Read Kahua TOMAHA NINUNI 36 Bible Online

TOMAHA NINUNI 36 - Kahua bible

TOMAHA NINUNI 36

¹Na bêni na ahemata igê na hagosi ninuni iana o Gileata o karena o Makire ma o vesina o Manase o karena o Josepo, ngaira ka râ i pasita o Moise ma na meraha getera.

²Ngaira ka vi vikê tangara, ka vi: “Na Araha ki bonasigamu, vigamu voasia tarome na mako ma kamu ata ni tavotavo mavê tangara na Isiraelita. Ngaia ki bonasigamu nikâ, hanana mu haganahunira ka karena na goamami o Selopegata renia na mako.

³Ma kamu bani girara, vi manga vi ngaira ma ka auragira na mane igê na varo ninuni getea, na mako iata ka na anina na varo ninuni ngekana. Ngekana igami kami page têtara renia na mako ngekana.

⁴Igê na harisi tangahuruta gi rima, matena na ara ni mako hato ga bani hagavuringenigi, ka aporo tangara na bani avanuni, na varo ninuni, ka karena o Selopegata ga êragi râ igê, ka page nahunia hagahu na mako ngekana. Vikana na varo ninuni iamami ki page têtêtara renia na mako ngekana.”

⁵Suria na bonasiha iana na Araha o Moise ki vatera re na Isiraelita renia na ramata ikê. Ngaia ki vi: “Na tamasinga iana na varo ninuni iana o Manase ki monari.

⁶Vikana na Araha ki vi, vi ka karena o Selopegata ka asitatara viga auragira na ani mavê na mane ga obanira, nga noga ma na mane igê na varo ninuni getera.

⁷Vikana na mako iana na ara ni Isiraelita na varo ninuni iana ki nahunia hagahu nga.

⁸Na ara ni gete i nahuni suria na varo ninuni iana renia na mako, ngaia ki auragia nga na mane na varo ninuni iana marena. Vikana na ara ni Isiraelita ki page nahuni suria na êvarina marena renia na mako.

⁹Vikana na mako ki bara vige tarê igê na varo ninuni getea. Na ara ni varo ninuni ki nahunia hagahu nga na mako iana marena.”

¹⁰Hoita, ka karena o Selopegata ka Magala, ka Tirisa, ka Gogola, ka Milika ma ka Noa ka râ suria na bonasiha iana na Araha tanga o Moise ma ka êragira na goata tonge.

¹²Ngaira ka auragi igê na hagosi ninuni igê na varo ninuni iana o Manase karena o Josepo ma na varo ninuni iana o vaemata ki nahunia hagahu na mako iata.

¹³Nga na ramata ma na bonasiha na Araha i vatera re na Isiraelita i harana o Moise igê na bena i Moaba i na akerena na ve i Jotano i avorana tarê i Jeriko kani ngegana.