Read Kahua SEPANIA 1 Bible Online

SEPANIA 1 - Kahua bible

SEPANIA 1

¹Ikê ki na tamasinga na Araha ki hagagirara o Sepania renia igê na matena o Josia, karena o Amone, ki marungia i Juta. O Sepania ki na raraha iana o Hesekia, suria o Hesekia ki apara o Amaria, mo Amaria ki apara o Getalia, mo Getalia ki apara o Kusi, mo Kusi ki apara o Sepania.

²Na Araha ki vi: “Inê be hagamagahurura na ara ni marâ hato i maveta.

³Inê be hagamagahurura na enoni hato ma na marâ hato ga mauri i bemu ma na manu hato ma na siare hato. Inê be hagavotarira na enoni, ga erataga. Inê be mutera na enoni hato. I asa tani vige page tahi. Inê na Araha kani gê visia.

⁴“Inê be hagaitangira na ai ni Jerusaleme ma Juta hagenani. Inê be hatungia hagetage na vogasiha tanga o Bala na ataro, ma ka page hitenira ngavê na mane ahuroto ni vogasiha, ga hagarapea.

⁵Inê be nahu hagamatara ngavê na enoni, ga susure igê na gerina na ruma ma ka bêtuhigi na arito, na hageha ma na higu. Inê be nahu hagamatara ngavê nikâ na enoni, ga rahesiê ma ka tohe, viga toto suriê, ma ka tongesuria nikâ na ataro o Milikome.

⁶Inê be mutera ngavê na enoni, ga tari suriê, ma hemuri ka murisigeê, ma nikâ na ani ga pe hagêguri togo reniê, se ga pe avarasiê be hagaotora.”

⁷Na tangiana na suriha iana God na Araha ki hagarangi me noga. Mu munimuni i maana. Na Araha ki hagarêa noga na vogasiha. Ngaia ki page nahuira na kariana. Ngaia ki bani guhira na merongata, hanana ga henahuraua Juta.

⁸Na Araha ki vi: “I na matena na vogasiha ngekana inê be hagaitangira igê na enoni raha, ma ngaira na karena na maneraha ma na ani hato ga râ surigi na tauhata ahuroto.

⁹Inê be hagaitangira na enoni hato, ga vogasi mangara na ahuroto ma na ani hato ga hanago ma ka nahu enoni, ma ka hagavunusia na ruma iana na maneraha iata renigi na marâ, ga hanagogi.

¹⁰“Igê na tangiana ngekana igamu kamu page rongoa na enangiha igê na maani para i Jerusaleme, ga hêtana vi Siare. Igamu kamu page rongogi na enangiha maramara igê na bogona haoru na hinua ma na marâ, ga nagiakuru igê na hungani.

¹¹Igamu nenuni mu oga i na bogona kere vato, mu angiangi raha, matena mu rongogi, suria ga page meme na enoni, ga hagavara haga, ma na ani ga urisi haga. Inê na Araha kani gê visia.

¹²“Igê na matena ngekana inê be tanga na ahame ma be gari i Jerusaleme. Inê be hagaitangira na enoni, ga meratanu mareta ma ka masesi, ma ka pe botage reniê. Ngaira ka tohe i obata, ka vi, ‘A, na Araha ki pe marâ na apena renigi.’

¹³Ga page hanagogi na nahuninga raha iata, ma ka page ruhuruhugi na ruma iata. I asa iata, vige oga igê na ruma, ga kahu toregi, se vige tonomigi na vaini, ga kahu hasigi.”

¹⁴I hagarangi me noga na tangiana raha iana na Araha. I sugia ma, ma ki ata me noga. Mu rongo! Na tangiana ngekana ki page erataga ngavê. Naka ma na mane ni me ramo, ngaira nikâ ka page tari ngerengere.

¹⁵Ngaia ki na tangiana ni mangariganiha, ni bagabevoani ma ni anumanumaha, ni aruhuruhunga ma ni komokomoha, ni rotoha ma ni hagaruruha, ni roto bungibungi ma ni puruha ni vaha.

¹⁶Ngaia ki na tangiana ni ahuringa ni me ma na mane ni me ka kasikasi mamava, matena ga taharigi na bebetehe ma na ruma nganganihaga.

¹⁷Na Araha ki vi: “Inê be katora ke anumanuma ngavê na enoni hato, ma ke râ tatagara manga na mane i guru. Ngaira ka pe tê viteaku. Tahema na gaputa ki tata aberabera manga na ve ga karingia, ma na gahuata ka page arata ma ka mapu i ano manga na ae.”

¹⁸Igê na tangiana ni mangariganiha iana na Araha ki asa iata hagetage na enoni, vige tahi, henaka ga nahunigi rako na siliva, na golo ma na haga. Na mangariaganiha iana ki manga na apena na bagagi raha, i ngaua hagamagahurua na maveta hagenani. Ngaia ki hêni hagamesira na enoni hato i maveta.