Read Kahua NAHUMI 2 Bible Online

NAHUMI 2 - Kahua bible

NAHUMI 2

¹Nineve, ga taharigamu! Na merongami ka ata me. Ngaira ka page sugarigamu. Anumasigi na para ni hinua ma na tara! Nanê na me!

²Na Araha ki sugi vatea aporo na arahanga tangara na Isiraelita. Na arahanga ga nahunia i nago, matena na merongata ka mamêngara vige erasira, manga na roga raha i erasia na mu.

³Nineve, na bêata na merongami ka memera. Na tuguni iata ka rotorotoaga memera. Ngaira ka tehe tanga na hearihatana. Na kati ni me ka togatoga manga na gi. Na hosi iata ka bâ râha.

⁴Na kati ni me ka gaha i tara, ka hetaratarari igê na mahera na hinua raha. Ngaira ka togatoga manga na ahame ma ka sisiki manga na marangea.

⁵Na maneraha ni me ka hoe nika. Ngaira ka ura sugusugu renira. Ngaira ka gaha tanga na para ni hinua. Ngaira ka gurua na papa, i tâ pusira na mane ni me, ga tahakurua na para renia na heariha.

⁶Na maani para, ga maatia na ve, ka para ma, ma ka tahataha. Igê na ruma raha iana na maneraha na enoni ka bubununuga ma ka sugare bê aporo.

⁷Na hinua raha ka parênia ma ka henahuraura na enoni igê. Na gete ka mumu manga na kuê ma ka hatarigi na matota, suria ga ape ruruhi.

⁸Na enoni ka ogohe tenia i Nineve manga na nonganonga ga tangahia. Na uniha ki vivi: “Aporo me! Aporo me!” Ma ki mareha ngavê na hitangita, vige aharo me.

⁹Na mane ni me ka ngere, ka vi: “Hanago na siliva! Hanago na golo!” Na hinua ki aharêsia na ruruguha.

¹⁰I Nineve ki aruhuruhu, Ki hihiruga ma ki mamangu raha. Ga tatata na buniata na enoni. Ka gisigisi na êgata ma ka kuku na maata.

¹¹I Nineve i he? Ngaia ki manga na tâtâ iata na laione, na agua ga hagangêra igê na kareta, ma ka rukuruku igê na laione, na ani mane ma na ani hehene ma na kareterua.

¹²Na laione mane i gagarihira na ganiani, ki ngasira ki torera tangara na laione hehene ma na kareterua. Igê na tâtâ iana ki rurugi igê na ganiani.

¹³Na Araha ki tamasi tanga na maneraha, i marungia i Nineve, ki vi: “Bâ, inê na merongamu. Inê be sungigi na kati ni me iamu. Inê be hagamesira na mane ni me iamu. Naka ngaira ka ramo manga na laione, inê be tavogi râ tenigo na ara ni marâ hato, go hanagogi tenira na enoni getera. I asa vige rongoa nikâ na mane tora tamasinga iamu.”