Read Kahua 1 MAKABEO 1 Bible Online

1 MAKABEO 1 - Kahua bible

1 MAKABEO 1

¹I na matena ngekana o Alesanta Raha, karena o Pilipo na maneraha i Masetonia, ki tavoraha tenia i Masetonia tanga i taharia o Tario na maneraha i Pesia ma i Metia. Ngaia ki teharia o Tario ma ki rêa na arahanga tenia. I ngekê ki mareha vige maneraha so ma i Masetonia ma nikâ hete i Pesia me Metia.

²Ngaia ki meraheariha rako na maneraha i na apanena i ngekana, ki nahuira ka me ma ki henahuraugi na hinua ni para nganganihaga.

³Ngaia ki ama ni guru nga ki arâ na arahanga iana mataro me ki nahunia na maveta hagenani. Ngaia ki rurugugi rako na agua. Matena i marungia na maveta hagenani, ngaia ki parama ma ki ura na ageagena.

⁴Ngaia ki hagahakura rako na mane ni me ramo, ki nakara rako na agua henira na maneraha igê i ruruhana na arahanga iana, ma ki tugurira na enoni hato ka takesi tanga.

⁵Matena o Alesanta ki maneraha surigi noga na harisi tangahuru matarerua, ngaia ki maeha ma ki girara vi i sugia ma vige meme. Ngaia ki unihakura me na mane ga bêngenira na mane ni me iana ma na mane igê na gavumane na tage voraha iana. Ngaia ki tonganira renia na arahanga iana.

⁶

⁷

⁸I murina i me ngaira na mane ga bêngenira na mane ni me ka têgi na arahanga,

⁹ma ka maneraha igê na apaneni hegitigi tonganira. Ngaira ma o kareta ga urusira, ngaira ka maneraha surigi rako ngavê na harisi ma ka hagamamasiagara ngavê na enoni i maveta.

¹⁰Ta na mane tenira na raraha iata na mane ga bêngenira na mane ni me iana o Alesanta, ngaia ka no Antioko Epipanesi. Ngaia ki na maneraha i era ngavê. Ngaia ki no karena o Antioko na oruta, na maneraha i Siria. Hagenago me ki vora re na maneraha i Siria igê na harisi 137, ngaia ki oga i ruma ni hagaitangiha i Roma.

¹¹Igê na matena ngekana i Isiraele ki akê me igê na haku na enoni, ga pe botage renigi na ramata igê na buka apuna. Ngaia ki hagaharora rako na enoni. Ngaira ka vi: “Nika, ge haku henira na enoni ga pe Siu, suria na mamasiaganiha ma kaniga tarahugia, suria igia ka usi vige haku henira.”

¹²Na enoni rako ka obania na takoha vikana.

¹³Tani na hitangita ka obania bâraha na tarana ngekana. Tahema ngaira ka râ i pasina na maneraha tanga ga nungia, hanana vi hagamarumungenira ka arâ surigi na tauhata na enoni ahuroto. Na maneraha ki hagamarumungenira.

¹⁴I Jerusaleme ngaira ka tagarahia igê na ruma ni hagesuri tanga ma herupurupuana ma na marâ vigana mangagi na anita na enoni ahuroto.

¹⁵Ngaira ka urusigi na gavoni na varata ga bani retegi ma ka aharêngia na suruheri apuna. Ngaira ka aganarigi na tauhata na enoni ahuroto ma na mani bagatauhata getigi.

¹⁶Matena na maneraha o Antioko ki bani hagagatagatania na arahanga iana i Siria, ngaia ki obania vi henahuraua i Esipito, suria i tangasia vi maneraha nikâ igê.

¹⁷Ngaia ki taharia i Esipito renigi rako na haka ni hearihatana, renira rako na mane ni me ramo henigi na kati ni me ma henira na mane ni me igê na elepante ma na hosi.

¹⁸Matena i meheariha o Potolemeo na maneraha i Esipito, o Potolemeo ki apariri ki gava ma ka me rako na mane ni me iana.

¹⁹O Antioko ki henahuraugi na hinua ni para nganganihaga i Esipito ma ki rurugua na agua hagenani.

²⁰Igê na harisi 143, matena o Antioko ki henahuraua hato i Esipito, henira rako na mane ni me ngaia ki taharirerua i Isiraele ma na hinua raha i Jerusaleme.

