Read Kahua 1 MAKABEO 14 Bible Online

1 MAKABEO 14 - Kahua bible

1 MAKABEO 14

¹Igê na harisi 172 na ruata na maneraha o Temeterio ki hagahakura na mane ni me iana ma ki râ i Metia ki garia na hetamaniha, hanana vi meheariha o Tiripone.

²Matena na onota o Arasake na maneraha i Pesia me Metia ki rongo, vi o Temeterio ki bani pu igê na apanena iana, ngaia ki hagatorangenia ta na mane i bêngenira na mane ni me, hanana vi taua hemêri o Temeterio.

³Ngaira ka taharira na mane ni me iana o Temeterio ma ka teharira. Ngaira ka rakua o Temeterio ma ka meaporo me tanga na maneraha o Arasake, ma ngaia ki kasia i ruma ni hagaitangiha.

⁴Igê na marungiha iana o Simone i Jutea ki oga igê na marapeha. Suria na ogaha hagenani iana ngaia ki tagara tare tanga na ogaha koro tangara na enoni. Na enoni ka ageagesia i bêngenira.

⁵Ngaia ki rongo raha akê nikâ na atana, suria i henahuraua i Jopa i asi. Vikana ngaia ki tangahia na tara i asi tangagi na marê.

⁶Ngaia ki gurugi râ na taritarihani na apaneni iata na Siu, suria i têa aporo na agua hagenani.

⁷Ngaia ki torera aporo me tange i pasita rako na enoni, na merongata ga bani henahuraura. Ngaia ki henahuraugi i Gesere, i Betesure ma na ruma na para nganganihaga i Jerusaleme. Ngaia ki hagamatarotarogi tenigi na marâ ni ataro ma ki mareha rârâ ta na merongana vige urapusia.

⁸Na Siu ka tagara purunguni i mu iata. Na ngêra ka ganora igê ma na apinige na ngauha igê na bena ka hehunguri.

⁹Na mane na gapu haoru ga mane ni me ka bâkoro renigi na tuguni ma na tangaruha iata. Na gemêa surigi na mahera ni hinua ka oga ka tamasigi na tarani ga bani akê me.

¹⁰O Simone ki votogi na ngêra tangagi na hinua raha henigi na tangaruha. Na atana ki rongo raha i na ara ni agua hato.

¹¹Suria ngaia tahema i Isiraele ki oga igê na marapeha ma na Isiraelita ka vagevage teha ngavê.

¹²Na enoni hato ka migioga purunguni na mu ni vaini ma na apinige na fiki iata,

¹³suria i mareha rârâ ta na maneraha vige merongasira. Ngaira hato ka so renira na Siu.

¹⁴O Simone ki tamanira na enoni matareha i berarogata na Siu. Ngaia ki hagagatagatanigi na ramata iana o Moise ma ki hagamagahurura na me hato ga erataga ma ka bani kasia na rotu.

¹⁵Ngaia ki hagabâkoroa akê nikâ na ruma ni rotu ma ki hagatongani akê nikâ na apira ma na kâkâ ma na marâ vigana tanga na hagarahenga igê.

¹⁶Matena i Roma ma i Saparata ka rongo, vi o Jonatane ki me, ngaira ki rugu ngavê na obata.

¹⁷Matena na ai ni Saparata ka rongo, vi o Simone ki mane ni vogasiha i teha urusia o Jonatane ma ki têa na apanena henigi na hinua igê,

¹⁸ngaira ka tari ka segea so igê na bahitani na kapa na suruheri ni hekomaniha, ga bani katoa henirerua o vesina o Juta ma o Jonatane. Ngaira ka hagatorangenigi na bahitani tanga.

¹⁹Ngaigi ka tomanigi igê na hekarigiana iata na enoni i Jerusaleme.

²⁰Nga na tamasinga nga iata na ai ni Saparata kani ikê: “Igami na ai ni Saparata ma na meraha iata kami hagamauru koro tangago o Simone na mane ni vogasiha i teha ma tangagamu na goamami na Siu hato.

²¹Na mane tora tamasinga mu hagatorangenirerua me tangagami, ngairerua karu hagarongogami, vi igamu kamu oga igê na ramana ma ki rongo raha na atami. Na râha me iaterua ki hagakoro obamami.

²²Na tamasinga iaterua igami kami bani segegi so igê na hekarigiana iamami. I manga ikê: ‘O Numenio karena o Antioko ma o Antipatere karena o Jasone, garu mane tora tamasinga iata na Siu, karu râ me i pasimami, hanana garu hagagatagatania na suruheri ni hekomaniha iata.

²³Na hekarigiana iata na enoni ki vi, viga vagevagesia na râha me iaterua ma ka naka tahana na tamasinga iaterua henigi na pepa igê na gavumane, hanana i gâga henira na ai ni Saparata. Ma tahana na tamasinga ngegana ka bani kasia tanga o Simone na mane ni vogasiha i teha.’”

²⁴Hemuri o Simone ki hagatorangenia o Numenio tanga i Roma henia na mahatanga na bêata raha na golo, na higahigana ki 500 kilo, hanana i hagagatagatania na suruheri ni panepaneha henira na ai ni Roma.

²⁵Matena na ai ni Isiraele ka rongogi na tarani hato ngegana, ngaira ka hetamatamasi, ka vi: “E, i manga i he kaniga girara ga hagabângenia, vi igia ka visira koro o Simone mo karena?

²⁶Ngaia, o vesina hato ma na ruma hagenani iana o vaemana ka na hagêguringa iaka igia hato na Siu. Ngaira ka tahuru pusira na merongaka ma ka katogia ka asitatara.” Hoi, ngaira ka tari ka segegi so na tauhana ngegana igê na bahitani na kapa ma ka rapusigi igê na u igê na hungana i Sione.

