Read Kahua 1 MAKABEO 4 Bible Online

1 MAKABEO 4 - Kahua bible

1 MAKABEO 4

¹O Sosiasi ki merarâ na 5000 na mane ni me ga tavo uga, ma na 1000 na mane ni me igê na hosi, ga manisingenia ngavê na hearihatana. Ngaira ka hura tenia na tênga suria na bungiana.

²Tani na mane ni me tenia na ruma ni para nganganiha i Jerusaleme kaniga hagararia na tara tangara. O Sosiasi ki kato vi taharira hagakangira na mane ni me na Siu.

³O Juta ki rongoa na katoha ngekana. Tahema ngaia ki merahura na mane ni me iana, hanana i taharira na mane ni me iana na maneraha i Emausi,

⁴matena o Sosiasi ma na mane ni me iana ka mamêngara me tanga na tênga.

⁵Matena o Sosiasi ma na mane ni me iana ka ata râ igê na tênga iana o Juta igê na bungiana ngekana, ngaira ka tarahua vi baguru. Ngaira ka takusia ma, vi o Juta ma na me iana ka bani gava. Tahema ngaira ka bâbâ renira igê na hungani.

⁶Matena i kakahuga na tangiana o Juta henira na 3000 na mane ni me ka ata râ igê na bena. Ngaira ka pe tangaru bâkoro.

⁷Ngaira ka bâsira râ na mane ni me gahu ngavê iata na ahuroto. Ngaira ka manisingenia na hearihatana. Na tênga iata ki tonga renia na para rihia ma na mane ni me igê na hosi ka ura rihia.

⁸Tahema o Juta ki vi tangara na me iana, ki vi: “Siana kamu magutenira viga gahu teha ngavê. Siana kamu kokoke, matena ga taharigia.

⁹Mu takusira aporo na êvarika. Ngaira ka tahi igê na Asi Memera, matena na maneraha i Esipito henira na mane ni me iana ga tarigenira.

¹⁰Hoita, ge avarasia na Araha ke takigia. Ge nungia, hanana ngaia ke hagamonaria na suruheri iana henira na êvarika ma ke mutera i ngekê nga na mane ni me ngegana, matena igia ka taharira.

¹¹Vikana na enoni ahuroto hato ka kahu tahetara, vi God ki hagatahira na Isiraelita ka asitatara.

¹²Matena na ahuroto ka bâsira râ o Juta ma na mane ni me iana ga râ me viga taharira,

¹³ngaira ka hura tenia na tênga iata, hanana viga meraheariha. O Juta ma na me iana ka uhigi na ahuri ni hearihatana,

¹⁴ma ka taharira. Ngaira ka teharira na ahuroto ma na ahuroto ka gava tanga na bena.

¹⁵Na Isiraelita ka ahurara ngaira hato ga babeaga re tangoha. Na Isiraelita ka tarigenira na merongata rârâ ma ka tariha i Gesere i bena i Itumea ma i hinua i Asoto ma i Jaminia. Ngaira ka mutera na ararina na 3000 na merongata.

¹⁶I murina o Juta ma na mane ni me iana ga hetari hato ka aporo,

¹⁷ngaia ki vi tangara na mane ni me iana, ki vi: “Siana kamu gahasia vigamu rurugu, suria i sugi akê me ta na hearihatana nikâ.

¹⁸O Sosiasi ma na mane ni me iana ka hagarangi me igê na hungani. Mu meramatohetanga nga ma kamu meraheariha. I murina ngekana igamu kamu girara mu kahu rurugu barebare.”

¹⁹Matena o Juta ki tamasi hato râ vikana ma ta na apaneni me na merongata ka bâ pirira bê vato tenigi na hungani.

²⁰Ngaira ka tahetara, vi na tamata na mane ni me ka bani gava ma vi na tênga iata ki noro, suria ga bâsia na roborobona.

²¹Matena ga bâ vikana, ngaira ka magu ngavê. Ma na matena ga bâsira râ nikâ na mane ni me iana o Juta igê na bena, ga bani nanê ni hearihatana,

²²ngaira ka gava tanga i Pilisitia.

²³Hemuri o Juta ki aporo tanga na tênga iata na merongana ma ki rurugu igê. Ngaia ki rurugugi rako na golo ma na siliva, na gahu maramarava ma na gahu rotorotoaga memera ma ka rako nikâ na ani getigi na marâ i raha na meni.

