Read Kahua MIKA 4 Bible Online

MIKA 4 - Kahua bible

MIKA 4

¹Ta na matena i muri vê na hungana, i oga igê na Ruma ni Rotu, ki page akê teha ngavê, ma ki page teharigi na barani hato i maveta. Rako na enoni tenigi na agua hato i maveta ka page tihuri tanga.

²Ma ngaira ka page vivi: “Nika, ge akê i hungana iana na Araha tanga na Ruma ni Rotu iana God, na Isiraelita ka rahesia. Ma ngaia ki page hagesurigia renigi na obaniha iana tangagia. Ma igia ka page arâ surigi na hagesuringa iana tangagia, suria na hagesuringa iana na Araha ki râ me tenia i Jerusaleme, tenia i Sione, na agua i tamasi igê tangara na kariana.”

³Na Araha ki page bana na bevoa i berarogata na enoni hato i maveta, naka ma na ani hagarangi se na ani hagatê ka raramohaga. Ngaira ka page retegi na tatapa borahu iata ma ka katogi re na matemate. Na maani na ora ni me iata ngaira ka page tagarahigi renigi na kêke iata. Na marê ka page hato vige heariha, ma ki asa, vige page botage, vige hagarêgi nikâ na hearihatana.

⁴Na enoni hato i maveta ka page gâga igê na ramana. Na ara ni enoni ki page nahunigi na mu iana ma na apinige ni ngauha iana. Ngaia ki page gâga tatarasi, ma ki asa, vige page magutenia ta na enoni. Ngaia kani visia God raramohaga hunia.

⁵Naka ma na enoni i na agua getegi ka vogasira ma ka toto surira na harasita mareta, ma tangagia igia, igia ka vogasia ma ka toto suria hete na Araha God iaka, tare ma tarema.

⁶Na Araha ki vi: “I ta na matena inê be hagahakura na enoni, gê hagaitangira, ma ka mamasiaga igê na agua, ga henahuraura tange, ma ka totoko mangara na sipi.

⁷Ngaira ka page arâ abogobogo hagatê me tanga i pasita. Ma inê be haganega aporo nikâ henira na ani ga tahitahi mêngara. Ma ngaira ka page rakorako ngavê. Inê be oga igê na hungana i Sione, ma be marungira, haganega tenia i ngekana, ki bê ki arâ.”

⁸I monari, Jerusaleme, God ki bâsurigo manga na avanu ni sipi, i oga igê na bebetehe iana, ma ki bâsurira na sipi iana. Ma igo ko page vora aporo na hinua raha, i page gâga igê na maneraha, i page marungia na marê hagenani manga i nago.

⁹I hega go gegege, manga na gete i harahara? Renia ta go mamasiaga, manga na gete i harate kare? I hega, suria vari vi igo ko pe nahunia na maneraha? Suria vari vi na kariana na maneraha ka me?

¹⁰Igamu na ai ni Jerusaleme, mu hiote, manga na gete i hiote kare, suria na merongami ka sugi tarigenigamu hura tenia i pasimi, ka henahuraugamu ma ka megamu râ igê na bagamasusu raha tanga i Babilone. Ma i ngekana na Araha ki page hagatahigamu igê tenira na merongami.

¹¹Na merongami tenigi na agua hato getegi ka bani rihigamu, hanana viga taharigamu. Ngaira ka vi: “Ge nahuia nga Jerusaleme. Ke aruhuruhu nga!”

¹²Ma na merongami ngegana ka pe hagarea na katoha iana na Araha. Ngaira ka pe girara, vi na Araha ki hagahakura me, hanana vi menamenarira, manga na enoni i garasi ngêra.

¹³Na Araha ki vi: “Ai ni Jerusaleme, mu râ kamu barubarugira na merongami. Inê be katogamu, kamu ramo manga na puruka mane henigi na êgana ma na hona raha, ga nganganihaga ngavê. Ma na nahuninga, ga bani henahuraugi, ki tuguhigamu, mu vogasiê igê. Inê ki na Araha, gê nahunia na maveta hagenani.”