Read Kahua MALAKI 1 Bible Online

MALAKI 1 - Kahua bible

MALAKI 1

¹Ikê nga na tamasinga, na Araha ki hagatora renia o Malaki, hanana vi hagarongora na ai ni Isiraele renia.

²Na Araha ki vi tangara na kariana, ki vi: “Inê kê takuigamu tare.” Ma ngaira ka hagatea, ka vi: “Manga i he ko hagabângenia, vi igo ko takuigami?” Na Araha ki arami, ki vi: “O Esau mo Jakobo ngairerua ka no hegoana, iê? Inê kê takuira o Jakobo ma na raraha iana,

³ma kê kitenira o Esau ma na raraha iana. Na apanena hunganiga iana inê kê bani katoa, ki vora na bagamanihê raha, ma ki hihiruga, ma na marâ vasiga ma ka oga igê.”

⁴Manga vi na raraha iana o Esau, na ai ni Etome, ma ka vi, “Naka ma ga aruhuruhu na hinua iamami, igami kami page tagarahigi aporo, “inê nga na Araha be vi: “Nakara vê ke tagara. Inê be ruhuruhugi aporo nikâ. I Etome na enoni ka page hêtana vi, ‘Agua ni Eraha’. Ma na enoni, ga goga igê, ka page hêtata vi, ‘Na ai God ki merongasira tare.’”

⁵Ai ni Isiraele, matena mu bâsia re na maami maremi na tarana ngekê, igamu kamu page vivi, “Aige, na Araha ki raramohaga hunia, mareha vi so ma i pasika igia ma igê nikâ hete na agua getegi.”

⁶Na Araha raramohaga hunia ki tamasi tangara na mane ni hagarahenga, ki vi: “Na kare mane ki hagahigasia na vaemana, ma na enoni tagara ki hagahigasia na araha iana. Inê nga na vaemami, renia ta mu pe hagahigasiê? Inê nga na Araha iami, renia ta mu pe hagahigasiê? Igamu kamu ruhiê. Naka ma, ma igamu kamu hagateê, kamu vivi, ‘Manga i he kani mi hagabângenia, vigami kami ruhigo?’

⁷Igamu kamu manga ikê: igamu kamu vogasiê renigi na ngêra, ga pe koro. Ma kamu hagate, kamu vivi, ‘Manga i he kani mi pe hagahigasigo?’ Hoi, inê be vi tangagamu: suria igamu kamu pe hagahigasia na bea mu vogasiê igê.

⁸Matena mu vogasiê renia na sipi se na marâ vigana, na ani i guru, se i maeha, se i tavi, mu takusia vari, vi koro ma? Hoi, mu uhungia kamu kato vikana tanga na maneraha teha igê na gavumane. I hega, ngaia ki girara i vagevagesigamu vari renia? Se i mahata tangagamu vari?”

⁹Na Araha raramohaga hunia ki vi: “Hoi, mane ni vogasiha, mu uhungia kamu avarasiê, hanana ve mahata tangara na kariaku! I bara vê, vi ve aganarigi na nunginungi iami, suria na vogasiha iami ki era.

¹⁰I araria ta na hitangimi, ke purusia na Ruma ni Rotu tenigamu, hanana siana kamu susu tangê nikâ igê na bea ni vogasiha. I era na obaku tangagamu. Inê be usitenigi na votovoto, mu tagarenigi tangê.

¹¹Bâ, na enoni hato i maveta hagenani ka hagahigasiê. I na ara ni agua i maveta hagenani ngaira ka susu tangê ma ka vogasiê maninga. Ngaira hato ka hagahigasiê!

¹²Ma nga noga ma igamu, igamu kamu pe hagahigasiê, suria igamu kamu vi, vi na bea ni vogasiha ki na marâ purua ma, ma suria mu vogasiê renigi na ngêra, na ani mu usitenigi maremi.

¹³Igamu kamu vi, ‘E, i usi na apemami renia,’ ma kamu usugi na barisumi. Igamu kamu vogasiê renia na sipi se na puruka mu hanagoa, se na ani i tavi, se i maeha. Mu takusia vari, vi i koro na apeku renia?

¹⁴“Manga na enoni, ma ki surua, vi vogasiê renia na sipi se na puruka, na ani i arariê, ma ki vogasiê ma renia na ani i pe arariê, ngaia ki hagaparu ma, ma ki page era ngavê tanga, suria inê ki na Araha raha, ma na enoni hato i maveta ka maguteniê.”