Read Kahua SAKARIA 6 Bible Online

SAKARIA 6 - Kahua bible

SAKARIA 6

¹Inê kê marute nikâ. Inê kê bâsigi na kati ge he, viga tara me i berarogaterua na hungani na aeani.

²Na hosi memera ka okea na ani gi tage na kati. Na hosi masuri ka okea na ruata.

³Na hosi siki ka okea na oruta, ma na hosi totoperega ka okea na heta.

⁴Ma inê kê hagatea na angero, kê vi: “Maneraha, na kati ngegana tanga na ta?”

⁵Ngaia ki arami, ki vi: “Ngaigi ka na roga ge he tenigi na apanini ge he na maveta. Ngaigi ka ata ni râ ma me tenia i pasina na Araha, i nahunia na maveta hagenani.”

⁶Na kati, na hosi masuri ka okea, ki râ i tapanena tanga i Babilonia. Na kati, na hosi siki ka okea, ki râ i tapanena, ma na hosi totoperega ka râ i tapanena.

⁷Na hosi totoperega ka bâ râha, hanana viga hahutugia na maveta. Na Araha ki vi tangara, i vi: “Arâ, ma kamu hahutugia na maveta!” Ma ngaira ka râ.

⁸Ma na angero ki ngere tangê, ki vi: “Na hosi, ga râ i na apanena tanga i Babilonia, ka haganikoa na Araha, i mangariaga.”

⁹Na Araha ki bonasiê, ki vi:

¹⁰“I ngekê gu râ i pasina o Josua, o karena o Sepania. I ngekana igo ko page tarahura igê o Geletai mo Tobia mo Jetaia. Ngaira ka kahu aporo ma me tenia i Babilonia, na agua ga henahuraura tanga. Go toregi na mahatanga iata tangago.

¹¹Go tagarahia na tarepuri renigi na siliva ma na golo, ga vatego, ma ko naka i bêna o Josua, na maneraha teha ni vogasiha, o karena o Jehosataka.

¹²Ma ku hagarongoa, vi na Araha raramohaga hunia ki vi, ‘Na mane, ga hêtana vi Bogona, ki page akê ma ki page raharaha i na agua ikê, ma ki page tagarahia aporo na Ruma ni Rotu iaku.

¹³Ngaia nga nga na ani, i page tagarahia, ma na enoni ka page hagahigasia, vi na maneraha iata, ma ngaia ki page marungira. Na mane ni vogasiha ki page tamania na maneraha, ma ngairerua karu page obâbahaku ma karu page tagara haku bâkoro ngavê.’

¹⁴Na tarepuri ka page naka i Ruma ni Rotu iana na Araha, hanana na enoni ka takusira ma ka hagahigasira igê o Geletai mo Tobia mo Jetaia mo Josia.”

¹⁵Na mane tenigi na agua hagatê ka page arâ me ma ka page hetamani igê na tagarahiana aporo na Ruma ni Rotu iana na Araha. Ma na matena i hatohato, igamu kamu page girara, vi na Araha raramohaga hunia kani hagatorangeniê tangagamu. Na tarana ngekê ki page voravora me, manga vi igamu, ma kamu marupegi maninga na ramata iana na Araha God iami.