Read Kahua TOMAHA NINUNI 9 Bible Online

TOMAHA NINUNI 9 - Kahua bible

TOMAHA NINUNI 9

¹Na hageha hagenago igê na ruata na harisi, i murina na Isiraelita ga bani hura tenia i Esipito, na Araha ki tamasi tanga o Moise igê na bagamasusu raha i Sinai, ki vi:

²“Igê na tangahuruta matara ge he na tangiana igê na hageha ngekê, haganega matena i susu na arito, na Isiraelita ka hagahigasia nga na paseka surigi na ramata tanga ma na hagesuringa renia.”

⁴Vikana o Moise ki vi tangara na Isiraelita ka hagarahasia na paseka.

⁵Na Isiraelita ka kato vikana igê na manurahitana na tangahuruta matara ge he na tangiana igê na hageha hagenago igê na bagamasusu raha i Sinai. Na enoni ka tanugi na ara ni marâ suria na bonasiha iana na Araha tanga o Moise.

⁶Tani na mane ka pe matarotaro, suria ga hataria na gahua. Tahema ki bara tangara vige hagarahasia na paseka igê na tangiana ngekana. Ngaira ka râ ka bâsirerua o Moise mo Aroni.

⁷Ngaira ka vi: “Igami kami pe matarotaro, suria mi hataria na gahua. Igami kami takusia, vi i pe arari, vige manimanigami suria vi na tarana ngekana. Igami nogamami kami obania vigami tagarenia na vogasiha ni paseka tanga na Araha henira na goamami na Isiraelita.”

⁸O Moise ki arami, ki vi: “Mu naasiê ikê. Be râ be hagatea noga na Araha.”

⁹Na Araha ki vi tanga o Moise,

¹⁰ki vi vikê tangara na Isiraelita: “Manga vi na hitangimi se vi na hitangita na raraha iami ma ki pe matarotaro, suria i hataria na gahua, se i râ hagatê i tagua ma ngaia ki obania nga vi hagarahasia na paseka,

¹¹hoi, i koro ma tangagamu vigamu hagarahasia na paseka igê na hageha i murina, igê na manurahitana na tangahuruta matara ge he na tangiana igê na ruata na hageha. Mu hagarahasia nga renigi na bereti ga pe ahunga ma na ruve mahe.

¹²Siana kamu hagahitagi tagua na ngêra tanga na tangiana i muri, ma siana ka barugigi ta na surina na ganiana. Mu hagarahasia na paseka surigi nga na ramata.

¹³Manga vi na enoni i matarotaro ma ki pe rârâ hagetê i tagua ma ki pe hagarahasia na paseka, hoi, ngaia ki hato tenira na kariaku, suria i pe vogasiê igê na matena tanga. Ngaia ki hagaratena marena vikana.

¹⁴Manga vi na mahuara i berarogami ma ki obania vi hagarahasia na paseka, ngaia ki hagarahasia nga surigi na ramata tanga ma na tamasinga renia. Na ramata ngegana ka tagenani ma tangagamu igamu ma na mahuara.”

¹⁵Igê na tangiana ga hagêrasia ma ka gasia igê na ruma na gahu iana na Araha, na vaha ki râ me ma ki buhia.

¹⁶Igê na bungiana na vaha ki bâ manga na gi.

¹⁷I na ara ni matena na vaha ki akê, na Isiraelita ka hagarurugu ma ka tavoraha, ma ka tagarahia nikâ na tênga igê na agua i vatovato igê na vaha.

¹⁸Na enoni ka tavoraha suria na tamasinga iana na Araha, ma ka tagarahia nikâ na tênga suria na tamasinga iana. Matena na vaha ki gâgâ i avorana na ruma na gahu iana na Araha, ngaira ka gâgâ tonge so ma.

¹⁹Matena na vaha ki gâgâ borahu i avorana na ruma na gahu iana na Araha, ngaira ka tototo suria na tamasinga iana na Araha ma ka pe tavoraha.

²⁰I ta na mateni na vaha ki gâgâ i avorana na ruma na gahu iana na Araha surigi ma ta na kere tangiani haritamani. Henaka, ma ngaira ka gâgâ igê na tênga se ga tavoraha, manga i bonasira na Araha.

²¹Ta na mateni na vaha ki gâgâ ma haganega igê na manurahi ki tariha igê na mavorarotana. Pusina ma na vaha ki akê, ngaira ka tavoraha. I na ara ni mateni na vaha ki akê, ngaira ka tavoraha.

²²Naka ma, manga vi na vaha ma ki gâgâ i avorana na ruma na gahu iana na Araha surigi na tangiani gi rua se na hageha gi tage, se na harisi gi tage, se vi i arihu ngavê, ngaira ki asa, vige tavoraha. Ma na matena na vaha ki akê, ngaira ka kahu tavoraha.

²³Ngaira ka tagarahia na tênga se ga sugasuga râ tanga i tagua surigi na tamasinga iana na Araha, i hagatora o Moise renigi.