Read Kahua TOMAHA NINUNI 33 Bible Online

TOMAHA NINUNI 33 - Kahua bible

TOMAHA NINUNI 33

¹Na varo ninuni iata hehegitigi na Isiraelita ka hura tenia i Esipito i ruguhaterua o Moise ma o Aroni. Ngaira ka tênga sugasuga. Na atani na agua ga tênga surigi kani igê,

²suria na Araha ki bani bonasia o Moise ki sege harisuria na râha iata.

³Na Isiraelita ka hura tenia i Esipito igê na tangahuruta matare rima na tangiana igê na hageha hagenago na harisi. Ngaia ka na tangiana i murina na paseka hagenago. Matena na Araha ki anumasira, ngaira ka pania na hinua raha i Ramesese i maata na ai ni Esipito,

⁴ga nakagi na gahuata na bêbê ni kare mane iata, na Araha i nahuira ka me. Ngekana na Araha ki hagabângenia, vi ngaia ki raramohaga teharira na ataro i Esipito.

⁵Na Isiraelita ka pania i Ramesese ka rârâ ma ka tênga i Sukote.

⁶Na ruata na tênga iata kani i Etama i na akerena na bagamasusu raha.

⁷Ngaira ka râ tenia i ngekana tanga i Pi Hagirote i na apanena bêkê i Bala Sepone ma ka tênga hagarangia i Migitole.

⁸Ngaira ka pania i Pi Hagirote ma ka tarêhia na Asi Memera ma ka banu i Sure, na bagamasusu raha. Ngaira ka râ surigi na tangiani gi oru ma ka kahu tênga i Mara.

⁹Ngaira ka râ tenia i ngekana tanga i Elimi. Ngaira ka tênga i ngekana, suria ga oga igê na ve banga tangahuru matarerua ma na ni tangahuru gi pi.

¹⁰Ngaira ka pania i Elimi ma ka tênga hagarangia na Asi Memera bêkê.

¹¹Hemuri ngaira ka banu i Sini na bagamasusu raha.

¹²Ngaira ka tênga hagenago i Topoka,

¹³ma hemuri i Alusi.

¹⁴I murina ngekana ngaira ka tênga i Repitimi ma i ngekana ki mareha igê na ve tangara hanana vige totono.

¹⁵I berogaterua i Repitimi me Hungana i Hore ngaira ka tênga gogogo igê na bagamasusu raha i Sinai surigi na agua igê: i Kibirote Hatava, i Gaserote, i Ritima, i Rimone Peresi, i Libina, i Risa, i Kehelata, i hungana i Sepere, i Garata, i Makelote, i Tagata, i Teraga, i Mitika, i Gasamona, i Moserote, i Bene Jakana, i Gore, i Jotabata, i Abarona, i Esionegebere, i Katesi igê na bagamasusu raha i Sini, ma i hungana i Hore igê na pereperegana i Etome.

³⁸I ngekana na Araha ki bonasia igê o Aroni na mane ni vogasiha, hanana ki tagere igê na hungana i Hore. O Aroni ki me i ngekana igê na tangiana hagenago igê na ruata na hageha igê na tangahuruta ge he na harisi i murita na Isiraelita ga hura tenia i Esipito. Ngaia ki me matena i tonga na 123 na harisi iana.

⁴⁰Na maneraha i Arata i Kanani bêra tanga i Esipito ki rongoa, vi na Isiraelita ka arâ me.

⁴¹I berogaterua na hungana i Hore ma na bena i Moaba na Isiraelita ka tênga gogogo surigi na agua igê: i Salamona, i Punone, i Obote, i Abarimi na hinua aruhuruhu i Moaba, i Tibone Gata, i Alamone Tibilataimi, i hungana i Abarimi hagarangia na hungana i Nebo ma igê na bena i Moaba i akerena na ve i Jotano i avorana tarê i Jeriko, i berogaterua i Bete Haiesimote me Abele Hasitimi.

⁵⁰I ngekana igê na bena i Moaba i na akerena na ve i Jotano i avorana tarê i Jeriko na Araha ki vatea o Moise,

⁵¹renigi na ramata igê tangara na Isiraelita, ki vi: “Matena mu tarêhia na ve i Jotano ma kamu bêbanu i Kanani,

⁵²mu tarigenira hura nga na enoni hato ga oga i ngekana. Mu menamenarigi nga na nunuta hato na ataro, henakagi vi na hê se vi na aiani, ma kamu ruhuruhugi na agua ni vogasiha ni ataro iata.

⁵³Mu parênia nga na mako iata ma kamu ogasia, suria inê kê haganahunigamu renia.

⁵⁴Mu voasia tarome na mako. Mu ata ni tavoa mavê tagua ma kamu votoa na mako tangara na varo ninuni ma na hagosi ninuni ki ararira hehegitigi manga viga rakorako se pe rakorako.

⁵⁵Manga vi igamu ma kamu pe tarigenira hura na ara ni enoni hatohato ga oga i ngekana, na ani ga hitahita so ka page gâga sutaga tangagamu mangagi na momo i maami se ta na sutana ta na marâ i ugami ma ka page merongasigamu.

⁵⁶Manga i mareha, inê kê page mutegamu igamu, mareha vi ngaira.”