Read Kahua 1 MAKABEO 3 Bible Online

1 MAKABEO 3 - Kahua bible

1 MAKABEO 3

¹O Juta Makabeo ki urusia o Matatia o vaemana.

²O goana hato ma na kariana hato o vaemana ka tamania ma ka henganingani viga meraheariha na merongata pusia i Isiraele.

³O Juta ki katoa ki rongo raha na atata na Isiraelita. Ngaia ki manga na mane i bagararaha ma ki ramo ma ki tuguni renia na tuguni na kapa ni hearihatana. Ngaia ki tangaru ma ki râ ki meraheariha na merongana. Ngaia ki urapusia na tênga iata na kariana renia na tatapa borahu iana marena.

⁴Ngaia ki manga na laione i garagara. Ngaia ki ngurunguru, matena i gahasia na ganiana.

⁵O Juta ki garira, ki tarahura ma ki tarigenira na enoni hato ga aharê igê na ramata, ma ki sungira na enoni hato ga hagamamasiagara na kariana.

⁶Na enoni ga pe botage renigi na ramata ka nahuira na maguha renia. Ngaira ka bubununuga ngavê ma ka tako tugupu. Ngaira ki bêngenira na enoni igê na tara tanga na tahinga.

⁷Ngaia ki hagamamasiagara ngavê rako na maneraha ma ki hagageagesira na Isiraelita. Na Isiraelita ka page hagarahasia tare ki bê ki arâ surigi na tauhana.

⁸Ngaia ki râ surigi na hinua i Jutea ma ki mutera na enoni hato ga pe botage renia God. Vikana ngaia ki hagaharoa na mangariaganiha iana God tenira na Isiraelita.

⁹Ngaia ki rongo raha na atana i maveta hagenani. Ngaia ki hagahakura na ani ga haga ni me ka tahi.

¹⁰Hoita, o Apolonio ki hakura na mane ni me ahuroto henira rako na mane ni me tenia i Samaria, hanana ga taharira na Isiraelita.

¹¹Matena o Juta ki rongo vikana, ngaia ki râ ki meraheariha. Ngaia ki teharira ma ki nahu hunia o Apolonio. Rako na mane ni me ahuroto ka me, ma na ani ga tahi ka gava.

¹²Na Siu ka rêgi na tangaruha iata na merongata. O Juta ki torea na tatapa borahu iana o Apolonio ma ki heariha renia rârâ mataro me ki me.

¹³O Serone i bêngenira na mane ni me ni Siria, ki rongo, vi o Juta ki bani hakura na mane ni me, ga marupegi na ramata iana God ma ka manisingenia na hearihatana.

¹⁴O Serone ki tako, ki vi: “Hoi, na matena koro tangê gê katoa na ataku ki rongo raha igê surigi na agua hato i ruguhana na maneraha. Hoi, be râ be meraheariha o Juta ma na mane ni me iana ga haritohea na bonasiha i na maneraha, ma be teharira.”

¹⁵Vikana ngaia ki meheariha nikâ o Juta ma rako na mane ni me ahuroto ka râ henia, suria ngaira ka ageagesia ngavê viga tamania, hanana i hagaitangira na Isiraelita.

¹⁶Matena o Serone ki hura akê vê igê na teha ni Bete Horone, o Juta henira ta kereani na mane ni me ki râ ki meheariha.

¹⁷Matena na me iana o Juta ka bâsira me rako na mane ni me ga arâ me ka meraheariha, ngaira ka hagatea o Juta, ka vi: “Igami kami pe rako. Manga i he kanimi girara vigami meraheariha na mane ni me gahu? Ma nikâ igami kami pe ngê rârâ igê na tangiana hagenani ma ki memega na apemami!”

¹⁸O Juta ki arami, ki vi: “I pe bara vi na mane ni me pe rako vige teharira na mane ni me gahu. Tanga God ki tagenana ma: henaka vige hagatahigia renira rako na enoni se vi renira na kereani ma.

¹⁹Na mane ni me ka tehateha igê na hearihatana mareha vi suria ngaira ka rako ngavê ma suria hete na raramohana na Araha ki tamanira.

²⁰Na merongaka ka kasikasira akê mareta ma ka kitenigi na ramata iana God. Ngaira ka râ me ka megiaheariha, hanana viga rugugugi na nahuninga iaka ma ka mutera na gete iaka ma na kareka.

²¹Ma igia, igia ka roherohe pusia na mêrihaka mareka ma pusia na rotu.

