Read Kahua HABAKUKU 1 Bible Online

HABAKUKU 1 - Kahua bible

HABAKUKU 1

¹Ikê na tamasinga na Araha ki hagamarutea na poropete o Habakuku renia.

²O Habakuku ki vi: “I arihu manga i he kê avarasigo ma ko kahu karingê ma ko kahu hagatahigami tenira na enoni, ga hagamamasiagagami?

³Renia ta igo ko hagagirarê renigi na bagabevoani ngegana? Renia ta igo ko pe botage renigi na eraha ngegana? I na ara ni agua inê kê bâsira na enoni, ga nahira na enoni ma ka erasigi na marâ iata, ma nikâ ga hekorekore, ga hevoavoa ma ka heariha.

⁴Ngaira ka aharê igê na ramata ma ka kasigi râ, ma ki asa, vige râ surigi na tarani, ga oto. Na enoni era ka ramo teharira na ani ga koro ma oto. Tahema ngaira ka horoa na otoha igê na eraha.”

⁵Ma na Araha ki tamasi tangara na kariana, ki vi: “Mu hahutugira na enoni igê na agua getegi rihigamu, ma igamu kamu page konekone ngavê renigi na marâ mu page bâsigi. Inê kê page katoa ta na marâ, i hagakonegamu ngavê. I asa iami, vigamu page tongesuria, manga mu pe bâsia.

⁶Inê be katora na ai ni Babilone ka tehateha. Na enoni ngegana ka ramoramo ma ka paroparo. Ngaira ka ragaraga me tangagi na agua getegi i maveta, hanana ga parênigi.

⁷Ngaira ka hagamagusira ma ka hagamakukura na enoni, ma ka râ surigi ma na obaniha iata mareta.

⁸“Na hosi iata ka tango teharira na o. Ngaira ka bâ râha teharira na o vasiga, ga gagari. Na mane ni me igê na hosi ka gaha me tenia hagatê. Na êgata na hosi iata ka akuhukuhu. Ngaira ka mangara na ahetaronga, ga hagavato tangagi na ganiani iata.

⁹“Na rehagaro na mane ni me iata ka manga na maguara. Ngaira ka nahu enoni ma ka parênigi na apanena iata. Na ara ni enoni hato ka bubununuga. Na enoni, ga henahuraura, ka rako teha vê mangagi na one.

¹⁰Ngaira ka tê erasira na maneraha ma ka rurusira na enoni ni ramata. I pe bara tangara, vige parênia na hinua nganganihaga. Ngaira ka rapia na para ni hinua renigi na mako, ga ukugi, ma ka parênia.

¹¹Ma hemuri ngaira ka arâ nikâ manga na roga i angihuru. Na eragani nuni ngegana ka hagêguri togo renia na raramohata manga vi na god iata.”

¹²O Habakuku ki vi: “Araha, igo ko pe bani God me vari haganega tenia i nago kere vê noga? Araha, igo ki mareha vi na God iaku vari? Igo ko koro ma oto teha ngavê ma ko mauri tare ma tarema. Igo ko bani atera na ai ni Babilone ma ko bani vatera na ramoha, hanana ga hagaitangigami.

¹³Ma ki tanu hega, go piringiape henira na eragani nuni ngegana, ga hagahagaparu ma? I pe ararigo, vigu bâsigi na eraha, suria igo ko koro ma oto teha ngavê. Tanu hega, go pe hagaitangira na enoni ngegana, ga pe botage renigi na ramata iamu? Tanu hega, go muni ma, matena ngaira ka hagaerasira na enoni, ga koro ma oto teharira ngaira?

¹⁴Manga go pe bêngenira na enoni, ngaira ka page tari purupuru manga na ruruha na siare se na rango.

¹⁵Na ai ni Babilone ka hagarera na enoni renigi na gavi mangara na siare. Ngaira ka hugora, ma ka ngerengere vagevage, suria ga tugira.

¹⁶Tahema ngaira ka vogasigi na hugo iata ma ka susu tangagi, suria na hugo iata ka vatera re na morani na ngauha ma na marâ hato getegi.

¹⁷I hega, ngaira ka ama ni hugora nga na enoni ma ka ama ni tatahura nga, manga vi ngaira ka na marâ purua?”