Read Kahua 1 MAKABEO 13 Bible Online

1 MAKABEO 13 - Kahua bible

1 MAKABEO 13

¹O Simone ki rongo, vi o Tiripone ki bani hagahakura na mane ni me gahu, hanana vi taharia i Jutea ma ki ruhuruhua.

²Ngaia ki bâsia, vi na rongoha ki hagamagusira na enoni.

³Ngaia ki kanukanura, ki vi: “Igamu kamu bani girara, vi igami o vaemaku ma na ruma iana ma igami o hegoata kami tagara ramo tangagi na ramata iana o Moise ma na ruma ni rotu. Nikâ, igamu kamu bani giraragi na hearihatani ma na bagabevoani ga tarahugami.

⁴Igami o hegoata, inê ma kanigê tahi ma ngaira hato ka me igê na henahuita pusigi na ramata ma na ruma ni rotu iaka ma pusira na Isiraelita hato.

⁵Siana hagetage kamu takusia, vi inê kê meêtanu mareku igê na mateni na bagabevoani, suria gê takusia, vi inê kê koro teharira ngaira. Mareha ngavê!

⁶Inê kê meraheariha hete na merongaka ga kitenigia, pusira na Isiraelita, pusia na ruma ni rotu ma pusira na gete iami ma na karemi.”

⁷Matena na enoni ka rongoa na tamasinga ngekana, ngaira ka gatagata aporo,

⁸ma ka ngere raha, ka vi: “I ngekê igo ko bêngenigami nga urusirerua o Juta mo Jonatane na goamu

⁹tange na hearihatani ga tarahugia. Na anima na marâ go vi tangagami renia, ngaia noga.”

¹⁰Ngekana o Simone ki hagahakura na mane ni me hato. Ngaia ki hagasusu ki hatungigi rêrê na para ni hinua i Jerusaleme ma ki hagagatagatanigi kê nikâ na bebetehe rihia.

¹¹Ngaia ki hagatorangenia o Jonatane karena o Abasalome tanga i Jopa henira na mane ni me gahu. O Jonatane ki paira hura na enoni igê ma ki ogasia ngaia.

¹²O Tiripone ki râ me tenia i Potolemaisi henira na mane ni me gahu, hanana i taharia i Jutea. Ngaia ki merâ me o Jonatane o vesina o Simone, i bani hagatotongoa i nago.

¹³O Simone ki tênga i Atita i na akerena na bena.

¹⁴Matena o Tiripone ki rongo, vi o Simone ki urusia o Jonatane o vesina ma ki nanê vi meheariha, ngaia ki kasi tamasinga tanga, ki vi:

¹⁵“Inê kê têa o Jonatane o vesimu, suria ngaia ki pe vurigi na takesi tanga na maneraha, matena i gâga mênga igê na tagaraha iana.

¹⁶Henaka, ma inê be naka vê ke râ, manga vi igo ma ko vuriê renigi na 3000 na kilo na siliva ma ko hagatorangenirerua na vererua tani o karemu tangê, hanana gê taurerua, i era ma ki merongasigami i murina mi naka vê ki arâ.”

¹⁷Henaka o Simone ki girara vi ngaira ka hagabekasia, ma ngaia ki haribona ka toregi me na siliva henirerua o karena o Jonatane, i era ma na Siu ka mangariaga tanga.

¹⁸Ngaia ki kato vikana, i era ma i hemuri na enoni ka vivi vi na merongata ka nahuia ki me o Jonatane, suria o Simone ki usi vige hagatorangenigi na siliva henirerua o karena gi rua o Jonatane ngegana.

¹⁹Ngekana ngaia ki aganaria na tamasinga iana o Tiripone ma o Tiripone ki pe hagamonaria na suruha iana, suria i pe naka vê o Jonatane ke râ.

