Read Kahua MIKA 5 Bible Online

MIKA 5 - Kahua bible

MIKA 5

¹Ai ni Jerusaleme, mu nanêa na hearihatana! Na merongaka ka rihigia. Ngaira ka taharia noga na maneraha, i bêngenira na Isiraelita.

²Na Araha ki vi: “Igo Beteleme i Eparata, naka ma igo na kere hinua sisite ma i Juta, ma i pasimu igo ki page vora me na maneraha, i page marungia i Isiraele, ma ki page tototo suriê maninga. Ma na raraha iana ki bani haganega me i nago kere vê noga.”

³Vikê na Araha ki page asa, vige botage renira na kariana, mataro me na matena na gete, i obara, ki page apara igê na karena mane. Igê na matena ngekana na enoni, ga bani henahuraura, ka page aporo me tangara na goata i Isiraele.

⁴Na maneraha ngekana ki page marungira na kariana, manga na avanu ni sipi i marupera na sipi iana. Ngaia ki page kato vikana renia na raramohana na Araha, ma ki page hagabângenia na arahanga iana na Araha God marena. Na kariana ka page asitatara, suria na enoni hato i maveta ka page tê viteana,

⁵ma ngaia ki page katora, ka gâga igê na ramana. Matena na ai ni Asiria ka taharia na apanena iaka ma ka hogegi na para ni hinua iaka, igia ka page atera na mane ni me, ramo ma arari, hanana ga meraheariha.

⁶Ngaira ka page meraheariha na ai ni Asiria, na apanena iana o Nimirote, ma ka page teharia ma ka page marungia. Ngaira ka page hagatahigia tenira na ai ni Asiria, matena ga taharia na apanena iaka.

⁷Na Isiraelita, na ani ga bani henahuraura ma ka tahitahi mêngara, ngaira ka mangagi na kârupu iana na Araha tangara na enoni ngegana, manga na rangi ni hasihasi. Ngaira ka page hagêguria God, mareha vi na enoni.

⁸Na Isiraelita ngegana ka page manga na laione, i gagari i bemu se igê na pariki ni sipi. Ngaia ki gamorahira na sipi, ki rikihira, ki ranguira ma ki ohera, ma ka pe raroni ni tahinga.

⁹Igê na tarana ngekê na Isiraelita ka page taharira ma ka page erasira ngavê na merongata.

¹⁰Na Araha ki vi: “Igê na matena ngekana inê be erasira ngavê na hosi ni me iami ma nikâ na kati ni hearihatana iami.

¹¹Inê be hogegi na para ni hinua iami ma be ruhuruhugi na hinua raha iami.

¹²Inê be hagamesira na mane mangata ma ka haritavo henira na enoni ni hinarunga.

¹³Inê be menamenarigi na nunuta na ataro iami ma na bea ni vogasiha iami. Ma ki asa, vigamu page vogasigi nikâ na marâ mu tahegi maremi.

¹⁴Inê be tahuru barugigi na nununa na ataro ka Asera.

¹⁵Igê na mangariaganiha raha iaku inê be hagaitangira na enoni hato i maveta, ga pe tê viteaku.”