²²Matena igia ka taharira, na Araha ki page metametarira i maaka. Vikana siana kamu magutenira.”

²³I tamasi hato o Juta ma ngaira na me iana ka taharira oto râ nga o Serone ma na mane ni me iana ma ka metametarira.

²⁴Ngaira ka sugarira bê vato igê na teha ni Bete Horone tanga na bena ma ka mutera na ararina na 800 na mane ni me. Na ani ga tahi ka gava tanga i Pilisitia.

²⁵Haganega tenia na matena ngekana na enoni ahuroto ma ngaira igê na tarasini ka magutenira o Juta ma na goana.

²⁶Na maneraha o Antioko ki rongo tarohana o Juta ma na enoni surigi na agua hato ka tamasia o Juta vi ma manga i he kani teha igê na hearihatani.

²⁷Matena o Antioko ki rongo vikana, ngaia ki mangariaga ngavê. Ngaia ki bonasira na mane ni me hato surigi na agua hato i ruguhana ka haku me, ka vora na hakuta raha ngavê na mane ni me.

²⁸Ngaia ki tangahia na bokesi ni haga iana ma ki vuria kasigi na ara ni hitangita na mane ni me iana araria na harisi hagenani. Ngaia ki bonasira, hanana viga nanê tare tanga na hearihatana.

²⁹Ma hemuri ngaia ki kahu tarahua vi na haga igê na bokesi ni haga iana ka hato. Na haga ka banu me igê na takesi ka pe rako manga i nago renigi perenganiha ma na hearihatani, ngaia marena i hagavoregi i maveta, suria i hagamagahurugi na ramata, ga bani oga me kerevê noga.

³⁰O Antioko ki mamahata ngavê teharira na maneraha i nago tarana, ma i ngekê ngaia ki nahuia na takoha, vi i bara tanga vari, vige ama ni katokato nga vikana, se vige abubu na haga, hanana vige hagatagarahigi. Na tarana ngekana ki bani akê me haritamani i nago.

³¹Ngaia ki anumanuma ki rârâ ma ki tako vi arâ i Pesia, tanga vi totora takesi i na apaneni ngegana, hanana vi nahuni rako na haga.

³²Ngaia ki atea o Lisiasi ma ki hagatora ki marungia urusia na apanena hagenani i berarogaterua na ve i Uparatesi ma na pereperegana i Esipito. O Lisiasi ki na mane i nahuni ramoha ma ki na goana râ ma na maneraha.

³³Na maneraha ki kasia nikâ o Lisiasi ki marupea o Antioko na rimata o karena mataro me na matena ngaia marena i aporo me igê.

³⁴Ngaia ki kasia o Lisiasi ki bêngenia na apapana na mane ni me iana henira na elepante hato. Ngaia ki tamasigi tanga na ara ni marâ i obanigi ma ngaia nga ka na tarana renira na enoni i Jutea ma i Jerusaleme.

³⁵Ngaia ki bonasia o Lisiasi, ki hagatorangenira na mane ni me ka meraheariha na Siu. Ma ngaira nga ka na Siu i Jerusaleme, hanana vi hatungira ma ki mutera ngavê, hanana ga hitenira ngavê.

³⁶Ngaia ki bonasia, hanana vi parênia na mako iata ma ki haganahunira na mahuara renia, hanana ga hinâtaga igê.

³⁷Igê na harisi 147 na maneraha ki bêngenira hura tenia i Antioko na hinua raha iana ta apapana na mane ni me iana. Ngaia ki tarêhia na ve i Uparatesi ma ki aharêvoro i Mesopotamia.

³⁸O Lisiasi ki atera o Nikanore, o Sosiasi mo Potolemeo karena o Torimenesi, hanana ga bêngenira na mane ni me. Ngaira gi oru ngegana ka manisingenia na hearihatana ma ka na kariana koro na maneraha.

³⁹Ngaia ki bonasira ka bêngenira na 40.000 na mane ni me ga tavo uga ma na 7000 na mane ni me igê na hosi ma ka taharia i Jutea ma ka ruhuruhua, manga hanana na maneraha i bani haribona.

⁴⁰Hoi, ngaira ka bêngenira hura na mane ni me hato ma na matena ga ata râ igê na bena hagarangia i Emausi, ngaira ka tênga igê.

