Read Kahua NAHUMI 1 Bible Online

NAHUMI 1 - Kahua bible

NAHUMI 1

¹Na Araha ki hagamarutea o Nahumi renia i Nineve i vota. I pasina i Elekosi.

²Na Araha God ki kitenira na ataro. Ngaia ki mangariaga tangara na ani, ka obania viga gâga parea. Ngaia ki hagaitangira na ani ga urapusia ma igê na mangariaganiha iana ngaia ki hagamesira na merongana.

³Na Araha ki piringiape ma ki haritagi ma ki raramohaga hunia nikâ. Ngaia ki hagaitangira tare na ani na bagaparongata. Na agua na Araha ki arâ igê, ka ahi igê na roga raha. Na agua, ga pupu igê na êgana, ka ahi igê na maguara.

⁴Manga ngaia ma ki obania, ki mamata na asi, na ve ka voravora re na marave, na go i bena i Basani ka meme, na vapuna igê na hungani i Karamele ka maria, na mahe i Libanone ka maugu.

⁵Ka gisigisi na barani i maana na Araha. Na hungani ka rono. Na ano ki angingi. Na maveta ma na enoni hato igê ka tatata.

⁶Matena na Araha ki mangariaga, ti ki girara i tahitahi? Ti ki girara i tahitahi tenia na mangariganiha iana, i manga na anguruna na gi? Na mangariaganiha iana ki sikisiki manga na gi, i menamenarigi na hê mora.

⁷Na Araha ki koro teha. Ngaia ki anumasira na kariana, matena i tarahura na bagabevoani. Ngaia ki marupera na enoni, ga rukuruku i pasina.

⁸Ngaia ki erasira ngavê na merongana manga na maganuha raha. Ngaia ki hagamesira na ani ga pe tê viteana.

⁹Ai ni Nineve, na ta kamu harikato renia tanga na Araha? Ngaia ki page hagaerasigamu ngavê, naka ma na enoni, i hagenago ki rêra pusia, ki asa, vige tahi.

¹⁰Ngaia ki page sungigamu mangagi na tone ma na go maria, ga hakugi ma ka sungigi.

¹¹I berarogami, igamu na ai ni Nineve, ki bani ura me na mane, i takusigi na eraha, ma ki harikato renia na Araha.

¹²Ma na Araha ki tamasi vikê tangara na kariana na Isiraelita, ki vi: “Naka ma na ai ni Asiria ka ramo ma ka rako, inê be hagamesira ma be hagamagahurura. I monari, kariaku, inê kê hagamamasiagagamu. Ma ki hato ve kato vikana nikâ.

¹³Inê be hatungia na raramohata na ai ni Asiria tangagamu, ma be musigi na varo tenigamu.”

¹⁴Ai ni Asiria, na Araha ki tohe, ki vi vikê: “Igamu kamu page mutemute. Inê be tahuru barugigi na nunuta na harasimi, ga oga i ruma ni vogasiha iami. Inê be nanê renia na matahu tangagamu. I ararigamu mu meme!”

¹⁵Ai ni Juta, bâ! Na mane i totora tamasinga ki arâ me, ikana igê na hungana, ma ki merâ me na taroha koro. Ngaia ki arâ me, hanana i hagarongo, vi Nineve ki vota! Mu hagahigasigi na tangiani raha ni rotu iami, ma kamu hagamonarigi na suruha iami tanga God. Na eratagana na maneraha ngekana henira na mane ni me iana ki asa, vige page teharia nikâ na apanena iami. Ngaira hato ka meme hagetage.