Read Kahua TOMAHA NINUNI 4 Bible Online

TOMAHA NINUNI 4 - Kahua bible

TOMAHA NINUNI 4

¹Na Araha ki bonasia o Moise,

²ki tomanira na raraha iana o Levi tenia na varo ninuni iana o Kehata surigi na hagosi ninuni ma na ahemata iata,

³ma ki segera so na mane hato ga tonga na harisi tangahuru gi oru iata ki tariha igê na tangahuru gi rima na harisi ma ka arari ni tagaraha i ruma na gahu apuna iana na Araha.

⁴Na tagaraha iata ngaira ka bâsurigi na marâ apuna ngavê.

⁵Na Araha ki vatea o Moise renigi na ramata igê. Igê na matena ga raragea igê na tênga, o Aroni mo karena ka bêbanu nga i rarona na ruma na gahu apuna, ka tavoa râ na gahu i kuku i maana na bokesi na suruheri ma ka buhia renia.

⁶Ngaira ka buhia nga renia na bubuhina bâkoro na gavona na puruka, ka gasia na gahu maravarava igê ma ka suvarenirerua na apinige ni tugiha igê na kakavina.

⁷Ngaira ka vatarangenia nga na gahu maravarava igê na bea ni bereti iana na Araha ma ka nakagi igê na apira, na apira ga sungigi igê na marâ i sigini koro, na kâkâ ga vogasi igê ma na pi tanga na vogasiha ni vaini. Na bereti ka ama ni tâtâ nga tare igê na bea.

⁸Ngaira ka vatarangenia nga na gahu memera igê ma ka buhigi renia na bubuhina na gavona bâkoro na puruka ma ka suvarenirerua na apinige ni tugiha igê na kakavina.

⁹Ngaira ka buhigi nga na atohana na laiti henigi na laiti igê, na eahi, na apira ni gi ma na pi hato ni oile ni olive.

¹⁰Ngaira ka baraigi na marâ hato ngegana renia na gavona bâkoro na puruka ma ka naka igê na bea ni tugiha.

¹¹Hemuri ngaira ka vatarangenia na gahu memera igê na bea na golo ga vogasi igê, ka buhia renia na bubuhina bâkoro na gavona na puruka ma ka suvarenirerua na apinige ni tugiha igê na kakavina.

¹²Ngaira ka baraigi na marâ apuna tanga na hagarahenga i rarona na kiboru apuna renia na gahu maravarava, ka buhigi renia na gavona bâkoro na puruka ma ka nakagi igê na bea ni tugiha.

¹³Ngaira ka raguigi râ na rahu monamonaga tenia na bea ni vogasiha ma ka vatarangenia na gahu rotorotoaga memera igê.

¹⁴Ngaira ka nakagi nga igê na marâ hato tanga: na apira ni gi, na eahi, na maevo ma na apira. Hemuri ngaira ka buhigi nga renia na gavona bâkoro na puruka ma ka suvarenirerua na apinige ni tugiha igê na kakavina.

¹⁵Igê na matena ga raragea na tênga, na varo ninuni iana o Kehata ki arâ me nga, hanana ga tugigi na marâ apuna ngegana i murina ma o Aroni mo karena ka buhigi hato na marâ hato ngegana. Na varo ninuni iana o Kehata ki apu tangara, vige hatarigi na marâ apuna ngegana, i era ma ka meme. Ngaigi nga ka na tagaraha iata na varo ninuni iana o Kehata i na ara ni mateni ga raragea igê na ruma na gahu apuna.

¹⁶Na tagaraha iana o Eleasare karena o Aroni na mane ni vogasiha, ngaia ki bâbâsurigi nga na ruma na gahu apuna hagenani, na oile tangagi na laita, na marâ i sigini koro ni sungiha, na palaua ni vogasiha, na oile ni moneha ma na ara ni marâ getigi igê na ruma na gahu apuna ga bani hagapunarigi tanga na Araha.

