Read Kahua TOMAHA NINUNI 7 Bible Online

TOMAHA NINUNI 7 - Kahua bible

TOMAHA NINUNI 7

¹Igê na tangiana o Moise i hagêrasia hato igê na ruma na gahu apuna iana na Araha, ngaia ki monererua ma ki hagapunarirerua na ruma na gahu apuna henigi na marâ hato tanga ma na bea ni vogasiha henigi na marâ hato tanga.

²Hemuri na bêni na varo ninuni, ga bani tomanira na Isiraelita,

³ka migira me na votovoto iata tanga na Araha: na kati ge ono ma na tangahuru matarerua na puruka na voe mavo: na kati gi tage tenirerua na varo ninuni gi rua ma na puruka na voe mavo gi tage tenia na ara ni varo ninuni. Matena ga migirâ me hato tanga na ruma na gahu apuna,

⁴na Araha ki vi tanga o Moise ki vi:

⁵“Gu aganarigi na votovoto ngegana ma ko vatera na raraha iana o Levi renigi tangagi na tagaraha iata hehegitigi, matena ga raragea igê na ruma na gahu apuna.”

⁶Hoita, o Moise ki vatera na raraha iana o Levi renigi na kati ma na puruka na voe mavo.

⁷Ngaia ki vatera na raraha iana o Geresone renigi na kati gi rua ma na puruka na voe mavo ge he,

⁸ma na raraha iana o Merari ngaia ki vatera renigi na kati ge he ma na puruka na voe mavo ge varu. Ngaira hato ka tagara nga i ruguhana o Itamare karena o Aroni.

⁹Ma o Moise ki pe vatera rârâ na raraha iana o Kehata renigi na kati se vi na puruka na voe mavo, suria ngaira ka tugigi nga na marâ apuna ga bâsurigi.

¹⁰Na bêni na varo ninuni ka migirâ me nikâ na votovoto tanga ga hagarahasia re na hagapunariana na bea ni vogasiha. Matena ga gâgâ i maana na bea ni vogasiha, hanana viga tagarenigi na votovoto iata,

¹¹na Araha ki vi tanga o Moise, ki vi: “Gu vi tangara vi igê na ara ni tangiana surigi na tangiani tangahuru matarerua, na veretage na hitangita ki tagarenigi nga na votovoto iana tanga na hagarahasiana na hagapunariana na bea ni vogasiha.

¹²Ngaira ka tagarenigi vikê na votovoto iata: [-na tangiana hagenago o Nagasone karena] — o Aminataba tenia na varo ninuni iana o Juta [-na ruata na tangiana o Netanele karena] — o Suare tenia na varo ninuni iana o Isakare [-na oruta na tangiana o Eliaba karena] — o Gelone tenia na varo ninuni iana o Sebuluni [-na heta na tangiana o Elisure karena] — o Seteure tenia na varo ninuni iana o Rubeni [-na rimata na tangiana o Selumiele karena] — o Surisatai tenia na varo ninuni iana o Simeone [-na onota na tangiana o Eliasapa karena] — o Teuele tenia na varo ninuni iana o Gata [-na pita na tangiana o Elisama karena] — o Amihuti tenia na varo ninuni iana o Eparaimi [-na varuta na tangiana o Gamaliele karena] — o Petasure tenia na varo ninuni iana o Manase [-na sivata na tangiana o Abitane karena] — o Gitoni tenia na varo ninuni iana o Benamino [-na tangahuruta na tangiana o Agiesere karena] — o Am(...)

⁸⁴Ngaigi hato na votovoto na bêni na varo ninuni tangahuru matarerua ga migirâ me tanga na hagarahasiana na hagapunariana na bea ni vogasiha kani igê: -na 12 na apira raha na siliva ma na 12 na apira sisite na siliva. Na higahigani ngaigi hato ka na 24 kilo -na 12 na apira sisite na golo ga vunu renigi na marâ i sigini koro ni sungiha. Na higahigani ngaigi hato ka teharia na kilo gi tage -Tanga na vogasiha ni sungiha na 12 na puruka mane, na 12 na sipi mane, na 12 na karena sipi mane ga tonga na harisi gi tage iata henigi na palaua -na 12 na goti mane tanga na vogasiha ni bonoteniha ni tasi. -Tanga na vogasiha ni ngêhaku na 24 na puruka mane, na 60 na sipi mane, na 60 na goti mane ma na 60 na karena sipi ga tonga na harisi gi tage iata.

⁸⁹I na ara ni mateni o Moise ki bêbanu igê na ruma na gahu apuna hanana i metamasi na Araha, ngaia ki rongoa na Araha i tamasi i avorana na bubuhina na bokesi na suruheri ma i berarogaterua na angero gi rua.