²⁷Ngaira ka tari ka sege vikê: “Igê na tangahuruta matare varu na tangiana igê na hageha na Elulu igê na harisi 172 - ngaia ki na oruta na harisi iana o Simone i mane ni vogasiha i teha-

²⁸i rarona na hekarigiana raha iata na mane ni hagarahenga, na enoni, na gavumane ma na meraha, igami kami rongo igê vikana.

²⁹Surigi rako na hearihatani ga tarahura na Siu, o Simone karena o Matatia na mane ni hagarahenga tenia na raraha iana o Joiaribi ma o vesina hato, ngaira ka kasi manavata ka meraheariha na merongata na Siu, barasira ngaira, na ruma ni rotu ma na ramata i na buka apuna. Tahema ki rongo raha na atata na Siu.

³⁰O Jonatane ki katora na Siu ka obahaku. Ngaia ki vora na mane ni vogasiha i teha. Matena i me,

³¹na merongata na Siu ka kahu harikato, viga taharia i Jutea, ka ruhuruhua ma ka hagaerasia na ruma ni rotu.

³²Vikana o Simone ki ura akê ki heariha barasia i Jutea. Ngaia ki kasi rako ngavê na haga iana marena renigi na tangaruha ma na meta na mane ni me iana.

³³Ngaia ki pararihigi na hinua i Jutea ma ngaia nga i Betesure igê na pereperegana i Jutea, suria i nago na merongata na Siu ka pagegi na tangaruha igê. Ngaia ki naka ta na apaneni na mane ni me igê.

³⁴Ngaia ki pararihia i Jopa i asi ma nikâ na hinua i Gesere igê na taritarihana i Asote, ga ogasia i nago na mane ni me ga merongasira na Siu. Ngaia ki nakara hete na Siu igê. Ngaia ki vutungira na enoni igê renigi na marâ ga obanigi viga mauri re.

³⁵Na Siu ka bâsia, vi o Simone ki tênganira ma ki obania vi rongo raha na atata. Tahema ngaira ka atea ki bêngenira ma ki mane ni vogasiha iata i teha. Ngaira ka kato vikana renigi na tagaraha raha tangara na enoni i tênganira ma suria i katora na Siu ka akê me bâkoro, ma ki uhungia bâraha nga, vige rongo raha na atata.

³⁶Matena i bêngenira, ngaia ki tarigenira hura na enoni ahuroto tenia na agua ma na mane ni me na merongata tenia na hinua iana o Tavite i Jerusaleme. Na me ngegana ka bani tagarahia na ruma na para nganganihaga igê, tanga ga huhura igê, hanana ga hagaerasia na ruma ni rotu apuna.

³⁷O Simone ki kasira na Siu ka ogasia na ruma na para nganganihaga, i hagagatagatania akê nikâ, hanana i Jutea ma na hinua i Jerusaleme karu asitatara. Ngaia ki uruigi akê nikâ na para ni hinua.

³⁸Na maneraha o Temeterio ki hagagatagatania nikâ ki mane ni vogasiha i teha.

³⁹Ngaia ki kasia akê ki vora na hitangita na tamana koro na maneraha ma ki hagahigasia ngavê.

⁴⁰O Temeterio ki kato vikana, suria i rongo, vi na ai ni Roma ka naka na suruheri ni hekomaniha ma ni panepaneha henira na Siu ma ka visira vi na goata, ma ka aganarira na mane tora tamasinga iana o Simone ma ka hagahigasira ngavê.

⁴¹O Temeterio ki rongo nikâ, vi na Siu ma na mane ni hagarahenga iata ka atera o Simone ma na raraha iana ka bêngenira ma ka mane ni vogasiha iata ga teha, mataro me na matena i page rêra akê na poropete mora.

⁴²O Simone ki marungira na Siu, ki bâbâsuria na ruma ni rotu ma ki bêngenira na mane ni me iata. Ngaia ki bâbâsurigi na marâ hato na mane ni me ka obanigi. Na hinua na para nganganihaga ka oga i ruguhana. Ngaia ki atera na gavumane ka tonganigi na tagaraha hehegitigi.

⁴³Na enoni hato ki tuguhira ga têtê viteana tare. Nga noga ngaia getea ma kani girara i hagagatagatania na pepa na gavumane suria na agua hagenani. Ngaia ki oto tanga i tuguni renia na aruha rotorotoaga memera i araria na maneraha, henia na mahe na golo igê na gaparana.

⁴⁴I mareha rârâ ta na enoni, naka ma i mane ni hagarahenga se i enoni purua, ngaia ki pe oto tanga, vige taruhi kasia na anima na tarani ngegana, se vige urusia na anima na bonasiha iana o Simone, se vige uni renia na hekarigiana suria na agua, se vige tuguni renia na aruha rotorotoaga memera henia na mahe na golo igê na gaparana.

⁴⁵Na enoni, i haritohegi se i pe hanitasigi na ramata ngegana, ki girara i totongo.

⁴⁶Na enoni hato ka heaganari, ka hagatarêngenia na ramoha tanga o Simone, hanana i marungira surigi na ramata ngegana.

⁴⁷O Simone ki aganarira ma ki vora na mane ni vogasiha iata i teha, ki mane ni bêngenira na mane ni me hato, ki marungira na Siu ma na mane ni hagaotonga iata.”

⁴⁸Ngaira ka haribona, viga tari ka segegi so na tamasinga hato ngegana igê na bahitani na kapa ma ka nakanaka mave i rarona na para rihia na ruma ni rotu.

⁴⁹Ngaira ka haribona nikâ, viga nakagi nikâ ta bahitani na kapa ngegana igê na kiboru ni ruruguha i ruma ni rotu tangara o Simone mo karena.