²⁰Hemuri o Tiripone ki râ ki taharia i Jutea, hanana i ruhuruhua. Ngaia ki arigu suria na tara i Atora. Ma o Simone ma na mane ni me iana ka raravoro pusia igê na ara ni teha vi i arâ igê.

²¹Na mane ni me i ruma na para nganganihaga i Jerusaleme ka ama ni hagatorangenira nga na mane tora tamasinga tanga o Tiripone, ka nungia vi arâ me rêrê tangara suria na tara igê na bagamasusu raha, hanana i kasikasi na ngêra tangara.

²²O Tiripone ki hagarêra na mane ni me igê na hosi, hanana ga arâ i ngekana. Ma suria igê na bungiana ngekana ki na bagaroga raha, ma ki hagêrahusia vige tagere igê na hungani. Tahema ngaia ki aporo ki râ tanga i Gileata.

²³Matena i hagarangia i Basakama, ngaia ki nahuia ki me o Jonatane ma ki bagia i ngekana.

²⁴Hemuri o Tiripone ki aporo i pasina.

²⁵O Simone ki bonasira tani na me iana, hanana ga râ ka torea me na gahuana o Jonatane o vesina tanga i pasita ngaira i Moteini ma ka bagia i ngekana.

²⁶Na Isiraelita hato ka angi maramara, suria i me o Jonatane. Na angiha maramara ki râ surigi na tangiani rako.

²⁷Igê na matahuta o vaemana ma o goana o Simone ki tagarahia igê na giraraha i akê ngavê, ga atea râ. Ngaia ki tagarahia renigi na hê ga mamao na apaneniheri.

²⁸Ngaia ki tagarahigi na ruma na matahu gi pi: na anita o vaemana, kenana ma o goana ge he ka maaheri.

²⁹Ngaia ki hagêrasigi na u rihigi na ruma na matahu ngegana. Na u ga borahu ma ka bâkoro, suria ga tahe nununi igê na marâ ni hearihatana ma na haka. Ngaigi ki ura hesurisuri hetorariga. Ngaia ki tahegi vikana, hanana viga hagatakusira tare ki bê ki arâ na enoni renigi na tauhata na Makabeo. Na enoni na agua getigi ka girara ga arâ me ka bâsigi.

³⁰Na matahuta, o Simone i tagarahia i Moteini, ngaia ki gâga mênga i ngekê.

³¹Hoi, o Tiripone ki nahuia ki me na maneraha haoru na onota o Antioko,

³²ma ki ura akê marena ki maneraha i Siria urusia. Ngaia ki katogi rako na bagabevoani i ngekana.

³³O Simone ki tagarahigi aporo na hinua na para nganganihaga i Jutea. Ngaia ki hagagatagatanigi renigi na bebetehe ga akê ngavê. Na para ka upupuga ma ka tonga na maani para henigi na raburuni. Ngaia ki rurugi igê na ngêra.

³⁴Ngaia ki hagatorangenira tani na mane tora tamasinga tanga na ruata o Temeterio na maneraha, ki nungia, hanana vi naka hura i Jutea tenia na takesi, suria o Tiripone ki hanago ma tenira.

³⁵Na maneraha o Temeterio ki agana ma ki sege bê aporo, ki vi:

³⁶“Inê na maneraha o Temeterio, inê kê hagamauru koro tangago o Simone na mane ni vogasiha i teha ma ko tamata koro na maneraha, ma tangagamu na Siu hato ma na meraha iami.

³⁷Garu bani tarahugami na golo na tarepuri ma na golo na ahana na nini, go kasirerua me. Igami kami nanê ma vigami katoa na suruheri ni marapeha henigamu, ma kami bonasira na mane tora takesi ka nakagamu hura tenia na takesi.

³⁸Igami kami hagagatagatanigi akê nikâ na bani suruheri henigamu. Na hinua na para nganganihaga, mu bani tagarahigi, ka gâga vê tangagamu.