²⁴Matena na Siu ka aporo tanga na tênga iata, ngaira ka kiria na Araha, ka vi: “I arari ge hagarahasia na Araha. Ngaia ki koro ma na hetakiha iana i asa vige page hato.”

²⁵Igê na tangiana ngekana na Araha ki katora na Isiraelita ka tahi ma ka teha.

²⁶Na mane ni me iata na ahuroto ga bani gava ka tahi, ngaira ka râ i pasina o Lisiasi ma ka hagarongoa renigi na tarani hato ga bani akê me.

²⁷Matena o Lisiasi ki rongo, vi na mane ni me iana ka so igê na hearihatana, ngaia ki anumanuma ma ki era na obana, suria na mane ni me iana ka pe teharira na Siu, manga i bani haribona na maneraha.

²⁸Igê na harisi i murina ngekana o Lisiasi ki hagahakura na 60.000 na mane ni me ga tavo uga ma ka manisingenia na hearihatana, henira na 5000 na mane ni me igê na hosi. Ngaia ki kato vi têtê erasira ngavê na Siu.

²⁹Ngaira ka tavo uga banu i Itumea ma ka tênga i Betesuri. O Juta ki râ me vurusira henira na 10.000 na mane ni me.

³⁰Matena o Juta ki bâsira na merongana ga gahu ma ka ramo, ngaia ki nungi, ki vi: “Igami kami hagarahasigo, Araha, suria go hagatahigami tare na Isiraelita. Igo ko tamania o Tavite ki teharia o Goliate na mane ramo teha ngavê. Igo ko tamanirerua o Jonatane karena o Saulo ma na mane haoru i toregi na tangaruha karu teharira na mane ni me hato ni Pilisitia.

³¹Hoi, gu katogami nogamami na kariamu na Isiraelita, kami teharira na merongamami. Gu hagamakira, suria ngaira ka tongesurira so mareta renira na mane ni me ga tavo uga ma na mane ni me igê na hosi.

³²Gu hagamagusira. Gu katora ke bagahagêguri ma ke rumakaka renia na hearihatana, suria ga girara vi ngaira ka page soso.

³³Igami kami takuigo ma kami rahesigo. Gu tamanigami, kami mutera na merongamami, hanana na enoni hato ga tongesurigo, ka hagarahasigo.”

³⁴Na hearihatana ki haganega: na mane ma na mane. Na ararina na 5000 na mane ni me iana o Lisiasi ka me.

³⁵Matena o Lisiasi ki tahetara vi na mane ni me iana ka so ma ki bâsia vi o Juta ma na mane ni me iana ka ramo ngavê ma ka togeaga viga mauri se viga meme manga i marisita vi ngaira na mane ni me, ngaia ki aporo tanga i Antioko. Ma i ngekana ngaia ki garira haku me igê rako na mane ni me teharia i nago, suria i kato vi taharia nikâ i Jutea i ta na matena.

³⁶O hegoata o Juta ka vi: “Na merongaka ka so renigia. Hoi, ge râ i Jerusaleme ma ke maningaia na ruma ni rotu ma ke hagapunaria aporo.”

³⁷Ngekana na mane ni me hato ka râ me haku ma ka akê i hungana i Sione.

³⁸Ngaira ka tarahua, vi na ruma ni rotu ki hihiruga. Na bea ni vogasiha ki hato vige apuna renia na vogasiha ni ataro. Na maana na tarâto tanga na ruma ni rotu ka makaka. Na mahera na ruma ni rotu ki masigu ngavê manga na vapuna, ma na kiboru iata na mane ni vogasiha ka ahogehoge.

³⁹Ngaira ka tarisigi na tuguni iata, suria i rugu na obata. Ngaira ka angiangi raha ma ka kuhuigi na bêta renigi na rahu.

⁴⁰Ngaira ka aihu ka abahigi so na maata i ano. Matena ga angi na ahuri, ngaira hato ka haganega na avarasia na Araha.

⁴¹Hemuri o Juta ki bonasira tani na mane ni me iana ka rêrapusira na merongata i rarona na ruma ni para nganganiha, matena ngaia i maningaia na ruma ni rotu.

⁴²Ngaia ki atera tani na mane ni vogasiha, ga matarotaro ma ka hagahigasigi na ramata.

