Read Kahua 1 MAKABEO 2 Bible Online

1 MAKABEO 2 - Kahua bible

1 MAKABEO 2

¹I na matena ngekana o Matatia ki aharaga tenia i Jerusaleme ma ki râ ki oga i Moteini. Ngaia ki na mane ni vogasiha tenia na hagosi ninuni iana o Joiaribi. O vaemana ka no Joane mo virana ka no Simeone.

²O Matatia ki aparara o karena gi rima: o Joane ga hêtana nikâ vi o Gati,

³o Simone ga hêtana nikâ vi o Tasi,

⁴o Juta ga hêtana nikâ vi o Makabeo,

⁵o Eleasare ga hêtana nikâ vi o Avarane, mo Jonatane ga hêtana nikâ vi o Apuse.

⁶Matena o Matatia ki bâsigi na eraha ma na tasi ga akê me i Jutea ma i Jerusaleme,

⁷ngaia ki vi: “Gê gahanita ma kanigê vora me kê bâsigi na tarani erataga ngegana? Ngaira ka tê erasira ngavê na kariaku ma ka hagaerasia ngavê na hinua apuna. I hega, i tuguhiê vari vigê gâga purua vikê ma ki bara tangê vi ve katoa rârâ ta na marâ, matena na merongaka ka ogasia na hinua tenigia ma na ai mahuara ka rêa na ruma ni rotu?

⁸Na ruma ni rotu ki manga na ataka mavê na mane.

⁹Ga bani rurugugi na apira ma na kâkâ ni hagarahanega. Ka bani mutera na kareka igê na tara i hinua. Na merongaka ka bani ahurara na mane na gapu haoru iaka.

¹⁰Na ai mahuara suria na maveta hagenani ka parênia na hinua ma ka rurugu tenia.

¹¹Na ara ni mahe hato ka bani hasuigi râ. I ngekê ngaia ki na kare rakuraku, i mareha vige asitatara.

¹²Bâsia, na ruma ni rotu ga ageagesia, i nago ki bâkoro ngavê ma i ngekê ki mareha. Na ahuroto ka hagaerasia ngavê.

¹³Igia ka mauri mênga tanga na ta?”

¹⁴O Matatia mo karena ki rugu ngavê na obata. Ngaira ka tarisigi na tuguni iata, ka hagesuru kakaga ma ka ama ni angiangi maramara nga.

¹⁵Ma hemuri na kariana na maneraha ga tugurira na enoni ka murisigea God, ngaira ka ata i hinua i Moteini, hanana ga tugurira na enoni igê ka vogasira na ataro.

¹⁶Na Isiraelita rako ka hakurira ma o Matatia mo karena ka ura tarege râ.

¹⁷Tahema na kariana na maneraha ka vi tanga o Matatia, ka vi: “Igo ka na mane ga hagahigasigo na enoni i hinua ikê. O karemu ma na goamu ka pane henigo ma ka tamanigo.

¹⁸Igo ki ararigo vigu hagenago ku râ suria na bonasiha iana na maneraha. Na enoni hato ga pe Siu, na ai ni Jutea ma na enoni hato ga hita i Jerusaleme ka bani kato vikana. Gu kato vikana nogamu! Manga ngekana igo mo karemu kamu page voravora re na tamana koro na maneraha. Ngaia ki page kasigamu akê ma ki page vategamu na siliva, na golo ma na mahatanga rako.”

¹⁹O Matatia ki arami raha, ki vi: “Henaka vi na enoni hato ga pe Siu surigi na agua hato i marungigi na maneraha ka têtê viteana ma ka râ suria na bonasiha iana ka kasia râ na rotu iata na êvarita, hoi, ma igami ki asa ngavê.

²⁰O kareku, ma na goaku menê kami ama ni taua gatagata nga na suruheri iana God henira na êvarimami.

²¹God ki tamanigami, hanana siana kami kasia na buka ni ramata iana se vigami aharê igê na ramata iana.

²²Igami ki asa vigami aganaria na bonasiha iana na maneraha, ma kami usi hagetage, vigami urusia ta na marâ igê na rotu iamami, henaka vi na kere marâ sisite ngavê.”

²³Matena o Matatia ki kahu tamasi hato, ma ta na Siu ni Moteini ki akê i maata na enoni hato, hanana vi vogasia na ataro igê na bea ni vogasiha i ngekana suria na bonasiha iana na maneraha.

²⁴Matena o Matatia ki bâsia vikana, ngaia ki mangariaga ngavê ma ki hagahurasia na mangariaganiha iana. Ngaia ki tagira na apena ma ki gaha râ ki rete nguria na mane igê nga na bea ni vogasiha.

