Read Kahua 1 MAKABEO 12 Bible Online

1 MAKABEO 12 - Kahua bible

1 MAKABEO 12

¹Matena o Jonatane ki girara vi na ara ni marâ ka tavoraha bâkoro tanga, ngaia ki atererua na mane gi rua ni tora tamasinga ma ki hagatorangenirerua i Roma, hanana garu hagagatagatania na suruheri ni hekomaniha henira na me i Roma.

²Ngaia ki kasia na tamasinga ngekana tangagi nikâ i Saparata ma na hinua getigi.

³Na mane tora tamasinga karu tavoraha tanga i Roma, karu banu igê na ruma ni hekarigiana ni gavumane ma karu vi vikê: “O Jonatane na mane ni vogasiha i teha ma na Siu hato ka hagatorangenigamirua me, hanana ngaira ka hagagatagatania na suruheri ni hekomaniha ma ni panepaneha henia i Roma.”

⁴Na me ni Roma ka vatererua na leta, hanana garu hagabângenigi tangara na mane ga nahuni ramoha surigi na apaneni hehegitigi, hanana vi ngairerua karu arâ purunguni igê, matena garu aporo tanga i Jutea.

⁵Nga tahana na leta iana o Jonatane tangara na ai ni Saparata kani ikê.

⁶“Igami, inê o Jonatane na mane ni vogasiha i teha, na hakuta na mane ni hagaotonga iata na Siu, na mane ni vogasiha, ma ngaira hato na enoni getera i Jutea, igami kami hagamauru koro tangagamu na goamami i Saparata.

⁷I nago o Ario na maneraha iami ki bani hagatorangenia na leta tanga o Oniasi na mane ni vogasiha iamami i teha, ki vi, vi igamu ka na goamami. Ma tahana na leta ngekana i tâ haku henia na ani ikê, ki hagatanga monari.

⁸O Oniasi ki unia banu na mane tora tamasinga iami ma ki hagahigasia ngavê. Ngaia ki aganaria na leta iami renia na suruheri ni panepaneha ma ni hekomaniha.

⁹Henaka vi i pe ararigami na suruheri ngekana, suria igami kami hagêguritogo renigi na buka apuna iamami,

¹⁰igami kami sege, hanana vi igami kami hagagatagatania na suruheri ni hekomaniha henigamu na goamami. Igami kami pe obania vigami mamahuara tangagamu, suria i arihu era igamu kamu sege tangagami.

¹¹Ma tangagami igami, surigi na harisi hato ngegana igami kami takusigamu tare mataro me i ngekê igê na tangiani raha ni rotu ma igê na tangiani getigi ni rotu, matena mi vogasia God ma kami hagarahe, suria i marisimami ma ki ararigami, suria igamu ka na goamami.

¹²Igami kami vagevagesigamu, suria i rongo raha na atami.

¹³Ma tangagami igami, ka rako na bagabevoani na hearihatani ga tarahugami, suria na maneraha ni agua hagarangigami ka megamiheariha tare.

¹⁴Henaka i manga ngekana, ma igami kami pe obania vigami hagamarâ apemi igamu se vi na enoni getera ga pane henigami ma ka koro tangagami,

¹⁵suria na Araha nga kani tamanigami ma ki teharira na merongamami ma ki hagatahigami tenira.

¹⁶Hoi, igami kami bani atererua o Numenio karena o Antioko ma o Antipatere karena o Jasone, karu tora tamasinga tanga i Roma, hanana igami kami hagagatagatania na suruheri ni hekomaniha ma ni panepaneha henira na ai ni Roma.

¹⁷Igami kami bani bonasirerua nikâ, karu hagamauru koro tangagamu urusigami ma karu tagarenia na leta ngekê ni hagagatagataniana na hekomaniha, suria igamu ka na goamami.

¹⁸Igami kami page visigamu koro renia na baruna na leta ngekê.”

