Read Kahua SAKARIA 10 Bible Online

SAKARIA 10 - Kahua bible

SAKARIA 10

¹Mu avarasia na Araha renia na rangi igê na matena ni hasinga. Ngaia nga na Araha ki hagatorangenigi na roto bungibungiha ma na rangi raha. Ngaia ki katogi na mu i vavaka bâkoro.

²Na enoni ka rahesira na ataro, ma ka hagatera na enoni ni hinarunga. Ma ngaira ka hagaparu boromera! Ngaira ka hagabekasigamu ma renigi na maruteha iata. Ngaira ka hagagatagata apemi purua ma. Tahema na enoni ka mangara na sipi, ga tarupe. Ngaira ka tugupu, suria i mareha na ani, vige bêngenira.

³Na Araha raramohaga hunia ki vi: “Inê kê mangariaga tangara na ai mahuara ngegana, ga marungira na kariaku. Inê be hagaitangira. Inê kê nahunira na ai ni Juta, ma inê nga, na Araha raramohaga huniê, kê page anumasira. Inê be katora ke ramo mangara na hosi ni me.

⁴Tenira na kariaku ka page vora me na enoni raha, na maneraha ma na ani ga ramata, hanana ga marungira.

⁵Na ai ni Juta ka page tehateha mangara na mane ni me ka purira so na merongata igê na makomako i tara. Ngaira ka page meraheariha, suria na Araha ki ngahisira, ma na merongata igê na hosi ka page gava.

⁶“Inê be hagaramonira na ai ni Juta. Inê be hagatahira na ai ni Isiraele. Inê be katora, ke aporo i pasita, suria gê takuira bâraha. I page bâ, manga vi inê kê pe bani kasi renira rârâ. Inê nga nga na Araha God iata, ma kê aganarigi na nungnungi iata.

⁷Na ai ni Isiraele ka page ramoramo mangara na mane ni me, ma ka page vagevage mangara na mane, ga tono na vaini. Na raraha iata ka page takusira tare, vi ngaira ka teharira na merongata, ma ka page vagevagesiê, inê na Araha iata.

⁸“Inê be unira ma be hagahakura na kariaku. Inê be hagatahira ma be hagarakonira manga i nago.

⁹Naka ma inê kê tokorenira surigi na apanena iata na ai mahuara, ngaira ka ama ni takusiê nga igê na agua hagatê ngegana. Ngaira ma na kareta ka page tahi ma ka page aporo me tagenata i pasita.

¹⁰Inê be torera aporo tenia i Esipito me Asiria, hanana ge oga aporo i pasita. Inê be kasira, ke oga i Gileata me Libanone nikâ, ma ke aharêsia na agua hagenani.

¹¹Matena ga tarêhia na asi i Esipito, inê be tahurugi na navo, ma na rutuni i ve i Nile ka page mamata. Inê be hagamakira na ai ni Asiria, ga paro bâraha, ma be hatungigi na raramohana Esipito.

¹²Inê be hagaramonira na kariaku, ma ngaira ka page rahesiê, ma ka page têtê viteaku. Ngaia kani gê visia, inê na Araha.”