Read Kahua MIKA 1 Bible Online

MIKA 1 - Kahua bible

MIKA 1

¹Na matena ga heheuri igê o Jotamo mo Agasi mo Hesekia ka maneraha i Juta, na Araha ki hagatora o Mika, ki tora tamasinga iana. Ngaia ki na mane i Moreseti. Na Araha ki hagagirara o Mika renigi na marâ hato ngegê renirerua i Samaria me Jerusaleme.

²Igamu hato na enoni i maveta, mu karinga! Mu rongo, igamu hato na marâ mu mauri i maveta! Na Araha God ki page ranganigamu tenia igê na agua apuna iana i pasina.

³Bâ, na Araha ki hura me tenia na agua apuna iana, ki soso me, ma ki page pupu tatarê igê na barani ma na hungani.

⁴Ma na barani ka page rono igê na ruguhana, manga na kantele igê na gi, ma ka tata berabera so igê na maruguni, manga na pupu igê na bêrugu.

⁵Na tarani hato ngegê ka page vora me, suria na Isiraelita ka tasi bâraha, ma na raraha iana o Jakobo ka pe toto suria God. Ti ki katora na Isiraelita ka tasi vikana? Ngaira ka na ai ni hinua raha i Samaria. Ti ki katora na ai ni Juta, ka vogasira na ataro? Ngaira ka na ai ni Jerusaleme.

⁶Tahema na Araha ki vi: “Inê be katoa i Samaria ke aruhuruhu, ma ke bê ni roroga. Inê be gurugi vato na roro ngegê igê na maruguna. Na sinopane ni hinua ke hihiruga ma ke bagora. Na vaini ma ki araria, ga hasigi igê.

⁷Inê be kumukumugi na nunuta reoreoga na ataro, ma na gi ke ngêgi na votovoto tangara na êrâ, ga tagara i ruma ni vogasiha ni ataro. Ma na ara ni marâ hato ni vogasiha inê be menamenarigi ke vora re na roro. Na ai ni Samaria ka nahunigi na marâ ngegê, hanana ga rahesira igê na ataro tanga na hagatakaniha. Ma bâ, na merongata ka page toregi vê na votovoto ngegê tangara na êrâ, ga tagara i ruma ni vogasiha ni ataro i tagua.”

⁸Mo Mika ki vi: “Tahema inê be angi ma be angi maramara. Inê be râ renigi na êgaku gonari ma be kâhisi ma, suria i rugu na obaku. Inê be angi, manga na o vasiga se na komokukuni.

⁹Na maara iana Samaria ki asa, vige page mavo. Na hagaitangiha ngekana ki sugi tarahua i Juta nikâ, ma ki tariha me noga i metara i Jerusaleme i pasita na kariaku.

¹⁰Ai ni Juta, siana kamu hagarongora na merongaka i Gata renigi na bagabevoani, ga tarahugia. Siana kamu angiangi maramara, i era ma ka rongogamu. Ai ni Beteapora, mu apuripuri i ano, suria i rugu obami.

¹¹Ai ni Sapiri, na merongami ka page henahuraugamu. Igamu kamu rupaturi ma kamu maki. Na ai ni Sanani ka magu, vige hura tenia na hinua iata. Matena mu rongora na ai ni Betesele, ga angiangi maramara, igamu kamu girara, vi i ngekana ki mareha na agua, vigamu rukuruku igê.

¹²Na ai ni Maroti ka naasia bâraha, vige tahitahi, ma ka bagahagêguri ma, suria na Araha ki hagamarumungenira na merongata, ka rihia Jerusaleme.

¹³Ai ni Lagisi, mu tagirigi na kati igê na hosi iami, ma kamu gavagava, suria mu amaka surigi na tasi iata na Isiraelita, ma kamu hagatasira na ai ni Jerusaleme.

¹⁴Hoita, ai ni Juta, mu angisia Moreseti Gata, suria i sugi mu tenigamu. Na maneraha ni Isiraele ki asa, vige page tarahua na hetamaniha tenira na me i Agasibi.

¹⁵Ai ni Maresa, na Araha ki page tagarenigamu tangara na merongami, ka henahuraugamu. Na maneraha ni Isiraele ka page gava, ma ka page ahiahi igê na vaba i Atulama.

¹⁶Ai ni hinua raha i Jerusaleme, mu angi maramara renigi na kere hinua rihigamu, suria ga mangara na karemi hetakui. Na merongata ka page henahuraura. Tahema mu gorogoro bê hurigamu, kamu hare.”