Read Kahua TOMAHA NINUNI 5 Bible Online

TOMAHA NINUNI 5 - Kahua bible

TOMAHA NINUNI 5

¹Na Araha ki vi tanga ko Moise, ki vi:

²“Gu bonasira na Isiraelita ke kasira hura tenia na tênga na ara ni enoni ga nahunia na mera era ni gavona apeta, se na agua i nanaga, se i pe matarotaro suria i hataria na gahuana na marâ i meme.

³Kasira hura nga na enoni ga pe matarotaro ngegana, i era ma ka hagaerasia na tênga iata na kariaku gê oga i berarogata.”

⁴Na Isiraelita ka tê viteana ma ka kasira hura na enoni hato ngegana tenia na tênga.

⁵Na Araha ki vatea o Moise

⁶renigi na ramata igê tangara na Isiraelita. “Manga na enoni ma ki haritoheê ma ki katoa na tarana i pe oto tanga ta na enoni,

⁷hoi, ngaia ki rangania nga na tasi iana ma ki tavoa na haga i araria na marâ i hagaerasia henigi kê nikâ tani na haga ma ki vatea re na enoni ngaia i erasia.

⁸Ma ki manga i bara vige vatea na haga tanga na enoni ngekana, suria vi bani me ma ki pe nahunia rârâ ta na enoni i apena, ngaia ki tagarenia nga na haga na tarataraniha ngekana tanga na Araha tanga na mane ni vogasiha ki nahunia. Henaka vi na tarataraniha ngekana, ma ngaia ki tagarenia kê nikâ na sipi mane tanga na hagamatarotaroana marena.

⁹Ta na apaneni na votovoto hato na Isiraelita ga tagarenigi tanga na Araha ki na anina na mane ni vogasiha ga tagarenigi tanga.

¹⁰Na ara ni mane ni vogasiha ki nahunigi nga na votovoto ga vatea renigi.”

¹¹Na Araha ki bonasia o Moise, ki vatera na Isiraelita renigi na ramata igê. Vari na mane ki hinarua na gete iana vi pe totosuria ma ki hagaerasia marena suria i memêru na mane getea. Ma o vaniana ki pe girara bâkoro vi monari se mareha, suria vari kaniana ki pinihia ma ki mareha ta na enoni vige bâsia matena i gamogamo. Vari na mane ki hinarua na gete iana vi pe totosuria, henaka ma kaniana ki ama ni totosuria nga.

¹⁵Igê na tarani gi rua ngegana na mane ki mêra nga na gete iana tanga na mane ni vogasiha. Ngaia ki migirâ nga na 2 kilo na palaua. Siana ki karangia na oile ni olive igê se vige naka na marâ i sigini koro ni sungiha igê, suria ki na vogasiha iana na mane i hinaru, hanana i huhura mave na monariha.

¹⁶Na mane ni vogasiha ki unia nga me na gete ki rêra i maana na bea ni vogasiha.

¹⁷Na mane ni vogasiha ki karangia tagua na ve apuna igê na apira na hê, ki raguia tagua na mako i ano i rarona na ruma na gahu apuna iana na Araha ma ki kasia so igê na ve apuna.

¹⁸Hemuri ngaia ki rupasigi nga na varehuna na gete ma ki naka na palaua ni vogasiha i na ababa ni rimana na gete. Ngaia marena ki taua nga na apira na ve mahe ni arangeniha.

¹⁹Manga vi na gete ma ki agana, na mane ni vogasiha ki arangenia nga vikê: “Manga vi igo ma ko pe gamogamo, na arangeniha igê na ve ikê ki asa vige tarahugo.

²⁰Ma ki manga vi igo ma ko gamogamo monari,

²¹na Araha ke katoa na atamu ke oga re na arangeniha i berarogata na enoni, na mamêrimu ke garoro ma na obamu ke boboteraga.

²²Na ve ngekê ke so igê na bahurimu ke boboteraga ma na mamêrimu ke garoro.” Na gete ki arami nga ki vivi: “I koro ma. Na Araha ke kato vikana.”

²³Hemuri na mane ni vogasiha ki segea so nga na arangeniha ngekana ma ki tanania igê na apira na ve mahe.

²⁴I nago tarana i hagatonomia na gete renia na ve i girara i hagamamasiaga ngavê,

²⁵na mane ni vogasiha ki tavoa aporo nga na palaua ni vogasiha tenigi na rimana na gete, ki tagarenia râ, ki hagapunaria tanga na Araha ma ki naka igê na bea ni vogasiha.

²⁶Hemuri ngaia ki raguia na palaua ki vunuvunu na rimana i vi, vi na palaua hagenani ma ki sungia igê na bea ni vogasiha, ma ki kahu hagatonomia na gete renia na ve.

²⁷Manga vi na gete ma ki gamogamo monari, na ve ki page hagamamasiaga ngavê: na bahurina ki page boboteraga ma na mamêrina ki page garoro ma na atana ki page voravora re na arangeniha i berarogata na enoni.

²⁸Manga vi ngaia ma ki pe gamogamo rârâ, na arangeniha ki asa vige tarahua ma ngaia ki girara ma ki apara kare.

²⁹Ngaia nga ka na ramata tanga na matena na mane i heringi ma ki hinarua na gete iana vi gamogamo. Na mane ni vogasiha ki katoa na gete ki rêra nga i maana na bea ni vogasiha ma ki arâ suria nga na ramata ngekana.

³¹O vaniana ki asitatara ma kaniana ki hagaratena marena, manga vi i gamogamo monari.