¹⁷Na Araha ki vi tangarerua o Moise mo Aroni, ki vi:

¹⁸“Muru bâsira na varo ninuni iana o Kehata,

¹⁹siana ka hatarigi na marâ apuna ngegana, i era ma ka meme. Hanana vi siana ki akê me na tarana ngekana, o Aroni mo karena ka bêbanu nga igê na ruma na gahu apuna ma ka votogi na tagaraha tangara na ara ni hitangita na mane ma na ta ka na tagaraha iana.

²⁰Manga vi na hitangita na varo ninuni iana o Kehata ma ki bêbanu igê na ruma na gahu apuna ki bâsira na mane ni vogasiha ga hagarurugu renigi na marâ apuna, ngaira ka page meme râ nga.”

²¹Na Araha ki bonasia o Moise,

²²ki tomanira na raraha iana o Levi tenia na varo ninuni iana o Geresone surigi na hagosi ninuni ma na ahemata iata

²³ma ki segera so na mane hato ga tonga na harisi tangahuru gi oru iata ki râ ki tariha igê na tangahuru gi rima na harisi ma ka arari ni tagaraha igê na ruma na gahu apuna iana na Araha.

²⁴Na tagaraha iata ngaira ka toregi nga na marâ igê:

²⁵na ruma na gahu apuna henirerua na bubuhina ma na gerina henia na bubuhina na gavona bâkoro na puruka igê na gerina, na gahu i kuku i maana,

²⁶ngaigi na gahu henigi na varo tanga na mahera rihirerua na ruma na gahu apuna ma na bea ni vogasiha, ngaigi na gahu ga kuku i maana na mahera henigi na ara ni marâ tanga ga hagêrasigi renigi. Ngaigi nga ka na tagaraha iata.

²⁷O Moise mo Aroni karu bâsurira nga na varo ninuni iana o Geresone ka katogi maninga na tagaraha iata ma na toraha iata, garu votogi tangara.

²⁸Ngaigi nga ka na tagaraha iata na varo ninuni iana o Geresone igê na ruma na gahu apuna ma ka katogi nga maninga i ruguhana o Itamare karena o Aroni na mane ni vogasiha.

²⁹Na Araha ki bonasia o Moise ki tomanira na raraha iana o Levi tenia na varo ninuni iana o Merari surigi na hagosi ninuni ma na ahemata iata,

³⁰ma ki segera so na mane hato ga tonga na tangahuru gi oru na harisi iata ki tariha igê na tangahuru gi rima na harisi ma ka arari ni tagaraha igê na ruma na gahu apuna iana na Araha.

³¹Na tagaraha iata ngaira ka toregi nga na apinige na apê, na bênivoro, na u henigi na kiru tangagi tanga na ruma na gahu apuna,

³²ma na u henigi na kiru tangagi, na rapurapu ma na varo tanga na mahera rihia na ruma na gahu apuna henigi na marâ hato tanga ga hagêrasigi renigi. Na ara ni mane ki toregi ma na marâ ga tâ tanga vi toregi.

³³Ngaigi nga ka na tagaraha iata na varo ninuni iana o Merari. Ngaira ka katogi nga i ruguhana o Itamare karena o Aroni na mane ni vogasiha.

³⁴Suria na bonasiha iana na Araha o Moise mo Aroni ma na bêni na hakuta ninuni, ngaira ka tomanira na raraha iana o Levi tenigi na varo ninuni iata o Kehata, o Geresone ma o Merari surigi na hagosi ninuni ma na ahemata iata. Ngaira ka segera so na mane hato, ga tonga na harisi tangahuru gi oru iata ki tariha igê na harisi tangahuru gi rima ma ka arari ni tagaraha igê na ruma na gahu apuna iana na Araha. Ngaira kani igê: [-tenia na varo ninuni iana o Kehata] — 2, 750 [-tenia na varo ninuni iana o Geresone] — 2, 630 [-tenia na varo ninuni iana o Merari] — 3, 200 [Ngaira hato ka vora na] — 8, 580

⁴⁹Na ara ni mane hato ka segea so suria na bonasiha iana na Araha tanga o Moise ma ki nahunigi na tagaraha ma na toraha iana marena, o Moise i vutungira hehegitigi renigi.