hura na 675 tanga na Araha; na 36,000 na puruka ma ka tavora hura na 72 tanga na Araha; na 30,500 na tonki ma ka tavora hura na 61 tanga na Araha; na 16,000 na kere gete ga pe meramêru rârâ na mane ma ka tavora hura na 32 tanga na Araha.

³⁷

³⁸

³⁹

⁴⁰

⁴¹Hoi, o Moise ki vatea re o Eleasare na ani hato ga tavora hura ngegana, hanana i tagarenira tanga na Araha, manga ngaia na Araha i bani bonasia vikana.

⁴²Na apaneta na enoni ki tagenana ma henia na anita na mane ni me: na 337,500 na sipi ma na goti; na 36,000 na puruka; na 30,500 na tonki; na 16,000 na kere gete ga pe meramêru rârâ na mane.

⁴³

⁴⁴

⁴⁵

⁴⁶

⁴⁷O Moise ki tavoa hura na ani gi tage tenia na ara ni 50 na kere gete ma na togoha. Ngaia ki vatera re na raraha iana o Levi ga bâbâsuria na ruma na gahu apuna iana na Araha.

⁴⁸Hemuri na mane ga bêngenira na mane ni me,

⁴⁹ka râ ka hagarongoa o Moise, ka vi: “Igami kami tomanira na mane ni me i ruguhamami ma kami pe bâ tihia rârâ tani.

⁵⁰Tahema igami kami migirâ me na mahe na golo, na ara ni hitangimami i henahuraugi: na rago, na bangobango ni rima, na ringi ni kakê, na mumu ni karinga ma na konokono. Igami kami tagarenigi tanga na Araha meni na mêrihamami, hanana ngaia ki ama ni anumasigami nga.”

⁵¹O Moise ma o Eleasare karu aganarigi na mahe na golo hato ngegana.

⁵²Na higahigani na mahe na golo hato ngegana, na mane ga bêngenira na mane ni me, ga tagarenigi, ki vora na 200 kilo.

⁵³Na mane ni me râ ma ka nahunigi hato so mareta na ara ni marâ ga henahuraugi.

⁵⁴Hoi, o Moise mo Eleasare karu torea râ na golo ngekana tanga na ruma na gahu apuna, hanana na Araha ki ama ni anumasira nga na Isiraelita.