Read Kahua SAKARIA 1 Bible Online

SAKARIA 1 - Kahua bible

SAKARIA 1

¹Na varuta na hageha igê na ruata na harisi o Tario ki maneraha teha i Pesia, na Araha ki tamasi tanga na poropete o Sakaria. Vaemana o Sakaria ka no Berekia ma o virana ka no Ito.

²Na Araha raramohaga hunia ki tamasi i harana o Sakaria tangara na enoni, ki vi: “Inê na Araha kê mangariaga ngavê tangara na uvarimi.

³Ma i ngekê inê kê bonasigamu, mu urisi parongami, ma inê be aharigamu.

⁴Siana kamu usurira na uvarimi. I nago inê kê bani tamasi tangara i harata na poropete, kê vi tangara, vi siana ka bagatarihata. Ma ngaira ka pe tê viteaku ma ka haritoheê ma.

⁵“I he na uvarimi? I he na poropete ngegana? Ngaira ka mauri mêngara vari?

⁶I harata na poropete inê kê bani tamasi tangara na uvarimi, kê ramonira ma kê hagaitangira. Vikê ngaira ka kahu urisi parongata, ma ka vi, vi inê, na Araha raramohaga huniê, kani gê hagaitangira, manga gê bani visia, suria i ararira, viga kasikasi mena.”

⁷Na tangahuru gi rua matara ke he na tangiana igê na hageha tangahuru gi tage matare tage na hageha, na hageha na Sebata, igê na ruata na harisi o Tario i marungia i Pesia, igê na bungiana na Araha ki hagamarutea na poropete o Sakaria, karena o Berekia.

⁸O Sakaria ki vi: “Igê na bungiana inê kê marute, vigê bâsia na angero iana na Araha, i tage igê na hosi memera. Ngaia ki ura so i berarogani tani na apinige igê na maruguna. Ma tani na hosi getera ka ura i murina râ. Tani ka memera, tani ka mahui, ma tani ka siki.

⁹Inê kê hagatea na angero, kê vi: ‘Maneraha, na hosi tanga ta igê?’ Na angero, i ura i berarogani tani na apinige, ki arami, ki vi: ‘Ua, be hagagirarago renira.

¹⁰Na Araha ki kasira ka râ ka hahariria na maveta hagenani.’

¹¹“Hemuri na mane, ga tage igê na hosi, ka hagarongoa bê aporo na angero iana na Araha, ka vi, ‘Igami kami râ suria na maveta hagenani, ma kami tarahua, vi na maveta hagenani ki marape mênga, ma ki oga mênga igê na ramana.’

¹²“Ma na angero iana na Araha ki vi, ‘Araha raramohaga hunigo, igo ko bani mangariaga me tangagi Jerusaleme ma na hinua i Juta surigi noga na harisi tangahuru gi pi. I arihu manga i he, ma ko kahu takuira aporo?’

¹³“Na Araha ki aramia na angero renigi na tamasinge koro, ma ki haganaku parongana.

¹⁴Ma na angero ki bonasiê, gê tarohenigi na marâ, na Araha raramohaga hunia ki bani visigi tanga, ki vi, ‘Inê kê takuia bâraha Jerusaleme, na hinua apuna iaku, ma kê botage renia.

¹⁵Ma kê mangariaga bâraha tangara na enoni i na agua getegi, ga vagevagesia na marapeha, ma ka hagêguri togo renira mareta. Matena gê mangariaga râ tangara na kariaku, inê kê hagaitangira sisite râ ma, ma na enoni i ngegana ka hagamamasiagara ngavê hete.

¹⁶Tahema inê be aporo i Jerusaleme na hinua iaku, ma be takuia aporo. Ga page tagarahigi aporo na Ruma ni Rotu ma na hinua. Ngaia kani gê visia, inê na Araha raramohaga huniê.’

¹⁷“Na angero ki bonasiê nikâ, kê tarohenia na tamasinga ikê: ‘Na Araha raramohaga hunia ki vi, vi na hinua iana ka page oga aporo igê na ramana, ma ngaia ki page tamania aporo nikâ Jerusaleme, suria ngaia ki atea nikâ, vi na hinua iana.’”

¹⁸Inê kê marute nikâ, ma kê bâsigi na honi ge he na puruka.

¹⁹Inê kê hagatea na angero, i bani tamasi tangê, kê vi: “Na honi tanga na ta igê?” Ngaia ki arami, ki vi: “Ngaigi ka na raramohata na agua getegi, ga bani tokorenira na ai ni Juta, Isiraele me Jerusaleme.”

²⁰Ma hemuri na Araha ki hagabâsiê renira na vere he na mane tagara henigi na tatapa.

²¹Inê kê hagate, kê vi: “Na mane igê ka râ me tanga na ta?” Ngaia ki arami, ki vi: “Ngaira ka râ me, hanana ga hagamagusira ma ka hatungigi na raramohata na enoni, ga teharira na ai ni Juta ma ka tokorenira.”