¹⁹Nga tahana na leta i segea na maneraha o Ario tanga o Oniasi kani ikê:

²⁰“Inê o Ario na maneraha i Saparata, inê kê hagamauru koro tangago o Oniasi na mane ni vogasiha i teha.

²¹Igami kami tarahua na pepa renira na ai ni Saparata ma na Siu, i vi, vi igami na ai ni Saparata ka na goami na Siu, suria igia ka na raraha iana o Abarahamo.

²²Hoi, suria igia ka girara vikana, igami kami page vagevage, manga vi igamu ma kamu sege kamu hagarongogami vi manga i he na ogaha iami.

²³Na aramiha iamami tangagamu ki page manga ikê: Na animami na togoha ma na nahuninga ka na animi, ma na animi ka na animami, manga vi igamu ma kamu aganaria. Igami kami bani bonasirerua na mane iamami garu tora tamasinga karu hagarongogamu renigi na marâ ngegana.’”

²⁴O Jonatane ki rongo, vi na mane ga bêngenira na mane ni me iana o Temeterio, ka aporo me henira na mane ni me gahu teharia i nago, hanana viga meheariha.

²⁵O Jonatane ki pe obania vige naka na matora tangara, hanana vige bêbanu me igê na apanena iana. Tahema ngaia ki tavoraha tenia i Jerusaleme ma ki râ ki merahetarahu igê na apanena i Hamata.

²⁶O Jonatane ki hagatorangenira na mane ga râ bâbâ igê na tênga iata na merongana. Ngaira ka hagarongoa bê aporo, vi na merongana ka kato viga taharira na Siu suria na bungiana.

²⁷Matena i bungi me, o Jonatane ki bonasira na mane ni me hato iana, hanana ga nanê henigi na tangaruha iata, hanana ga hagagasuga ni haritaha igê na anima na matena igê na bungiana. Ngaia ki kasira nikâ na mane ni anumasiha ka urarihia na tênga.

²⁸Matena na mane ni me na merongata na Siu ka rongo, vi o Jonatane ma na mane ni me iana ka nanê ni hearihatana, ngaira ka bubununuga, ka tanga so na gi igê na tênga iata ma ka gava.

²⁹O Jonatane ma na mane ni me iana ka bâsigi na gi igê na tênga ma ngaira ka pe girara vi na ta mataro me ki tangi.

³⁰Matena ngekana o Jonatane ki gaha surira ma ki bara vige tarahura, suria ga bani tarêhia na ve i Eluteru.

³¹Hemuri o Jonatane ki aharo ki taharira na Sabateo, na me ni Arabia. Ngaia ki teharira ma ki rurugugi na nahuninga iata.

³²Hemuri ngaia ki hagarurugu ma ki râ tanga i Tamasiko ma ki râhia na apanena hagenani ngekana.

³³O Simone nikâ ki râ ma ki râhia na apanena i tariha i Asekelone ma na hinua na para nganganiha hagarangia. Ma hemuri ngaia ki kariarigu ki râ tanga i Jopa.

³⁴Ngaia ki naka na apanena na mane ni me igê, suria i rongo, vi na me i ngekana ka bani harikato, viga tagarenia na hinua na para nganganihaga i Jopa tangara na mane ni me iana o Temeterio.

³⁵I murina i bani aporo me o Jonatane, ngaia ki hagahakura na mane ni hagaotonga ma ki meraharikato viga tagarahigi na ruma na para nganganihaga suria i Jutea,

³⁶viga parapara urigi akê nikâ na para i Jerusaleme, ma viga tagarahia na para i akê ngavê, hanana i voasirerua na ruma na para nganganiha ma na hinua. Na para ngekana ki pusia ngavê na ruma nganganihaga. Vikana na me igê ki bara vige huhura me ke vurivuri se vige hagevuri.

