Read Kahua TOMAHA NINUNI 8 Bible Online

TOMAHA NINUNI 8 - Kahua bible

TOMAHA NINUNI 8

¹Na Araha ki vi tanga o Moise, ki vi:

²“Gu vi tanga o Aroni, vi na matena i nakagi na laiti gi pi igê na atohana na laita, ngaia ki nakagi nga ka mave bê me.”

³O Aroni ki tê viteana ma ki nakagi na laiti ka mato bê me igê na atohana na laiti.

⁴Na atohana hagenani na laiti, na gatana, na arani ma na mahe igê ka na golo manga na Araha i bani hagabâsia o Moise renia.

⁵Na Araha ki vi tanga o Moise, ki vi:

⁶“Gu voasira na raraha iana o Levi tenira na Isiraelita getera ma ko hagamatarotarora vikê.

⁷Go kamusira renia na ve ni hagamatarotaroha ma ko vi tangara ka guruigi na apeta hagenani ma ka tananigi na gahu iata. Vikana ngaira ka kahu matarotaro.

⁸Hemuri ngaira ka merâ me na bêhâgana na puruka mane henia na palaua hetorariga henia na oile ni olive tanga na vogasiha ni palaua. Ma igo ko merâ me nogamu ta na puruka mane tanga na vogasiha ni bonoteniha ni tasi.

⁹Hemuri ko hagahakura me nga na Isiraelita hato ma ko katora na raraha iana o Levi ka rêra i maana na ruma na gahu apuna iaku.

¹⁰Na Isiraelita ka nakagi kê nga na rimata i bêta na raraha iana o Levi,

¹¹ma o Aroni i urusira na Isiraelita ki hagapunarira nga tangê na raraha iana o Levi, hanana ga tagara tangê.

¹²Hemuri na raraha iana o Levi ka nakagi kê nga na rimata i bêterua na puruka mane gi rua: tani ki tanga na vogasiha ni bonoteniha ni tasi ma tani ki tanga na vogasiha ni sungiha. Igo ko hagamatarotarora vikana na raraha iana o Levi.

¹³“Go hagapunarira tangê na raraha iana o Levi ma ko nakara i ruguhata o Aroni mo karena.

¹⁴Go voasira vikana na raraha iana o Levi tenira na Isiraelita getera, hanana ga voravora re na aniku.

¹⁵Matena go hagamatarotarora ma ko hagapunarira hato na raraha iana o Levi, ngaira ki kahu ararira viga tagara i ruma na gahu apuna.

¹⁶Inê kê bani pusira urusira na bêbê ni kare mane hato iata na Isiraelita. Ngaira ka na aniku inê geteê.

¹⁷Matena gê nahuira ka me na bêbê ni kare mane hato iata na ai ni Esipito, inê kê hagapunarira tangê mareku na ara ni bêbê ni kare mane iata na Isiraelita henira na kareta hagâkani na togoha iata.

¹⁸Hoi, i ngekê nga inê kê nahunira na raraha iana o Levi urusira na bêbê ni kare mane hato iata na Isiraelita.

¹⁹Inê kê kasira na raraha iana o Levi ka tamanira o Aroni mo karena manga na mahatanga iata na Isiraelita tangara, hanana ga tagara igê na ruma na gahu apuna urusira na Isiraelita, i era ma na Isiraelita ka me, matena ga karikari hagarangia na kiboru apuna.”

²⁰Hoi, Moise, o Aroni ma na Isiraelita hato ka hagapunarira na raraha iana o Levi suria na bonasiha iana na Araha tanga o Moise.

²¹Na raraha iana o Levi ka hagamatarotarora mareta, ka tananigi na gahu iata ma o Aroni ki hagapunarira manga na mahatanga tanga na Araha. Ngaia ki hagamatarotarora nikâ tanga na Araha.

²²Na enoni ka tanugi na ara ni marâ suria na bonasiha iana na Araha tanga o Moise renira na raraha iana o Levi. Ngekana na raraha iana o Levi ka kahu girara ga tagara igê na ruma na gahu apuna i ruguhata o Aroni mo karena.

²³Na Araha ki vi tanga o Moise, ki vi:

²⁴“Na ara ni raraha iana o Levi ki katogi nga na tagaraha iana igê na ruma na gahu apunu, haganega tenia na matena i tongatonga na 25 na harisi iana,

²⁵mataro me igê na 50 na harisi iana, ma ki kahu hatohato tenia ki mamaro.

²⁶I murina ngekana ngaia ki girara ma i tamanira na tamana na raraha iana o Levi, matena ga katogi na tagaraha iata igê na ruma na gahu apuna, ma ngaia so marena ki mareha. Nga hanana go votogi na tagaraha iata na raraha iana o Levi ngekana.”