Read Kahua MALAKI 3 Bible Online

MALAKI 3 - Kahua bible

MALAKI 3

¹Na Araha raramohaga hunia ki tamasi, ki vi: “Inê be hagatorangenia na mane tora tamasinga iaku, ke hagarê kariê. Ma hemuri na Araha, mu naasia, ki page hagakakangi me i Ruma ni Rotu iana. Na mane tora tamasinga, na angero ni suruheri, ki râ me noga.”

²Ti ki page tahitahi, matena i arâ me igê na Araha? Ti ki pe meme, matena i voravora me igê? Ngaia ki page manga na gi, na mane ki hagamatarotaroa igê na golo, se manga na sopu ramo, na enoni ki tananigi renigi na gahu.

³Ngaia ki page surira na enoni, manga na mane i hagamatarotarogi na siliva igê na gi. Na Araha ki page hagamatarotarora na mane ni vogasiha, manga na mane i hagamatarotarogi na golo ma na siliva igê na gi. Ma ngaira ka kahu vogasia na Araha renigi na votovoto, ga araria.

⁴Na ai ni Juta ma na ai ni Jerusaleme ka page hagakoro obana aporo na Araha renigi na vogasiha iata mangara na enoni i nago.

⁵Na Araha raramohaga hunia ki vi: “Inê be râ me be surigamu, ma be ranganira otooto râ nga na ani ga marumaru ma ka haritavo, ma na ani ga gamogamo, ma na ani ga tohetohe vero, ma na ani ga hanagogi tani na meta na enoni tagara iana, ma na ani ga hagamamasiagara na gete na nâ, na kare banogo ma na ai mahuara, ma na ani hato ga pe hagahigasiê.”

⁶Na Araha raramohaga hunia ki vi: “Inê nga nga na Araha. Inê kê hagamonarigi tare na tamasinga iaku. Tahema igamu, na raraha iana o Jakobo, ki oga mênga na matena tangagamu, vigamu tahitahi igê.

⁷Igamu kamu mangara na uvarimi. Igamu nogami kamu aharêngigi na ramata iaku, ma kamu kasigi. Mu ahariê, ma inê be marupegamu aporo. Ma igamu kamu hagateê, kamu vivi, ‘Mi aharigo manga i he?’

⁸Be hagategamu nogaku. I oto ma vari, vi na enoni ki hanago tenia God? Mareha vê! Mu bâ, igamu nga kani mu hanago teniê! Igamu kamu hagateê, vi ‘Manga i he?’ Suria igamu kamu pe tagarenigi na tangahuruta na marâ iami ma na votovoto, manga i tuguhigamu.

⁹Igamu kamu hanago teniê, igamu hato. Tahema ki page tarahugamu na hagaitangiha.

¹⁰Mu nakanaka igê na kiboru ni ngêra i Ruma ni Rotu na ara ni marâ hato, ga tuguhigamu, vigamu tagarenigi tanga na Rotu, hanana viga rakorako na ngêra i ngekana. Mu uhungiê anaki, ma hanana mu page bâsiê, gê aharêsigamu renigi na ara ni marâ, ga koro tangagamu. Inê kê page hagasivorigi na mu iami.

¹¹Inê kê page tarigenira na pê tenigi na mu ni harisi iami. Ma na pariki ni vaini ka page rasirasi ngavê.

¹²Ma na enoni hato i maveta hagenani ka page visigamu, vigamu babarisi, suria na apanena iami ki koro teha ngavê tanga na ogaha. Ngaia kani gê visia, inê na Araha raramohaga huniê.”

¹³Na Araha ki vi: “Igamu kamu bani tamasi erasiê bâraha. Ma kamu hagateê, kamu vi, ‘Na ta kani gami tamasi erasigo renia?’

¹⁴Igamu kamu vivi, ‘Na rahesiana God ki asa, vige tamanira na enoni. Manga igia ma ka marupegi na ramata iana God, se viga hagabângenia tanga God, vi igia ka angitenigi na tasi iaka, ki hega, na tarani ngegê ka tamanigia vari?

¹⁵Bâ, igia ka bâsira na enoni paroparo. Ngaira ka vagevage! Na enoni erataga ka oga igê na ramana. Naka ma ngaira ka uhungia God renigi na bagaparongata, ngaia ki pe hagaitangira.’”

¹⁶Na enoni, ga toto suria na Araha, ka hetamatamasi so mareta, ma na Araha ki rongora ma ki karingagi na marâ, ga visigi. I maana God ka segegi so igê na buka na atata na enoni, ga toto suria na Araha ma ka hagahigasia.

¹⁷Na Araha raramohaga hunia ki vi: “Ngaira ka na kariaku! Na matena gê hagabângenia igê na raramohaku, ngaira ka page vora na aniku monari ngavê.

¹⁸Ma na kariaku ka page bâsia, i bâbâ getigi nikâ na marâ, ga vora me i berarogata na ani ga toto suriê ma na ani ga pe toto suriê.”