Read Kahua MIKA 6 Bible Online

MIKA 6 - Kahua bible

MIKA 6

¹Mu karinga na Araha, i ranganira na Isiraelita. Araha, gu tamasi igê na apanena iamu. Igamu na barani ma na hungani, mu rongoa na tamasinga iana.

²Igamu na barani ma na gatani nganganihaga na maveta, mu karinga na Araha, i tamasi igê na apanena iana. Na Araha ki ranganira na kariana. Ngaia ki tamasi igê na apanena iana renira na Isiraelita.

³Na Araha ki tamasi, ki vi: “Kariaku, inê kê katogamu bera vari? Inê kê hagamamasiaga apemi vari? Mu aramiê!

⁴Inê kê toregamu hura tenia i Esipito. Inê kê hagatahigamu tenigi na mamasiaganiha i Esipito. Inê kê hagatorara o Moise mo Aroni ma ka Miriama, ka bêngenigamu.

⁵Kariaku, mu takusia na maneraha o Balaka i Moaba. Ngaia ki obania vi erasigamu. Ma na poropete o Balama, karena o Beore, ki vi tanga, vi inê kê takusigi ma na marâ koro tangagamu. Mu takusia matena mu tarêhia na ve i Jotano, matena mu tavoraha tenia i Sitimi tanga i Gilegale. Mu takusigi na tarani ngegana, ma kamu girara, vi inê kê katogamu bâkoro tare.”

⁶Na ta kê page vogasia renia na Araha God, i raha teha, matena gê rahesia? Inê kê susu tanga renira na bêhâgata na puruka vari?

⁷Manga vi inê ma be vogasia renira na rehagaro ma na rehagaro na sipi iana, se renia na oile ni olive, i gogogo manga na ve raha, na Araha ki vagevagesigi vari? I arariê ma vari, vi inê be vogasia God renia na bêbê ni kare iaku, hanana vige bonotenigi na tasi iaku?

⁸Mareha! Na Araha ki bani hagagiraragia renigi na tarani ga ararigia, viga tanugi. Na tarani, na Araha ki bonasigia renigi, ka manga igê: Ga gâga igê na otoha. Ka nganganihaga igê na hetakuiha. Ka toto suria haritagi God, ma ka obâbahaku henia.

⁹Na enoni, i takotako maninga, ngaia ki hagahigasia na Araha. Na Araha ki tamasi, ki vi: Igamu na ai ni Jerusaleme, ma na ani mu arâ tare i ngekana manga bani hanana, mu karinga!

¹⁰I ruma iata na enoni erataga ka pe oga vari igê na nahuninga, ga toregi, matena ga hagabekasira na enoni? Ngaira ka ravarava haga igê na higahigata. Na tarana ngekê inê kê kitenia ngavê.

¹¹Manga i he kê girara gê bonotenigi na tasi iata na enoni, ga ravarava haga igê na higahigani na marâ?

¹²Igamu na enoni ruruguha, igamu kamu hagamamasiagara na enoni matareha. Igamu hato ka na enoni ni hagaparunga!

¹³Suria mu bani tasi bâraha, tahema inê kê haganega noga kê hagaitangigamu ma kê hagaerasigamu ngavê.

¹⁴Igamu kamu page ngêngê, ma ki asa, vigamu ngê masu, ma kamu ama ni magê ngavê hete. Igamu kamu page nakanaka na harisi iami, ma ki asa, vige tâ suri parongani. Na ara ni marâ hato mu nakanaka, inê be hagaerasigi igê na hearihatana.

¹⁵Igamu kamu page hasihasi na mu, ma ki asa, vigamu opa maremi. Igamu kamu page rusigi na oile tenigi na guani ni olive, ma ki asa tangagamu maremi. Igamu kamu page tagarahigi na vaini, ma ki asa, vigamu tonomogi maremi.

¹⁶Na tarani ngegê ka page tarahugamu, suria mu râ surigi na bagatauhaterua na maneraha o Omeri mo Agaba, na karena. Igamu kamu ama ni amaka surigi nga na bagatarihaterua. Tahema inê be hagasuhigi na hinua iami, ma na enoni hato ka page kitakitagamu. Na enoni hato igê na agua getegi ka page ruhigami.”