Read Kahua TOMAHA NINUNI 6 Bible Online

TOMAHA NINUNI 6 - Kahua bible

TOMAHA NINUNI 6

¹Na Araha ki bonasia o Moise,

²ki vatera na Isiraelita renigi na ramata igê. Manga vi na mane se na gete ma ki surusuru vi hagapunaria marena tanga na Araha, ngaia ki vora re na nasirita.

³Ngaia ki gâga râ tenigi na vaini ma na marâ vigana. Ngaia ki apu tanga vige totono na ani mavê na tonoha, ga tagarahia renigi na guani na vaini, se vige ngaugi na guani na vaini, henaka viga garaki se mareha.

⁴Suria na matena i nasirita, ki apu tanga vige ngaua na marâ ga tagarahia renigi na guani na vaini, naka ma vi na maani se na gavoni.

⁵Matena ngaia ki oga igê na suruha na nasirita iana, siana ki tapuru bê se vi gorogoro bê huri. Suria na matena hagenani i oga igê na suruha iana ngaia ki na anina na Araha ma ki nakagi vê nga ka gagahi na varehu i bêna ma na taboturina.

⁶Na varehuna ki na girarana vi ngaia ki na anina God. Tahema siana ki arâ me hagarangia na gahuana na enoni, naka ma vi o vaemana, se vi kenana, se vi o veogana se vi keogana, se vi o vesina se vi kesina, i era ma ki pe matarotaro.

⁸Suria na matena hagenani i nasirita, ngaia ki na anina na Araha.

⁹Manga vi na enoni, i ngahisia na mane i nasirita, ma ki gasuga ni me, na varehuna na nasirita ki pe matarotaro. Ngaia ki gâga nga surigi na tangiani gi pi ma ki kahu gorogoro bê huri ma ki gorogoro na taboturina ma ki kahu matarotaro aporo.

¹⁰Igê na varuta na tangiana ngaia ki torererua nga na barisumata gi rua se na gâ gi rua tanga na mane ni vogasiha igê na maana na ruma na gahu apuna iana na Araha.

¹¹Na mane ni vogasiha ki tagarenia tani manga na vogasiha ni bonoteniha ni tasi ma tani manga na vogasiha ni sungiha, hanana i hagamatarotaroa aporo na mane i hataria na gahua. Igê nga na tangiana ngekana na nasirita ki hagapunarigi aporo na varehuna ma

¹²ki surusuru aporo tanga na Araha, ki nasirita suria na matena i borahu manga i bani naka i nago. Na matena i nasirita igê i nago ki hato vê, suria ga pe matarotaro na varehuna. Ngaia ki tagarenia nga na karena sipi mane, i tonga na harisi gi tage iana tanga na vogasiha ni kasi mena.

¹³Matena na nasirita ki hagahatungia hato na suruha iana, ngaia ki arâ suria nga na ramata ikê. Ngaia ki arâ nga tanga na maana na ruma na gahu apuna.

¹⁴Ngaia ki tagarenia nga tanga na Araha na ganiani gi oru, ga apeapekoro ma ka pe baubêga: na karena sipi mane i tongatonga na harisi gi tage iana tanga na vogasiha ni sungiha, na karena sipi hehene i tongatonga na harisi gi tage iana tanga na vogasiha ni bonoteniha ni tasi, ma na sipi mane tanga na vogasiha ni ngêhaku.

¹⁵Ngaia ki tagarenia nikâ na heni na bereti ga pe ahunga: na guani upupuga, ga tagarahigi renia na palaua i hetorariga henia na oile ni olive, ma na guani manihinihi ga taruhigi renia na oile ni olive henigi na votovoto na palaua ma na vaini tanga na vogasiha.

¹⁶Na mane ni vogasiha ki tagarenigi nga na marâ hato ngegana tanga na Araha ma ki katorerua na vogasiha ni bonoteniha ni tasi ma na vogasiha ni sungiha.

¹⁷Ngaia ki vogasia nga na Araha renia na sipi mane manga na vogasiha ni ngêhaku henigi na heni na bereti, na palaua ma na vaini tanga na vogasiha.

¹⁸I maana na ruma na gahu apuna na nasirita ki gorogoro bê huri nga ma ki sungigi na varehuna igê na gi, ga sungia igê na vogasiha ni ngêhaku.

¹⁹Hemuri na mane ni vogasiha ki hagagoboria nga na gaparana na sipi mane ma ki naka i rimana na nasirita henirerua na guani na bereti: tani ki upupuga ma tani ki manihinihi i tavorerua tenia na heni.

²⁰Hemuri na mane ni vogasiha ki tagarenigi tanga na Araha. Ngaigi ka na votovoto apuna tanga na mane ni vogasiha henirerua na matona ma na êgana gi tage na sipi mane, manga i visia na ramata. Hato vikana na mane i hato tenia vi nasirita, ki kahu girara i totono aporo na vaini.

²¹Ngaigi nga ka na ramata tangara na nasirita. Manga vi na nasirita ma ki bani suru vi tagarenigi kê nikâ teharigi na marâ, i visigi na ramata, ngaia ki hagamonaria nga na suruha iana.

²²Na Araha ki hagatora o Moise,

²³ki vi vikê tangara o Aroni ma o karena: “Matena mu nungia God ki korokoro tangara na kariana, mu tamasi vikê:

²⁴Na Araha ke haganahunigamu renia na ramana ma ke marupegamu.

²⁵Na Araha ke komanigamu, ke takuigamu ma ke korokoro tangagamu.

²⁶Na Araha ke mamahata tangagamu ma ke haganahunigamu renia na marapeha.”

²⁷Ma na Araha ki vi: “Manga vi ngaira ma ka nungiê vikana, hanana vigê korokoro tangara na Isiraelita, hoi, inê kê korokoro tangara nga.”