Read Kahua TOMAHA NINUNI 35 Bible Online

TOMAHA NINUNI 35 - Kahua bible

TOMAHA NINUNI 35

¹Igê na bena i Moaba i na akerena na ve i Jotano i avorana tarê i Jeriko na Araha ki vi tanga igê o Moise, ki vi:

²“Gu bonasira na varo ninuni hehegitigi iata na Isiraelita, ke vatera re na raraha iana o Levi tani na hinua, hanana ge oga igê, henigi na bena ni go rihigi na hinua ngegana, tenigi na apaneni iata hegitigi.

³Na hinua ngegana ka na anita nga na raraha iana o Levi, hanana ga gâga igê. Na bena ni go kani tangara na puruka ma na togoha getera iata.

⁴Na bena ni go ka haganega tenigi na para ni hinua igê na apanena ge he ka hura na 500 mita.

⁵Igê na ara ni apanena ge he na hinua ki oga igê na bena ni go: na aberaberagana na ara ni hitangini ki na 500 mita ma na borahusigana ki na 1,000 mita. Na hinua ki gâga i gupu.

⁶Go haganahunira nga na raraha iana o Levi renigi na hinua ge ono, na enoni i girara i rukuruku igê, matena i hagabagararâ me ki nahuia ki meme ta na enoni. Nikâ go haganahunira renigi na 42 na hinua,

⁷henigi na bena ni go. Ngaigi haku hato na hinua ka vora na 48 na hinua.

⁸Gi hita na hinua na ara ni varo ninuni hehegitigi i haganahunira na raraha iana o Levi renigi, ka ararigi nga na apaneni iata, manga viga raharaha se ga sisite.”

⁹Na Araha ki vi tanga o Moise,

¹⁰ki hagarongora na Isiraelita, ki vi: “Matena mu tarêhia na ve i Jotano ma kamu bêbanu i Kanani,

¹¹mu ategi nga na hinua ni rukuha, hanana na enoni ki girara i rukuruku igê, matena i hagabagararâ me ki nahuia ki meme ta na enoni.

¹²Ngaia ki page tahitahi i ngegana tenira na goana na enoni i me ngekana, ga obania viga marabaru. Siana kamu nahuia ki meme na enoni. Mu hinarua vi nahu enoni ma kamu hagatamasia hagenago hete.

¹³Mu ategi na hinua ge ono:

¹⁴gi oru i na apanena bêkê na ve i Jotano ma gi oru i Kanani.

¹⁵Ngaigi ka na hinua ni rukuha tangagamu igamu na Isiraelita ma na mahuara i berarogami. Na anima na enoni i bagararâ me ki nahuia ki meme ta na enoni, ngaia ki girara i rukuruku igê na hitangini.

¹⁶“Manga vi na enoni ma ki nahuia ki meme ta na enoni renia na tangaruha na aiani se na hê se na apinige, ngaia ki nahu enoni suria i bani takusia vikana. Tahema mu nahuia nga ki meme.

¹⁹Na goana i apena na enoni i me ki nahuia nga ki meme na enoni i henahu ngekana. Matena i tarahua, ngaia ki nahuia nga ki meme.

²⁰“Manga vi ta na enoni ki kitenia ta na enoni ma ki purisia i ano se i takea renia ta na marâ,

²¹se i rupugia ki meme, hoi ngaia ki nahu enoni monari, suria i bani takusia vikana. Mu nahuia nga ki meme. Na goana i apena na enoni i me ngekana ki nahuia nga ki meme. Matena i tarahua ngaia ki nahuia nga ki meme.

²²“Takusia na enoni i pe kitenia rârâ ta na enoni ma ki bagarararâ me ki nahuia ki me, suria i purisia i ano se i takea renia ta na marâ,

²³se i takusia na enoni i arihatenia purupuru na hê ma na hê ki takea ta na enoni ki meme, ma ngaia ki pe bani tako vikana, suria na enoni i me ngekana ki mareha vi na merongana.

²⁴Hoi, igê na taraterua ngegana na mane ni hagatamasinga iami ka panepane nga henia na enoni, i bagarararâ me ki nahuia ki me ta na enoni ngekana, mareha vi henira na goana na enoni i me ngekana ga obania viga marabaru.

²⁵Igamu ki tuguhigamu, vigamu hagatahia na enoni ngekana tenira na goana na enoni i me ngekana ma kamu kasia aporo i hinua ni rukuha, i bani gava tanga. Ngaia ki gâga nga i ngekana, mataro me ki meme na mane ni vogasiha i teha igê na matena ngekana.

²⁶Manga na enoni i nahu enoni vikana ma ki pania na hinua ni rukuha i bani gava tanga,

²⁷ma na goana na enoni i me ngekana ka tarahua ma ka nahuia ki me, ngaira ka marabaru ma, mareha vige nahu enoni,

²⁸suria na ramata ki vi, vi ngaia ki oga tonge igê na hinua ni rukuha mataro me ki meme na mane ni vogasiha i teha ma ki kahu girara i aporo asitatara i pasina.

²⁹Na ramata ngegana ka tâ nga tangagamu igamu ma na raraha iami, henaka vigamu gâga i he.

³⁰“Na enoni ga hinarua vi nahu enoni, ka nahuia nga ki meme, manga vigaru vererua se teha râ na enoni ga hagatanga monari renia igê na hagatamasinga. Na hagatangamonariha iana na vere tage ki pe arari.

³¹Na enoni i nahunahu enoni ka nahuia nga ki meme. Ngaia ki asa vige vuripusia marena tenia na hagaitangiha ngekana.

³²I tagenana ma henia na enoni i bani rukuruku igê na hinua ni rukuha. Ngaia ki asa vige vuripusia marena, hanana vige aporo i pasina. Ngaia ki gâga nga i ngekana mataro ma ki meme na mane ni vogasiha i teha.

³³Manga mu katokato vikana, igamu kamu hagaerasia i pasimi. Na enoni i nahunahu enoni ki hagaerasia na mako i nahu enoni igê ma ki bara vige hagamatarotaroa aporo na mako ngekana, nga noga ma ga nahuia ki meme na enoni ngekana.

³⁴Siana kamu hagaerasia i pasimi, suria inê nga ka na Araha ma kê oga i berarogami na Isiraelita.”