Read Kahua HABAKUKU 2 Bible Online

HABAKUKU 2 - Kahua bible

HABAKUKU 2

¹O Habakuku ki vi: “Inê be akê igê na bebetehe iaku, ma be naasia igê na tamasinga iana na Araha, hanana ve girara na aramiha iana tanga na hagagegeha iaku.”

²Na Araha ki aramia vikê o Habakuku: “Go segea so maninga na marâ, gê hagarongogo renia, hanana na enoni ka girara ga bâbâ hagetage renia.

³Go segea so nga na maruteha, suria na matena, gê page hagamonaria igê, ki mamênga, ma ki râ me noga ma na maruteha ki page mora. Naka ma ki bâ hagatê mênga, go naasia! Ngaia ki page hata ni râ me nga, ma ki asa, vige kakaviaga.

⁴Na tamasinga, go segea, ki manga ikê: ‘Na enoni, ga erataga, ki asa, vige tahi ma na enoni, ga koro ma oto, ka page mauri, suria ga toto suria God.’”

⁵Na ruruguha ki hagareke tara. Na enoni ka hagatage, ka paroparo ma ka vanavanaga tare manga na mera, ma ki asa, vige togo na aitangihata. Tahema ngaira ka parênigi na agua ma na agua.

⁶Ma na agua ngegê ka page manavatenira na ai ni Babilone, ma ka page baro ki renira na merongata, ka rurusira. Ngaira ka page vi: “I page era ngavê tangagamu, suria mu hanago bâraha! I sugi hato iami, vigamu hanago, se vigamu tugurira na enoni, hanana viga barubaru na hagaba mu vatera.”

⁷Bâ, na enoni, ga hagaba tenigamu, ka page hagakangigamu ma ka page tugurigamu, kamu barubaru na hagaba. Igamu kamu page bubununuga. Ngaira ka page rurugu tenigamu.

⁸Igamu kamu bani rurugu tenira na enoni igê na agua rako getigi. Ma na ani ga tahitahi mêngara ka page rurugu tenigamu, suria mu nahuira na enoni ka me ma mu erasigi na mu ma kamu hagasuhigi na hinua.

⁹I page era ngavê tangagamu! Igamu ma na ahemata iami kamu ruruguha renigi na marâ, mu hanagogi tenira na enoni getera. Igamu kamu migitanu na ruma iami tenira na merongami ma na bagabevoani.

¹⁰Ma na katoha iami ka hagamakira na ahemata iami, suria igamu kamu nahuira rako na enoni tenigi na agua getigi. Tahema igamu kamu page me.

¹¹Ngaigi nikâ na hê na apê ni ruma ka angisia na siva tangagamu, ma na ringeni ki tagitagi igê na gato.

¹²I page era ngavê tangagamu! Na nahunga ni nuni ma na bagaparongami ka na hunana na hinua iami.

¹³Na enoni, mu bani henahuraura, ka me ngavê na apeta, suria ga tagara bâraha purua ma. Na marâ hato, ga tagarahigi, ka page ngaugi na gi Ngaia nga na Araha raramohaga hunia kani katogi vigana!

¹⁴Ma na maveta ki page vunu renia na giraraha renia na raramohana na Araha, manga na asi i vunu.

¹⁵I page era ngavê tangagamu! Igamu kamu mangariaga tangara na enoni getera, kamu ruhira ma kamu hagamakira. Igamu kamu katora ka tariahehu, mangara na enoni i ruguhira na tonoha.

¹⁶Igamu kamu page maki ngavê hete, ma na enoni ki hato, vige hagahigasigamu. Igamu kamu page tonomia na makiha, ma kamu page tariahehu. Na Araha ki page hagatonomigamu igê na kâkâ ni hagaitangiha, ma ki page horoa na raramohami igê na makiha.

¹⁷Igamu kamu bani tapigi na apinige i Libanone, ma i ngekê ka page tapigamu nogami, kamu meme. Igamu kamu bani nahuira ka me na marâ vasiga i ngekana, ma i ngekê ngaira ka page hagamagusigamu. Na tarani ngegê ka page vora me, suria igamu kamu nahu enoni, ma kamu henahuraura na enoni ma na hinua i maveta.

¹⁸Mu takusia vari, vi na ataro, mu hagarapea, ki girara i hagatahigamu? Ngaia ki na marâ ma, na enoni ki tahea, ma ki hagaparugamu ma. Mu takusia vari, vi ngaia ki girara i tamania na enoni, i tahea ma ki hagarapea? Aige, ma hete ngaia ki na marâ i pe girara vige tamasi! Iê?

¹⁹I page era ngavê tangagamu! Igamu kamu vi tanga na apinige purua, kamu vivi, “Rite!” Se tanga na hê kamu vivi, “Aharaga!” I hega, ngaia ki girara i hagagirararagamu renia ta na marâ? Henaka mu tagarahia ki reoreoga ma ki bâkoro, ma ngaia ki pe mauri!

²⁰Na Araha ki oga igê na Ruma Apuna iana. Na enoni hato i maveta ki ararira, ga munimuni i maana.