²¹Suria i akê na ageagena, ngaia ki banu i ruma ni rotu ma ki rurugugi na bea na golo ni vogasiha, na atohana na laiti henigi na ara ni marâ tanga,

²²na bea tangagi na bereti apuna, na kâkâ ma na apira, na apira na golo ga sungigi igê na marâ i sigini koro, na gahu i pusia na agua apuna ngavê, ma na mahe na golo. Nikâ ngaia ki gaia na golo tenia na maana na ruma ni rotu.

²³Ngaia ki rurugugi na siliva ma na golo, na ara ni marâ ga raha na meni ma na ara ni ruruguha i tarahugi igê na kiboru tange.

²⁴Ngaia ki toregi vê hato tanga i pasina. Nikâ ngaia ki mutera rako na enoni. Ngaia ki ageage renia vikana, suria i paroparo ngavê.

²⁵Na enoni surigi na hinua hato i Isiraele ki rugu na obata ma ka angi maramara.

²⁶Na maneraha ma na meraha ka gegege. Na enoni haoru, na mane ma na gete, ka rahari. Na bâkorohata na gete ki so ki magahuru vê.

²⁷Na mane êragi haoru ka angi maramara. Na gete êragi haoru ka apeape ruruhi igê na kiboru iata.

²⁸Na makiha ki nahuira ngavê na enoni hato. Na mako ki gisigisi renia na angiha ni matomatoaniha.

²⁹Na harisi gi rua i murina ngekana, o Antioko ki hagatorangenia na mane tora takesi tangagi na hinua i Juta. Ngaia ki ata i metara i Jerusaleme henira rako na mane ni me.

³⁰Ngaia ki tamasi igê na marapeha henira na ai ni Jerusaleme ma ngaira ka tongesuria. Ma hete ngaia ki hagaparura ma. Ki parama ma ki taharia na hinua. Ngaia ki ruhuruhua ngavê ma ki mutera rako na enoni.

³¹Ngaia ki rurugua na hinua, ki sungia ma ki hogegi na ruma ma na para ni hinua.

³²Ngaia ma na mane ni me iana ka henahuraura na gete ma na kare ma ka hanagora na puruka.

³³Hemuri ngaira ka pararihia na hinua iana o Tavite ma ka tagarahigi na bebetehe nganganihaga igê. Vikana na hinua ngekana ki nganganihaga ngavê.

³⁴Ngaira ka kasira na Siu ga bani kasia na rotu ka ruku ka oga igê.

³⁵Ngaira ka nakagi igê na tangaruha, na ngauha ma na marâ hato ga rurugugi i Jerusaleme. Ngekana ngaira ka vora na perenga raha tanga na hinua.

³⁶Na agua nganganihaga ngekana ki hagagara koro tanga ga taharia igê na ruma ni rotu ma tanga ga hahutugira igê na Isiraelita ma ka hagamamagura.

³⁷Ngaira ka mutera i ruma ni rotu na enoni ga oga suri parongata ma na manero ngegana ka hagaerasia ngavê na agua apuna.

³⁸Na ai ni Jerusaleme ka magu ma ka gava ma na ai ni mahuara ka ogasia na hinua. Na ai ni Jerusaleme ka rumakaka renia na hinua iata i vora re manga na hinua mamahuara tangara.

³⁹Na ruma ni rotu igê ki baguruga manga na manihê. Na tangiani raha ni rotu ka vora re na tangiani ni angiha maramara. Na vagevageha ni tangiana ni mamaroha ki vora re na makiha raha, suria na ai ni mahuara ka tamasi hagaru renia na tangiana ni mamaroha ma ka pe hagahigasia na ruma ni rotu.

⁴⁰Na makiha iana ki raha manga na ageageha iana i nago. Na ageageha iana ki vora re na mamasiaganiha raha.

⁴¹Hoi, o Antioko ki bonasira na agua hato hehegitigi i marungira, hanana ga kasigi râ na tauhata mareta hehegitigi ma ka voravora re na enoni haku igê na ara ni tarani. Ngaira hato ga pe Siu ka aganaria na bonasiha iana na maneraha.

⁴²

⁴³Na Isiraelita rako ka aganaria nogata. Ngaira ka banu igê na rotu ahuroto iana na maneraha, ka vogasira na ataro ma ka pe hagahigasia nikâ na tangiana ni mamaroha.

