Read Kahua NAHUMI 3 Bible Online

NAHUMI 3 - Kahua bible

NAHUMI 3

¹I era ngavê tangago, Nineve, go hinua raha ni hagaparunga ma ni nahu enoni. Ga aharêsigo na nahuninga, go hanagogi ma ko henahuraugi.

²Rongo! Na mata ki babahita. Na kati ni me ka hengaki ma ka korekore i tara. Na hosi ka tangotango ma ka akurukuru.

³Na mane ni me igê na hosi ka hoi nikâ. Na tatapa borahu ka sisiki. Na ora ka togatoga. Rako teha ngavê ka me. Na gahuata ka haripage. Na enoni ka tapasu igê.

⁴Ga hagaitangia i Nineve. Ngaia ki manga na êrâ. I bâkoro na apena. I hagaamura na enoni. I aharêsia na parongana era. I hagangisira na agua getegi ma ki angarira.

⁵Tahema na Araha raramohaga hunia ki vi: “Bâ, inê be hagaitangigo, Nineve. Inê be tasigo, ku rupaturi, ma be hagabâsira na enoni igê na agua getegi renigo, ke bâsigo gu rupaturi ma ko maki teha ngavê.

⁶Inê be ruhigo. Inê be kasi roro hurigo ma be makorego. Inê be hagamakigo. Na enoni ka page makimaki tenigo.

⁷Na enoni hato, ga bâsigo, ka page kakahuru renigo. Ngaira ka page vivi: ‘Nineve ki aruhuruhu! Ti ki angisia? Mareha vê! Ti ki botage vi hagamanapua? Mareha vê!’”

⁸Nineve, go takusia vari, vi igo ko teharia i Tebesi, na hinua raha i Esipito? I ngekana nikâ ki oga igê na ve raha, i anumasia manga na para ni hinua. Ngaia ki na ve i Nile.

⁹Ngaia ki marungirerua i Nubia ma i Esipito. Na arahanga iana ki ramo teha ngavê. Na ai ni Libia ka tamania.

¹⁰Henaka, ma na merongana ka henahuraura na ai ni Tebesi. Ka botagigi na bêta na kareta ka me igê na ara ni agua i hinua. Ngaira ka barora na maneraha renigi na seni, ka torera vê ma ka tonganira re nga.

¹¹Nineve, na maguha ki page angarigo nogamu, manga na mane i ruguhia na tonoha, ki aripo na maana. Igo nikâ ko page uhungia, vigo gavagava ahehi tenira na merongamu.

¹²Na ruma nganganihaga hato iamu ka page mangagi na guani mata na apinige na fiki. Na enoni ki ngingia na apinige ma na guani ka anunu me i harana!

¹³Na mane ni me iamu ka vora re na gete. Na apanena iamu ki pe bara tangara na merongamu. Na gi ki page ngaugi na raburini na maani para.

¹⁴Gu uringenia na ve, suria na merongamu ka page rihigo. Gu hagagatagatanigi nga na ruma nganganihaga iamu. Gu pupurigi na mako memera, ma ku hahigi ke voravora re na hê.

¹⁵Naka ma, ma na gi ki page ngaugo, se go page meme igê na hearihatana. Igo ko page mutemute, manga na mu ga hatungia na pê.

¹⁶Nineve, igamu kamu rako mangara na ruruha ma na ruruha ni pê. Na enoni i pasimu, ga nahuni sitore, ka rako teharigi na higu i vavearo. Ma i ngekê ngaira ka bani magahuru vê, mangara na pê, ga ngê masu, ma ka gasigi na gahagata ka gaha vê.

¹⁷Na maneraha iamu ka mangara na ruruha ni pê. Matena ni maratoha ngaira ka rêra ngahisigi na apê iamu, ma na matena i mahana na arito, ngaira ka gaha, ma ka pe hagarera vê.

¹⁸Maneraha ni Asiria, na tamamu ma na kariamu, ga tagara igê na gavumane iamu, ngaira hato ka bani me. Na enoni, go marungira, ka totoko i toro. Ma ki mareha ta na enoni, vige hagahakura aporo me nikâ.

¹⁹Na mamasiaganiha iamu ki asa, vige page hato. Na maara iamu ki asa, vige page mavo. Na enoni hato, ga rongo tarohamu, ka manavatenigo ma ka hitahita baro renigo, suria go hagamamasiagara ngaira hato.