Read Kahua SAKARIA 9 Bible Online

SAKARIA 9 - Kahua bible

SAKARIA 9

¹Na tamasinga iana na Araha ki manga ikê. Ngaia ki bani naka na hagaitangiha tanga na marê i Hataraga ma tanga na hinua i Tamasiko. Na Araha ki nahunira na Isiraelita hato, ma na hinua raha i Siria ki na anina nikâ.

²Ma nikâ i Hamata, i akerena i Hataraga, ma na hinua gi rua nikâ i Taire mi Sitone henigi na ara ni giraraha iata.

³Na ai ni Taire ka tagarahia na para nganganihaga rihia na hinua iata, ma na golo ma na siliva ka aharêsia ngavê.

⁴Ma na Araha ki page tavogi râ na ara ni nahuninga hato iata. Ngaia ki page kasigi vê i asi na ruruguha iata, ma na hinua iata ki page nonoro ma ki page makaka.

⁵Matena na ai ni Asekeloni ka rigia na tarana ngekana, ngaira ka page bubununuga. Na ai ni Gasa ka page rigia nogata, ma ka page hata era ngavê renia. Ngaira nogata i Ekeroni ka page pe tako ni tahinga. Na maneraha, i marungia i hinua i Gasa, ki page meme, ma i Asekeloni ki page hihiruga.

⁶I hinua i Asetote ka page ogasia na raraha iata na enoni, ga êragi hetorariga. Na Araha ki vi: “Inê be hagamakira na enoni paroparo i Pilisitia.

⁷Ngaira ki hato, vige page ngêgi nikâ na ganiani gagapuga ma na ngauha getigi, inê kê manimanigi. Na enoni hato, ga page tahitahi, ka page voravora nogata re na kariaku manga na raraha iana o Juta. Na ai ni Ekeroni ka page voravora nogata re na kariaku mangara na Jebusita i nago.

⁸Inê be anumasia na apanena iaku, ma be ura pusira na hakuta ni me, siana ka tarari me igê. Na maneraha ki hato, vige page hagamamasiagara na kariaku. Inê kê bani bâsia, vi manga i he na kariaku ka mamasiaga. Hoi, i ngekê inê kê oga kê bâbâ.”

⁹Ai ni Sione, mu vagevage nga! Ai ni Jerusaleme, mu ngerengere vagevage! Bâ, na maneraha iami ki râ me tangagamu! Ngaia ki hahaneaga ma ki teha. Ngaia ki haritagi ma ki tagiria na tonki, na bêhâgana na tonki.

¹⁰Ngaia ki page hagamagahurugi na kati ni me tenia i Isiraele, ma na hosi ni me tenia i Jerusaleme, ma ki page barugigi na epage ni me. Na maneraha iami ki page katora ka marape heri na enoni hato i maveta. Ngaia ki page marungia na maveta hagenani tenia i kerekê tanga i kereso.

¹¹Na Araha ki vi: “Inê kê bani naka na suruheri henigamu, i hagagatagatania na gapu ni vogasiha. Tahema inê be hagaporosira na goami tenigi na agua, ga henahuraura tange, ga mangagi na bironi mamata.

¹²Igamu na enoni, ga bani henahuraugamu, mu tako togo. Mu aporo i pasimi i Jerusaleme, na hinua nganganihaga mu apeape tatara igê. I ngekê nga inê kê vi tangagamu, vi inê kê urusigi kê nikâ na ara ni mamasiaganiha hato iami renia na ramana.

¹³Juta ki page manga na epage ni me iaku. Na Isiraelita ka page mangagi na mage iaku. Na me i Sione ka page manga na tatapa borahu iaku, hanana gê meraheariha re na merongata.”

¹⁴Na Araha ki page vora me i avorata na kariana. Na mage iana ka page manga na marangea. Na Araha raramohaga hunia ki page uhia na ahuri ni me. Ngaia ki page tavu uga manga na roga raha.

¹⁵Na Araha raramohaga hunia ki page anumasira. Ngaira ka page mutera na merongata renigi na hêsigogo. Ngaira ka page ngerengere mangara na mane, i ruguhira na vaini. Na gaputa na merongata ka page tatata berabera, manga na gapu ni vogasiha i hagavunusia na apira. Ngaira ka page gagapuga manga na bea ni vogasiha.

¹⁶Igê na tangiana ngekana Na Araha ki page hagatahira igê na kariana, manga na avanu ni sipi i hagatahira na sipi iana tenira na marâ, ga girara ga erasira. Ngaira ka page togatoga igê na apanena iana manga na tarepuri reoreoga. I bâkoro ma ki bâkoro ngavê!

¹⁷Na vahuna ni me ma na kare viru ka page raharaha ma ka page ramoramo surigi na ngêra koro ma na vaini.