Read Kahua SAKARIA 2 Bible Online

SAKARIA 2 - Kahua bible

SAKARIA 2

¹Inê kê marute nikâ, ma kê bâsia na mane, i merâ na varo ni hagevovo.

²Inê kê hagatea, kê vi: “Go arâ i he?” Ngaia ki arami, ki vi: “Inê kê arâ kê hagevovoa Jerusaleme, manga i he ki borahu ma ki aberabera.”

³Ma na angero, i meêtamasi tare, ki vora me nikâ henia tani na angero, i râ me vurusia,

⁴ma ki vi tanga, ki vi: “Garigari, gu vi tanga na mane, i hagevovo, vi i ngekana i Jerusaleme ka rako teha ngavê na enoni ma na puruka ma na sipi ma na marâ vigana, ma ki raha era, hanana vige tagarahia na para rihuia.

⁵Na Araha ki bani vi, vi ngaia marena ki page anumasia na hinua manga na para na gi, ma ki page oga i ngekana henia na raramohana raha.”

⁶Na Araha ki bonasira na kariana, i vi: “Garigari, mu gavatenia i Babilonia. I nago inê kê bani tokorenigamu surigi na ara ni agua, matena na ai ni Babilonia ka henahuraugamu.

⁷Ma i ngekê inê kê bonasigamu, mu hata ni aporo i Jerusaleme.

⁸Na ani ma na enoni, i hagatanu tangagamu, ngaia ki hagatanu tangê inê, suria inê kê tanugamu re na rokoku. Ngaia kani gê visia, inê na Araha raramohaga huniê.” Vikê na Araha raramohaga hunia ki hagatorangeniê, hanana gê hagarongora na enoni, ga henahuraura na kariana, renia na tamasinga ikê:

⁹“Na Araha marena ki page megamuheariha, ma na enoni, mu bani henahuraura, ngaira ka page henahuraugamu nogata.” Igê na matena ngekana na enoni hato ka page girara, vi na Araha raramohaga hunia kani hagatorangeniê.

¹⁰Na Araha ki vi: “Igamu i Jerusaleme, mu ki vagevage! Inê be ngahisigamu!”

¹¹I na matena ngekana rako na agua getegi ka page hakunia na Araha, ma ka page vora na kariana. Ngaia ki page oga henigamu, ma igamu kamu page girara, vi ngaia kani hagatorangeniê tangagamu.

¹²Na Araha ki page nahunia aporo i Juta, na nahuninga manimani iana igê na apanena apuna iana. Ngaia ki page takuia aporo na hinua i Jerusaleme teharigi na ani getigi.

¹³Igamu hato mu muni i maana na Araha, suria ngaia ki râ me tenia na agua apuna iana.