Read Kahua MIKA 2 Bible Online

MIKA 2 - Kahua bible

MIKA 2

¹I page era ngavê tangara na eragani nuni, ga pe mauru igê na bungiani, ma ki vunu i bêta na katoha, ga hagaerasira re na enoni. Matena i tangitangi, manga viga nahunia na teha, ngaira ka hata ni katogi na katoha iata.

²Manga viga tenigi na mako, ngaira ka parênigi. Manga viga tenigi na ruma, ngaira ka tavogi tenira na enoni matareha, i bara tangara, vige baru na hagaba iata. Ngaira ka girara ga raugi ma igê na tarani ngegê.

³Bâ, na Araha ki vi tangagamu, na eragani nuni, ki vi: “Inê be naka na hagaitangiha raha tangagamu, ma igamu ki bara, vigamu page gavatenia. I page era ngavê tangagamu! Ma ki hato nikâ, vigamu page hagarahasigamu maremi.

⁴Igê na matena ngekana na enoni ka page tamasigamu renia na hagaitangiha, i tarahugamu, eragani nuni. Ma ngaira ka page baro ki renigamu, suria mu bagahagêguri, kamu vi, ‘Igia ka tê tara renigi na ara ni marâ. Igia ki hato hagetage iaka! Na Araha ki paigia hura tenia na mako iaka, ma ki haganahunira renia na enoni, ga henahuraugia.’”

⁵Tahema o Mika ki vi: “Matena na kariana na Araha ka page tongania aporo igê na mako, igamu hato kamu page nagia ve, ma kamu hato nikâ, vigamu vora na kariana.”

⁶Na enoni ka tamasi bê aporo, ka vi: “Igami kami pe pasi rongoa na ateateha iamu. Siana ko ateate vigana tangagami. God ki asa, vige hagamakigami.

⁷God ki merongasira vari na Isiraelita? Na Araha ki bagamangamangariaga vari? Ngaia ki page katokato nga vigana vari? Ngaia ki pe meratamasi bâkoro vari na enoni koro ma oto?”

⁸Na Araha ki arami i harana o Mika, ki vi: “Igamu kamu taharira na kariaku, manga vi igamu ka na merongata. Tani na mane ka aporo tenia na hearihatana, ma ka ata vê i pasita, ma ka vi ngaira, viga tahi. Ma na ta kamu katogi, igamu? Igamu kamu ura henanasi mangara na manero, hanana vigamu hanagogi na tuguni iata, suria i bara tangara, vige baru tangagamu na hagaba.

⁹Igamu kamu tarigenira hura na gete na kariaku tenigi na ruma iata, ga vagevagesigi. Ma igamu kamu hagabarasira na kareta tenigi na mahatanga koro iaku, gê obania, vigê vatera.

¹⁰Tari era, kamu râ tenia i pasimi! Mareha nikâ vigamu oga ikê. Mu page meme renigi na bagaparongami. I page era ngavê tangagamu!

¹¹Igamu na eragani nuni, igamu kamu obania ma na poropete, na ani i hagahagaparu ma ki hagabekasigamu, na ani i vi tangagamu, ki vivi, ‘Na vaini ma na tonoha getegi ka page aharêsigamu.’

¹²“Igamu na ai ni Isiraele, na ani mu page tahitahi mêngagamu, inê be hagahakugamu aporo. Inê be hagahakugamu manga na avanu ni sipi, i torera aporo na sipi iana tanga na panisi iata. Na enoni ka page manasia aporo na apanena iami, mangara na sipi ga manasia na pariki ni go.”

¹³Mo Mika ki tamasi noga, ki vi: “God ki page tamanira, ka gavagava, ma ki page bêngenira hura tenigi na agua, ga bani henahuraura tange. Ngaira ka page hogegi na maani para ni hinua, ma ka page arâ tatarasi. Mareha vi na enoni, na Araha nga, ngaia marena ki page bêngenira hura.”