Read Kahua HABAKUKU 3 Bible Online

HABAKUKU 3 - Kahua bible

HABAKUKU 3

¹Na nunginungi iana na poropete o Habakuku ki manga ikê. Na ringena ki manga na ki na hagagegeha.

²Araha, inê kê bani rongogi na mena iamu, ma inê kê konetenigi bâraha. Gu katogi nikâ i ngekê tangagami na mena, go bani katogi i nago. Gu tamanigami nikâ, naka ma go mangariaga.

³God apuna ki arâ me tenia i Etome. Ngaia ki rerere me tenigi na hungani i Parane. Na bâbâhana ki gagahuia na vavearo. Na maveta hagenani ki vunuvunu renia na raramohana.

⁴Na maveta ki mamave manga na arito. Na marangea ki sisiki tenia na rimana, na girarana na raramohana raha.

⁵Na ringa ki hahagenago tarana, ma na mera ki hahagemuria.

⁶Na matena i rêra haritagi, na maveta ki gisigisi. Na matena i sirasira râ, na enoni i maveta ka tatata. Na barani nganganihaga ka amenamena. Na hungani hagahu ka anukumu. Ngaiginga nga na tara hagahu iana.

⁷Inê kê bâsira na ai ni Kusani ga magu, ma na ani ni Mitiani ka bubununuga.

⁸Na ve vari ka hagamangarigo, Araha? Na asi vari ki hagaera obamu? Igo ko tagirigi na vaha. Na tangi era ki manga na kati ni me iamu ma ko katora na kariamu ka tehateha.

⁹Igo ko rohea na epage ni me iamu, ma ko hagêra na mage iamu. Na marangea iamu ki vagaria na ano, tarani na ve.

¹⁰Na barani ka bâsigo ma ka gisigisi. I rangi raha ma ka maganu na ve. Na asi ki aguhuguhu ma ki arobo ngavê.

¹¹Na arito ma na hageha karu oga tonge igê na taketakeni na mage iamu, ga gaha, igê na togatogana na ora iamu, i mave.

¹²Igo ko tavo uga i maveta igê na mangariaganiha iamu. Igê na mangariaganiha iamu igo ko purira so na enoni hato i maveta.

¹³Igo ko râ, hanana go hagatahira na kariamu, hanana go hagatahia na maneraha, go bani atea. Igo ko menamenaria na bêna na maneraha, i bêngenira na enoni erataga ngegana, ma ko mutera ngavê na kariana.

¹⁴Na mage iamu ka takea na maneraha, i bêngenira na mane ni me iana, matena ngaira ka taharigami manga na maguara, hanana ga tokorenigami. Ngaira ka manavatenigami mangara na enoni ruruguha, ga hagamamasiagara pinihi na enoni, i bara tangara.

¹⁵Igo ko tango igê na hosi igê na basina na asi, ma na asi raha ki hutohutoga.

¹⁶Inê kê rongogi na tarani hato ngegê, ma kê bubununuga ngavê, ma ki tata na gaviharaku. Na apeku ki arutavea, ma na êgaku ka marumarusiga. Inê be piringiape mataro me na matena God ki page hagaitangira igê na enoni, ga taharigami.

¹⁷Naka ma ga pe hungu na varo ni vaini ma na apinige ni olive. Naka ma ga pe ganora na ngêra i mu. Naka ma ga meme ngaira hato na sipi ma na pena ni puruka ka baguru.

¹⁸Naka ma i manga ngegana, ma inê be vagevagesia hete na Araha. Inê be obakoro hete renia God na tahingaku.

¹⁹Na Araha raramohaga hunia ki hagaramoniê. Ngaia ki hagagatagatanigi na êgaku, hanana gê pe tapasu, matena gê tangotango. Ngaia ki ngahisiê, matena gê tagere igê na barani. Na ani i totora na ki, ki kiria henigi na gita ma na marâ.