⁴¹Na mane ni me ni Itumea ma ni Pilisitia ka hakunira. Na enoni ni hagavaraha haga i na apanena ngekana ka rongo vi na mane ni me gahu ka oga i ngekana. Ngaira ka migirâ me na seni ma rako na haga tanga na tênga, hanana ga vurira tani na Siu ka voravora re na kare vurivuri iata.

⁴²O Juta ma o veogana ka kahu tahetara, vi na bagabevoana i tarahura, ki erataga ngavê teharia i nago, suria na mane ni me gahu tenigi na agua getigi ka tênga igê na apanena iata na Siu. Ngaira ka kahu tarahua nikâ, vi na maneraha ki bani bonasira na mane ni me iana ka hagamagahurura ngavê na Siu.

⁴³Vikana ngaira ka heguniguni, ka vi: “Nika, ge urapusira, hanana siana ka hagamagahurugia. Ge urabarasigi na apanena iaka ma na ruma ni rotu.”

⁴⁴Ngaira ka unihakura na enoni hato, hanana ga hagarêa na hearihatana ma ka nungia God ki takira ma ki tamanira.

⁴⁵Jerusaleme ki bagubaguruga. I mareha rârâ ta na avanuni hinua vige taratarari rârâ igê. Na ai ni mahuara ka hagaerasia ngavê na ruma ni rotu. Na enoni ga pe Siu, na ai ni mahuara, ka ogasia na hinua iana o Tavite. Na vagevageha ki mareha rârâ i pasita na Isiraelita. Ga hato vê na kiha ma na êhihi.

⁴⁶I murina o Juta ma na kariana ka haku, ngaira ka râ i Misipa i avorana i Jerusaleme, suria i nago i Misipa ki oga igê na agua ni hagarahenga.

⁴⁷Suria i rugu na obata, tahema ngaira ka hari suria na tangiana hagenani ngekana, ka hagesuru kakaga, ka kuhuigi na bêta renigi na rahu ma ka tarisigi na tuguni iata.

⁴⁸Manga vi na ahuroto kani ngaira, vikê ngaira ke gari giraraha so tenira na harasita mareta. Ma na Isiraelita hete kani ngaira. Tahema ngaira ka gasia na buka ni ramata, hanana ga garigi na tamasinga ni hagaotonga iana God igê.

⁴⁹Ngaira ka bani migirâ me na tuguni iata na mane ni vogasiha, na nagoni na mu ma na tangahuruta tenigi na nahuninga iata. Ngaira ka bani unira me na Nasirita, ga hatungigi noga na suruha iata.

⁵⁰Ngaira hato na enoni ka nunginungi, ka vi: “Araha, mi katogi bâ hega ka na marâ ngegini? Mi totora râ i he,

⁵¹suria na ai ni ahuroto ka banu igê na ruma ni rotu iamu ka hagaerasia ngavê, ka hagamakira na mane ni vogasiha iamu ma ka hagaera obata.

⁵²Na ai ni ahuroto ka râ me ka taharigami ma ka mutegami ngavê. Igo ko bani girara na katoha iata!

⁵³Manga go pe tamanigami, hoi, manga i he kani vigami girara mi teharira?”

⁵⁴Hato vikana ma ngaira ka uhigi na ahuri ma ka ngerengere raha ngavê.

⁵⁵Hemuri o Juta ki voasira na kariana igê na apaneni me hegitigi: tani ka 10, tani ka 50, tani ka 100 ma tani ka 1000. Ngaia ki nakara na mane ka bêngenigi hegitigi na ara ni apaneni me.

⁵⁶Surigi na ramata ngaia ki hagaguhira aporo na ani ga kahu êragi haoru, se ga kahu totora ruma ma, se ga kahu hasihasi ma na pariki ni waini, henira na ani ga magu.

⁵⁷Hoita, na mane ni me ka tavo uga ma ka tênga i Emausi i na apanena râ tanga i Negeve.

⁵⁸O Juta ki vi tangara, ki vi: “Mu nanê tanga na hearihatana. Mu ramoramo! I gomaha, igê na mavorarotana, mu nanê igê, hanana mu meraheariha na ai ni ahuroto ngegana, ga haku tangagia, hanana viga taharigia, ka mutegia ngavê ma ka ruhuruhua na ruma ni rotu iaka.

⁵⁹I tuguhigia viga meme igê na hearihatana, i era ma ka ngani ma ka gâga, ma ka bâsira ga mutera na goaka ma ka ruhuruhua na ruma ni rotu iaka.

⁶⁰Na obaniha iana God ki page akê me!”