³⁷Na enoni ka tagara haku, hanana ga hagagatagatanigi kê nikâ na para ni hinua, suria na apanena na para bêkê i na akerena na maruguna i ve i Keterone ki bani ahoge. Nikâ na apanena na hinua i Jerusaleme, ga hêtana vi Gapenata ki arari viga tagarahia aporo.

³⁸O Simone ki tagarahia aporo nikâ na hinua i Atita igê na bena i Sepeta. Ngaia ki pararihia ma ki tagarahigi na maani para ga tonga na raburini.

³⁹O Tiripone ki rapasia vi nahuia ki meme na maneraha o Antioko, suria i obania vi maneraha ngaia i Siria.

⁴⁰Ngaia ki magutenia o Jonatane, i era ma ki pe aganaria na katoha iana ma ki meheariha, hanana i hagabarasia. Vikana o Tiripone ki râ i Betesane henira na mane ni me iana, hanana vi taua o Jonatane ma ki nahuia ki meme.

⁴¹O Jonatane henira na 40.000 na mane ni me ramo iana ki râ nogana i Betesane.

⁴²Matena o Tiripone bâsira vi na mane ni me iana o Jonatane ka gahu ngavê, ngaia ki magu vige meraheariha.

⁴³Ngekana o Tiripone ki unia banu o Jonatane i pasina ma ki hagarahasia ngavê. Ngaia ki hagararingenira na mane ni hagaotonga hato tanga. Ngaia ki mahata ngavê tanga ma ki bonasira na mane ni hagaotonga ma na mane ni me iana ka tê viteana o Jonatane tagenana manga ga tê viteana ngaia.

⁴⁴Ngaia ki hagatea o Jonatane, ki vi: “Tanu hega kanigo hagamarâ apeta na mane ni me igê? Igia ka pe hemeronge.

⁴⁵Hega go pe nakara vê ke aporo i pasita? Gu atera ta kereani ma ke oga so henigo ma ko kahu takuê tanga i Potolemaisi. Inê be tagarenia na hinua ngekana tangago henigi na hinua na para nganganihaga getigi henira na mane ni me ma na gavumane igê. Hemuri inê kê aporo, suria tahema inê kê râ me ikê.”

⁴⁶O Jonatane ki tongesuria ma ki aganaria na tamasinga iana. Ngaia ki hagatorangenira aporo na mane ni me iana tanga i Jutea.

⁴⁷Ngaia ki têra so na 3000 na mane ni me. Tenira ngegana ngaia ki panira so i Galilea na 2000 ma na 1000 ma ka takua.

⁴⁸Matena o Jonatane ki bani banu i Potolemaisi, na enoni i ngekana ka purusigi na maani para, ka têa o Jonatane ma ka mutera na me hato ga takua.

⁴⁹O Tiripone ki hagatorangenira na mane ni me ga tavo uga ma na mane ni me igê na hosi tanga i Galilea ma tanga na bena raha i Jeserele, hanana ga mutera na mane ni me getera iana o Jonatane.

⁵⁰Na mane ni me iata na Siu ka takusia ma, vi na merongata ka bani têa o Jonatane ma ka bani nahuia ki me henira na me hato ga takua. Vikana ngaira ka heguniguni ma ka râ harahara ka meraheariha na merongata.

⁵¹Matena na merongata ka bâsira na Siu ga henganingani ka meraheariha, ngaira ka kariarigu bê aporo.

⁵²Hemuri na mane ni me iata na Siu ka aporo purunguni i Jutea. Henaka ma ngaira ka magu. Na Siu hato ka angi maramara, suria ga vi ma, vi o Jonatane ma na mane ni me hato iana ka bani mute.

⁵³Na agua hato hagarangia i Jutea ka rapasira bâraha na Siu, hanana vige têtê erasira ngavê. Ngaira ka vi ma, ka vi: “Na Siu ka pe nahunira na mane ge bêngenira, se vi na agua getigi ge pane henira. Hoi, na matena iaka ngekê. Ge taharira ma ke hagamagahurura, hanana na enoni i muri me ke pe hagarera.”