⁴³Ngaira ka maningaia na ruma ni rotu. Ngaira ka tavogi râ na hê, ga bani erasigi renigi na vogasiha ni ataro ma ka kasigi igê na agua i mamêkuga.

⁴⁴Ngaira ka heriri renia na bea ni vogasiha na ahuroto ka bani erasia renia na vogasiha ni ataro.

⁴⁵Ngaira ka kato viga hogea, hanana vi siana ki gâga ki hagamakira i muri me. Tahema ngaira ka hogea,

⁴⁶ma ka nakagi na hê igê na agua igê na hungana ni ruma ni rotu, na agua i ararigi hanana vi ga gâga igê mataro me ki page rêra ta na poropete ma ki page visia vi na ta renigi.

⁴⁷Hemuri ngaira ka tora me na hê ga pe maningaigi ka arari. Surigi na ramata iana o Moise ngaira ka tagarahia na bea ni vogasiha haoru i maratorana na bani ani.

⁴⁸Ngaira ka tagarahia aporo na ruma ni rotu, i rarona ma i metara, ma ka maningaigi na mahera na ruma ni rotu.

⁴⁹Ngaira ka tagarahigi na ani haoru na apira ma na kâkâ ma na marâ vigana tanga na hagarahenga. Ngaira ka nakagi i ruma ni rotu na atohana na laiti, na bea tanga ga sungigi igê na marâ i sigini koro ma na bea tange na bereti.

⁵⁰Ngaira ka sungigi na marâ i sigini koro igê na bea, ma ka tangagi na laiti igê na atohana na laiti, hanana i mave na ruma ni rotu.

⁵¹Ngaira ka nakagi na guani na bereti igê na bea, ka kuharenigi na gahu ma ka hatungigi na tagaraha hato iata.

⁵²Igê na mahogotana na tangahuruta gi rua matare rima na tangiana igê na sivata na hageha, na hageha Keseleve, igê na harisi 148,

⁵³ngaira ka vogasi surigi na ramata iana o Moise igê na bea haoru ni vogasiha ga kahu tagarahia.

⁵⁴Na tangiana nga ngekana ka na tangiana na ahuroto ka erasia igê na bani bea ni vogasiha. Ngaira ka hagapunaria na bea haoru ni vogasiha ngekana, matena ga kirigi na ki, ka tarugigi na gita ma na ukelele ma ka tahutahuru.

⁵⁵Na enoni hato ka susure ma ka tubê so ka puru i ano. Ngaira ka rahesia ma ka hagarahasia na Araha, suria i katora ka akê me bâkoro igê na tagaraha hato iata.

⁵⁶Ngaira ka hagarahasia na hagapuana aporo na bea ni vogasiha surigi na tangiani gi varu. Ngaira ka vagevage bâraha, matena ga susu, ka tagarenigi tanga God na ngêra na ngêhaku ma na votovoto tanga ga visia koro na Araha renigi.

⁵⁷Ngaira ka hagamahea na maana na ruma ni rotu renigi na golo na tarepuri ma na bêata. Ngaira ka tagarahigi aporo na tarâto ma na kiboru iata na mane ni vogasiha ma ka nakagi na maani ruma igê.

⁵⁸Na Siu ka vagevage bâraha, suria na makiha na enoni ahuroto ga katoa tangara, ki hato.

⁵⁹O hegoata o Juta ma na Isiraelita hato ka naka na ramata, viga hagahigasia na hagapuana aporo na bea ni vogasiha igê na ara ni harisi igê nga na tangiana ngekana, haganega henia na tangahuruta gi rua matara gi rima na tangiana igê na hageha na Kisileve. Ngaira ka naka na ramata viga vagevage ma ka ageage surigi na tangiani ge varu.

⁶⁰Hemuri ngaira ka tagarahigi na para ga akê era ma na bebetehe nganganihaga rihia na hungana i Sione, hanana vi siana na enoni ahuroto ka bêbanu me nikâ i ruma ni rotu ma ka hagaerasia.

⁶¹O Juta ki nakara ta apaneni na mane ni me i ngekana, hanana ga anumasia na ruma ni rotu. Ngaia ki pararihia nikâ na hinua i Betesure, hanana na Isiraelita ka nahunia na hinua ni para nganganihaga i maatia i Itumea.