Read Kahua MIKA 7 Bible Online

MIKA 7 - Kahua bible

MIKA 7

¹I era ngavê tangê! Inê kê manga na enoni, i magê ma ki bâbâ renigi na guani na apinige ni ngêra ma renigi na guani na vaini, ma ki pe tarahugi rârâ. Ngaigi hato na guani na vaini ma na guani koro na apinige na fiki, gê magêsigi, ka bani husigi.

²I mareha ngavê na enoni koro ma oto, vige hita so igê na agua. I mareha ngavê na enoni, i toto suria God, vige hita so. Na ara ni enoni ka oga ma tanga viga nahunahu enoni. Na enoni hato ka gamorahira na goata, viga nahuira.

³Ngaira ka aitangisigi ma na katoha era! Na maneraha ma na mane ni kotiha ka tamanira ma na enoni, na ani ga vatera na haga. Matena na enoni ruruguha ma ki obania ta na marâ, ngaia ki hagarongora, ma ngaira hato ka harikato renia.

⁴Tani na hitangita ka era mangagi na tone ma na tarâ, ma ngaira hato kani ga erataga ngavê. I râ me noga na matena God ki page hagaitangira igê na enoni, manga i bani visia tangara i harata na poropete, na mane ni hinarunga iata. I ngekê ngaira na enoni ka bubununuga.

⁵Siana ko tongesuria na goamu, se vigo hagêguri togo renia na tamamu. Go hinahinaru, matena go tamasi, naka ma tanga kaniamu hetakui.

⁶I ngekê na kare mane ka ruhira na vaemata, mangara vi na mane bekabekaga. Na kare hehene ka guguruga tangara na kenata. Ka hehungâta ka heariha tare. Na mane, na ahemata iamu, ngaira ka na merongamu.

⁷Ma tangê inê, inê be naasia na Araha. Inê be nanêa God ma be raruni togo renia, vi ngaia ki page hagatahiê. God, gê rahesia, ki page aganariê.

⁸I pe oto tangara na merongaka, vige manavatenigia. I monari, i ngekê igia ka vota, ma igia ka page aharaga aporo. I monari, i ngekê igia ka oga so igê na roto hono, ma na Araha ki page mavesigia.

⁹Igia ka aharê igê na ramata iana na Araha. Tahema ngaia ki mangariaga tangagia, ma ki ararigia, ga mamasiaga meni noga i ngekê. Ma hemuri ngaia ki page roherohe pusigia, ma ki page katora na merongaka, ka kasikasi mena. Ngaia ki page toregia hura tanga na marara. Igia ka page bâsia na Araha, i hagatahigia.

¹⁰Na merongaka ka page bâsigi na tarani ngegê ma ka page maki hunira ngavê. Ngaira nga na merongaka ngegê, ga manavatenigia i nago, ka vi, “Na Araha God iami kani i he?” Igia ka page bâsira na merongaka, ga page teharira ngaira ma ka page purira so mangagi na makomako i tara.

¹¹Ai ni Jreusaleme, i râ me noga na matena, mu page tagarahigi aporo igê na para ni hinua. I na matena ngekana na mako iami ki page raharaha ngavê teharia i ngekê.

¹²Na goami ka page aporo me tangagmu tenigi na ara ni agua hato: tenia i kerekê i Asiria, tenia i Esipito, tenia na apanena na ve i Uparatesi, tenigi na agua hagatê i tapanena na asi, ma tenigi na agua hagatê ni hungani.

¹³Ma na agua hato getegi i maveta ka page vora na bagamasusu raha, suria na enoni, ga oga igê, ka erataga ngavê.

¹⁴Araha, gu marupera na kariamu, manga na avanu ni sipi i bâsurira na sipi iana, suria ngaira ka na sipi iamu. Naka ma ngaira ka oga igê na mako era ma hagatê tenira na enoni getera, na mako koro ka oga rihira. Gu bêngenira ma ko hagangêra igê na mako koro i Basani mi Gileata, manga i nago kere vê noga.

¹⁵Araha, gu tamanigami renigi na mena iamu manga i nago, matena go toregami hura tenia i Esipito.

¹⁶Na enoni i na agua getegi, ga pe rahesigo, ka page bâsigi na tarani ngegê ma ka page maki, suria ga so renigo. Ngaira ka page konekone ngavê, ma ki bara tangara, vige tamasi, se vige tongesurigi na rongoha.

¹⁷Ngaira ka page angoango i ano mangara na ma ma na marâ vigana. Ngaira ka page hura me tenigi na ruma nganganihaga iata, ma ka tatata ma ka bubununuga. Ngaira ka page urisi parongata, suria ga magutenigo, Araha God iamami.

¹⁸Araha, igo getego ma ko God. Igo ko bonotenigi na tasi iata na kariamu, na ani ga tahitahi mêngara. Igo ko pe ama ni mangariaga nga. Ma igo ko vagevagesia, hanana vigo takuigami tare.

¹⁹Igo ko page takuigami aporo nikâ, ma ko page purigi na bagaparongamami ma ko page kasigi vê igê na rutuni i asi na bagatarihamami.

²⁰Gu toto surigami na kariamu, ma ku hagabângenia, vi igo ko takuigami tare, na raraha iaterua o Abaramo mo Jakobo, manga go bani surua i nago vê noga tangara na uvarimami.