Read Kahua SAKARIA 12 Bible Online

SAKARIA 12 - Kahua bible

SAKARIA 12

¹Ikê na tamasinga iana na Araha renia i Isiraele. Na Araha, i hagavorarerua na vavearo ma na ano ma ki votoa na mauriha tangara na enoni, ngaia ki tamasi, ki vi:

²“Inê be katoa Jerusaleme, ke vora manga na kâkâ na vaini. Na enoni i na agua getigi rihia ka page tono, ma ka page tariahehu mangara na enoni, i ruguhira na tonoha. Ngaira ka page rihuia Jerusaleme ma nikâ na hinua getigi i Juta.

³I na matena ngekana inê be katoa igê Jerusaleme, ke manga na hê mora higa tangara na enoni ngegana. Matena ngaira ka uhungia, viga raragea akê, ngaia ki page hagamamarira. Na enoni hato i maveta ka page hakuhaku, hanana viga taharia.

⁴I na matena ngekana inê nga na Araha be hagamagusira igê na hosi iata, ma be katora na mane ni me igê ke bekabekaga. Inê be bâsurira na ai ni Juta ma be hagamagahurura na hosi iata na merongata.

⁵Ma na apaparaha hato, ga râ me tenia i Juta, ngaira ka page hetamatamasi, ka vi, ‘Na Araha God raramohaga hunia ki hagaramonira na kariana i Jerusaleme.’

⁶“I na matena ngekana inê be katora igê na apaparaha iana o Juta ngegana, ke vora manga na gi, i ngaua na vapu se na bena ni go maria. Ngaira ka page mutera na enoni hato i na agua getegi, ga rihira, ma na ai ni Jerusaleme ka page ape tatara ma i hinua iata.

⁷“Inê nga na Araha be hagatahira hagenago na ai ni Juta, suria inê kê pe obania, vige rongo raha na atata na raraha iana o Tavite ma na ai ni Jerusaleme teharigi na atata na enoni getera i Juta.

⁸I na matena ngekana inê nga na Araha be anumasira igê na ani ga oga i Jerusaleme, ma na ani ga marumarusiga i berarogata ka page ramoramo manga o Tavite. Na raraha iana o Tavite ki page bêngenira manga na angero iana na Araha, i hagenago tarata manga God marena.

⁹I na matena ngekana inê be mutera na ara ni enoni hato, ga taharia Jerusaleme.

¹⁰“Inê be angarira na raraha iana o Tavite ma na enoni getera ni Jerusaleme, hanana ga hetaki ka avaravara ma ka tangahurira. Ngaira ka page boretenia na ani ga bani ahura ki me. Ma ngaira ka page angi maramara, mangara na enoni ga hagamesia na kare i tage iata. Ngaira ka page angi maramara bâraha, mangara na enoni ga hagamesia na bêbê ni kare mane.

¹¹I na matena ngekana na enangiha i Jerusaleme ki page raha manga na enangiha tanga o Hatarimone igê na bena i Megito.

¹²Na agua hagenani ki page angiangi maramara, na ara ni raraha hehegetigi: na raraha iana o Tavite getera vê, na raraha iana o Natane getera vê,

¹³na raraha iana o Levi getera vê, na raraha iana o Simei getera vê, ma na raraha hato getera vê nogata.

¹⁴Na ara ni raraha ki angi maramara getea vê, ma igê na ara ni raraha ka angiangi getera vê na mane ma getera vê na gete.”