²⁵Ngaia ki mutea nikâ na kariana na maneraha i tugurira na enoni ka vogasia na ataro ma ki hogea na bea ni vogasiha.

²⁶O Matatia ki hagabângenia igê na tarana ngekana, vi ngaia ki hagahigasigi ngavê na ramata iana God. Vikana ngaia ki manga o Pinegasi i nahuia ki me o Simiri karena o Salumu.

²⁷Hemuri o Matatia ki ngere ki râhia na hinua, ki vi: “Ti na enoni i totosuria na suruheri iana God ma ki marupegi na ramata iana, ge takuê!”

²⁸Matena i tamasi hato, ngaia mo karena ka gava tangagi na hungani ma ka panigi so na nahuninga hato iata.

²⁹Igê nikâ na matena ngekana na Isiraelita rako ga obania viga hagakoro obana God ma ka marupegi na ramata iana, ngaira ka aharaga ma ka râ ka oga igê na bagamasusu raha, suria na hagamamasiaganiha raha ki tarahura. Ngaira ka merarâ na kareta, na gete iata ma na togoha iata.

³⁰

³¹Na rongoha ki tarahura na kariana na maneraha ma na mane ni me iana ga oga igê na ruma ni para nganganihaga i Jerusaleme, vi tani na enoni ka haritohea na bonasiha iana na maneraha ma ka râ ka ahi igê na bagamasusu raha.

³²Na mane ni me gahu ka râ surira ma ka tarahura, ka tênga i avorata ma ka nanê viga taharira igê na tangiana ni mamaroha.

³³Ngaira ka ngirira na Siu, ka vi: “Mu hato vikana, ki arari noga! Mu ura mave me! Mu tê viteana na maneraha, i era ma kami mutegamu.”

³⁴Ngaira ka arami, ka vi: “I asa vigami hura mave vê! I asa vigami tê viteana na maneraha. I asa vigami aharêngia na tangiana ni mamaroha.”

³⁵Na mane ni me ka taharira ototo rânga.

³⁶Na Siu ka nakara mavê. Ngaira ka pe arihate rârâ na hê se vige hagapusigi na maani na vaba ga ahiahi igê.

³⁷Ngaira ka vi ma: “Igami kami nanê ma vigami meme, suria na aitangihamami ka matarotaro i maana God. God ma na enoni ka girara, vi i pe oto tangagamu vigamu kamu mutegami.”

³⁸Ngekana na merongata ka taharira igê na tangiana ni mamaroha ma ka mutera na mane henira na gete iata ma na kareta ma na togoha iata. Na rehagaro na enoni kaniga me.

³⁹Matena o Matatia ma na kariana ka rongo vikana, ngaira ka angi maramara.

⁴⁰Ngaira ka hetamatamasi so mareta, ka vi: “Manga vi igia hato ma ka katokato mangara na goaku na Siu ngegana ma ka usi vige meraheariha bê aporo na ani ga pe Siu, hanana viga roherohe pusigia mareka ma pusia na rotu iaka, manga ngekana ngaira ka page hagamagahurugia ngavê tenia na maveta.”

⁴¹Igê nga na tangiana ngekana ngaira ka kato viga roherohe pusira mareta, manga vi na merongata ma ka taharira igê na tangiana ni mamaroha, hanana siana ngaira hato ka meme mangara na goata na Siu ga bani me igê na vaba.

⁴²Igê na matena ngekana na haku na Siu ga rotu bâkoro ma ka henahu pusia na agua iata, ngaira ka hakunira o Matatia ma na tamana. Na Siu ngegana ka na Isiraelita ga ramo ngavê ma ki asa vige magu. Ngaira ka bani nakara mareta, hanana viga roherohe pusigi na ramata igê na buka apuna.

⁴³Ma nikâ na ara ni enoni hato ga gavatenia na hagamamasiaganiha ka hakunira ma ka hagarakonira.

⁴⁴Ngaira ka vora na ruruha raha na mane ni me. Ngaira ka hagahurasigi na mangariaganiha iata, ka taharira na Siu ga bani kasia na rotu. Na ani ga tahi, ka gava ka ruku i pasita na enoni ga pe Siu.

⁴⁵O Matatia ma na kariana ka râhia i Isiraele hagenani, ka hogegi na bea ni vogasiha ni ataro,

⁴⁶ma ka retegi na gavoni na varata na ara ni kere mane ga tarahura, henaka ga pe obania.

⁴⁷Ngaira ka tarigenira vê na mane ahuroto, ga paroparo ma ka obania viga hagamagahurugi na ramata iana God. O Matatia ma na kariana ka akê me bâkoro.