⁴⁴Na maneraha ki hagatorangenira na mane tora tamasinga tangagi i Jerusaleme ma na hinua hato i Juta, hanana ga bonasira na enoni igê ka arâ surigi na tauhata na ai ni mahuara, mareha vi na anita mareta.

⁴⁵Ngaia ki vi pusira, vi siana ka susu tanga God i ruma ni rotu, se viga vogasia renigi na koni ma na vaini. Ngaia ki bonasira, hanana viga nakagi vê na tangiani ni mamaroha ma na tangiani raha ni rotu.

⁴⁶Ngaia ki bonasira nikâ, hanana ga hagaerasia ngavê na ruma ni rotu ma ka kikitenira na mane ni vogasiha ma na mane ni hagarahenga igê.

⁴⁷Ngaia ki bonasira ka tagarahigi na bea ni vogasiha ni ataro, na ngêsu, na pangapanga ni ataro ma ka vogasi renira na bo ma na ganiani getigi, na rotu iata na Siu i manimanigi.

⁴⁸Ngaia ki vi pusira, vi siana ka retegi râ na gavoni na varata o kareta, ma ki bonasira ka tasitasi igê na ani mavê na tarani,

⁴⁹hanana viga bonotenigi ma ka pe marupegi na ramata hato na Araha i bani vatea o Moise renigi tangara.

⁵⁰Na ara ni enoni i pe arâ suria na bonasiha iana na maneraha ka nahuia ki meme.

⁵¹Na maneraha ki bonasira vikana na agua i marungira ma ki kasira nikâ na mane ga mamasurira na enoni ma ki bonasira na enoni surigi na ara ni hinua i Juta hanana ga vogasira na ataro.

⁵²Na Siu rako ka rumakaka renigi na ramata igê na buka apuna ma ka râ surigi na tamasinga iata na mane ga mamasurira. Ngaira ka hagaerasia ngavê i Isiraele hagenani renigi na bagatauhata.

⁵³Na bagatauhata ka katora na Isiraelita ga rotu koro ka ahiahi igê na agua mavê.

⁵⁴Igê na tangahuruta matare rima na tangiana igê na hageha na Kisileve igê na harisi 145 o Antioko na maneraha ki hagêrasia na ‘Eraha Raha’ igê na bea ni vogasiha i ruma ni rotu. Surigi na hinua i Jutea ka tagarahigi igê na bea ni vogasiha ni ataro.

⁵⁵I metara i maani na ruma ma igê na tara ni hinua ka susu igê tangara na ataro renigi na marâ i sigini koro.

⁵⁶Matena ga tarahugi na buka ni ramata iana o Moise, ngaira ka tarisigi ma ka sungigi.

⁵⁷Na maneraha ki haribona, viga nahuia ki meme na anima na enoni i nahunia na buka apuna se i marupegi na ramata igê.

⁵⁸I na ara ni hageha na kariana na maneraha erataga ngegana ka hagamamasiagara na Isiraelita ma ka mutera na ani ga tarahura viga pe râ suria na bonasiha iana na maneraha.

⁵⁹Igê na tangahuruta gi rua matare rima na tangiana igê na hageha ngekana na kariana erataga ngegana ka vogasi igê na bea ni vogasiha ni ataro, ga bani hagêrasia igê na bea ni vogasiha i ruma ni rotu.

⁶⁰Ngaira ka mutera kenani kare, ga bani hagamarumungenira o kareta tanga na reteha ni gavoni vara, suria na maneraha ki bonasira vikana.

⁶¹Ngaira ka rakura na kare mane i riota kenata ma ka mutera nikâ na ahemata iata ma na enoni ga retegi râ na gavoni na varata na kare mane ngegana.

⁶²Henaka ma na Isiraelita rako ka urapusia ngavê na bonasiha iana na maneraha ma ka usi vige ngêgi na ngêra na rotu i manimanigi tenira.

⁶³Ngaira ka obania viga meme, hanana vi siana ka aharêngia na suruheri apuna ma vige ngaugi na ngêra na rotu i manimanigi tenira. Tahema ka rako na ani ga me.

⁶⁴God ki hagamamasiagara ngavê na Isiraelita igê na mangariaganiha iana.