Read Kahua SAKARIA 3 Bible Online

SAKARIA 3 - Kahua bible

SAKARIA 3

¹Na Araha ki hagamaruteê nikâ, ma ki hagabâsiê renia o Josua na maneraha teha ni vogasiha, i ura i maana na angero iana na Araha. Ma i otona o Josua ki ura Satana, ma ki nanê, hanana vi hagatoraia.

²Ma na angero iana na Araha ki tamasi vikê tanga Satana, ki vi: “Na Araha ke hagaitangigo, Satana. Na Araha ke ramonigo, Satana, suria ngaia ki takuia Jerusaleme, ma na mane ikê, o Josua, ki manga na baro, ga tahura tenia na gi.”

³O Josua ki ura i ngekana i maana na angero. Ngaia ki hagesuru re na kakagani na gahu.

⁴Na angero ki vi tangara na tamana, ki vi: “Mu tasigi râ na kakagani na gahu iana.” Ma hemuri ki vi tanga o Josua, ki vi: “Inê kê toregi râ na tasi iamu, ma be hagesurugo renigi na gahu haoru.”

⁵Ngaia ki bonasira na tamana, i vi: “Mu hugusia na bêna renia na gahu haoru.” Ma ngaira ka kato vikana, ma ka hagesurua nikâ renigi na gahu haoru. Ma na angero iana na Araha ki ura ma i ngekana.

⁶Ma hemuri na angero iana na Araha ki hagarongoa o Josua, ki vi:

⁷“Na Araha raramohaga hunia ki tamasi vikê, ki vi, ‘Manga igo, ma ko marupegi na ramata iaku, ma ko tanugi na tagaraha, gê bonasigo renigi, igo ko page ama ni bâsurigi nga na Ruma ni Rotu ma na mahera igê, ma inê be aganarigi na nunginungi iamu, tagenana manga gê aganarigi na nunginungi iata na angero, ga oga ikê i maaku.

⁸Hoi, Josua, maneraha teha ni vogasiha, gu karinga. Ma igamu nogami na tamana, igamu nga ka na girarana, vi na ramana ki page voravora i na matena i muri me. Inê be hagatorangenia na kariaku, ga hêtana vi Bogona.

⁹Ma i maamu, o Josua, inê kê naka na hê gi tage togo, i nahunigi na apanini gi pi, i vi, vi inê kê bâsira na ara ni marâ hato. Ma inê mareku nga, na Araha raramohaga huniê, inê kê page sege igê. Igê na tangiana gi tage togo ma inê be hagamagahurugi igê na tasi i na agua ikê.

¹⁰Igê na tangiana ngekana igamu hato kamu page harogamu heri, hanana mu vagevagesigi na marapeha ma na ramana igê na mamarugani na apinige ni fiki ma ni vaini.’”