⁴⁸Ngaira ka hagatahigi na ramata iana o Moise tenia na raramohata na enoni ahuroto ma tenira na gavumane iata, ma ka katoa ki mameaga na raramohana o Antioko na maneraha erataga.

⁴⁹Matena o Matatia ki girara so, vi ngaia ki sugi meme, ngaia ki vi tangara o karena, ki vi: “Igia ka oga igê na mateni ni perenganiha ma ni anumanumaha. Na enoni ga paroparo ka akê me ma ka hagavora na mangariaganiha raha.

⁵⁰Ma igamu o kareku, ki tuguhigamu, vigamu marupegi maninga na ramata iana o Moise ma kamu aganaria na mera, hanana mu roherohe pusia na suruheri iana God henira na êvarika.

⁵¹Mu takusigi na tauhata na êvarika igê na matena iata hehegitigi. Ngaira ka akê me bâkoro igê na tagaraha raha. Mu amaka surira. Vikana ki page akê me na apanena iami ma ki page rongo raha tare na atami.

⁵²Mu takusia o Abarahamo. Ngaia ki hagêguritogo renia na Araha i uhungia. Na Araha ki obakoro tanga. Ngaia ki totosuria na Araha. Tahema God ki aganaria vi ngaia ka na mane koro.

⁵³Mu takusia o Josepo. Igê na mamasiaganiha iana ngaia ki ama ni tê viteana nga God. Tahema ngaia ki vora re na maneraha i Esipito.

⁵⁴Mu takusia na êvarika o Pinegasi. Ngaia ki tagara bâraha tanga na rotu. Tahema God ki surua tanga vi na raraha iana ka mane ni vogasiha tare.

⁵⁵Mu takusia o Josua. Ngaia ki vora re na mane ni hagaotonga i Isiraele, suria i râ suria na bonasiha iana o Moise.

⁵⁶Mu takusia o Kalebe. Ngaia ki aporo me henia na morana na rongoha tanga na hakuta na Isiraelita. Tahema ngaia ki nahunia ta apanena na agua.

⁵⁷Mu takusia o Tavite. Ngaia ki vora re na maneraha. God ki surua tanga, vi na raraha iana ka maneraha tare, suria ngaia ki totosuria tare God.

⁵⁸Mu takusia o Elia. Ngaia ki hagahigasigi ngavê na ramata. Tahema God ki torea akê i pasina.

⁵⁹Mu takusira o Ganania, o Asaria ma o Misaele. God ki hagatahira tenia na gi, suria ngaira ka hagêguritogo renia God.

⁶⁰Mu takusia o Taniele. Ngaia ki matarotaro tare i maana God. Tahema na Araha ki hagatahia tenigi na harata na laione.

⁶¹Mu amaka suria na ara ni hitangita na êvarika ngegana ma kamu kahu tahetara, vi na enoni i hagêguritogo renia na Araha, ngaia ki ama ni togeaga nga.

⁶²Siana kamu magutenira na enoni erataga, ga hagamakukugamu. Ngaira ka page meme. Na bâkorohata ka page kakaga ma ka mamaga igê na maniae.

⁶³I ngekê ngaira ka maneraha, ma i gomaha ngaira ka page magahuru. Na apeta ka page vora aporo re na mako ma na harikatoha iata ka page hatohato râ.

⁶⁴Ma igamu o kareku, mu rêra gatagata ma kamu ramoramo, hanana mu roherohe pusigi na ramata iana o Moise. Vikana igamu kamu page nahunia na memi i raha teha ngavê.

⁶⁵O goami o Simone ngaia ki na mane i takotako mataha. Tahema mu têtê viteana tare. Mu naka ki manga o vaemami urusiê inê.

⁶⁶O Juta Makabeo ki na mane ni me ramo, haganega tenia i sisite. Ngaia ki page bêngenigamu igê na hearihatani pusira na merongami.

⁶⁷Mu unira haku me ngaira hato ga marupegi na ramata iana God, ka hakunigamu. Ngekana igamu kamu girara mu naka na siva tangara na merongaka ga erasira na Siu.

⁶⁸Mu hagaitangira na enoni ahuroto surigi na bagatauhata tangagia. Ma kamu taugi gatagata nga igamu na ramata iana God.”

⁶⁹Hato vikana ma o Matatia ki nungia God hanana vi korokoro tangara o karena ma ki kahu me.

⁷⁰Ngaira ka bagia igê na matahu iata i Moteini. Na Isiraelita hato ka angi maramara renia. Na tarana ngekana ki akê me igê na harisi 146.