³⁹Igami kami nakagamu vê tenigi na aharêngiani na suruheri mu bani katogi me mataro me i ngekê. Igamu kamu hura nikâ tenigi na harisi mu pe takesi surigi ma tenigi na ani getigi na takesi, ga tavogi i Jerusaleme mataro me i ngekê.

⁴⁰Na anima na mane, i takusia vi i araria i hakunira na mane ni me ga anumasigami, ngaia ki girara ma. Hoi, ge oga igê na marapeha.”

⁴¹Hoi, igê na harisi 170 na hagamamasiaganiha iata na merongata ki hato tenira na Siu.

⁴²Na enoni ka haganega ka naka so na tangiana igê na pepa na suruheri ma igê na ani getigi na pepa vigana, ka sege vikê: “Igê na harisi hagenago iana o Simone, na mane ni vogasiha i teha, na araha iata na mane ni me ma na Siu hato.”

⁴³Igê na matena ngekana o Simone henira na mane ni me iana ki taharia i Gesere ma ki ogarihia. Ngaia ki tagarahia na bea ni tahariha i guruguru ki arâ. Ngaia ki gurua râ tanga na para ni hinua, ki tahakurua na bebetehe igê ma ki henahuraua.

⁴⁴Na mane ni me igê na bea ni tahariha ngekana ka asipage ka banu i rarona na hinua. Vikana na enoni i hinua ka tugupu ngavê.

⁴⁵Na mane i hinua henira na gete iata ma na kareta ka tagere igê na para ni hinua, ka tarisigi na tuguni iata, suria ga bubununuga. Ngaira ka tamasi raha ka nungia o Simone renia na marapeha, ka vi:

⁴⁶“Siana ko hagaitangigami ararigi na bagatauhamami. Gu takigami hete!”

⁴⁷O Simone ki aganarira ma ki naka vê na hearihatana. Ngaia ki paira hura tenia na hinua, ki hagamatarotarogi na ruma, ga oga igê na nunuta na harasita na ai ni hinua. Hato vikana, ma ngaia ma na mane ni me iana ka banu i hinua, matena ga ki ka hagarahasia na Araha ma ka visia koro.

⁴⁸Na ara ni marâ, ga pe râ surigi na ramata igê na rotu, ngaia ki hatungigi. Ngaia ki nakara i ngekana na enoni, ga marupegi maninga na ara ni ramata hato iana o Moise. Ngaia ki hagagatagatania kê nikâ na hinua. Ma tanga so ngaia marena ngaia ki torea na ruma igê.

⁴⁹Na mane ni me igê na ruma na para nganganihaga i Jerusaleme ki bara tangara, vige hura ke vuri se vige hagavuri. Tahema ngaira ka magê ngavê ma ka rako na hitangita ga bani mesi magêha.

⁵⁰Ki rârâ ma ngaira ka nungia o Simone renia na marapeha. Ngaia ki agana ma ki paira hura tenia na ruma na para nganganihaga ma ki hagamatarotaroa tenigi na ara ni marâ ni ataro.

⁵¹Igê na tangahuruta gi rua matare oru na tangiana igê na ruata na hageha igê na harisi 171 na Siu ka banu igê na ruma na para nganganihaga. Ngaira ka ngerengere vagevage, ka karingenigi na ahani na nini ma ka kiki ka hagarahasia God ma ka visia koro, suria ga teharira na merongata ma ka bani paira hura tenia i Isiraele.

⁵²O Simone ki naka na ramata tangara na Siu, viga hagarahasia na tangiana ngekana igê na ara ni harisi. Ngaia ki hagagatagatania akê nikâ na ruma na para nganganihaga igê na ruma ni rotu i na apanena bêrâ tanga na ruma na para nganganihaga i teha akê. O Simone ma na me iana ka râ ka ogasia.

⁵³O Simone ki bâsia o Joane o karena i bani vora re na enoni raha. Tahema ngaia ki atea ki bêngenira na mane ni me hato. O Joane ki râ ki ogasia i Gesere.