Read Kahua 1 MAKABEO 5 Bible Online

1 MAKABEO 5 - Kahua bible

1 MAKABEO 5

¹Matena na ahuroto igê na agua hagarangi ka rongo, vi na Siu ka bani tagarahirerua na bea ni vogasiha ma na ruma ni rotu, karu bâ manga i nago, ngaira ka mangariaga ngavê.

²Tahema ngaira ka kato, viga mutera na Siu hato ga oga i berarogata. Ngekana ngaira ka haganega ka nahuira ma ka mutera na Siu.

³Na ai ni Itumea ka taharira na Isiraelita i Akarabatene. Tahema o Juta ki râ ki meraheariha. Ngaia ki nahuira ngavê ma ki rurugu tenira.

⁴Ngaia ki taharira nikâ na ai ni Baiane ga hagamakukura tare na Isiraelita, suria ngaira ka ahiahi karira ma ka gahasira na Isiraelita, ga arâ i tara i ngekana.

⁵Ngaia ki purusira na ai ni Baiane igê na hinua ni para nganganihaga iata. Ngaia ki tohe vi mutera. Ngaia ki sungigi na hinua ni para nganganihaga iata henira na ai ni Baiane hato igê.

⁶Hemuri ngaia ki taharia i Amone. I ngekana ngaia ki tarahura igê na hakuta raha na mane ni me ramo, i bêngenira o Timoti.

⁷O Juta ki meraheariha hagarako ki rârâ ma ki teharira.

⁸Ngaia ki henahuraugi i Jasere henigi na hinua hagarangia ma ki kahu aporo i Jutea.

⁹Na enoni ahuroto ni Gileata ka haku, hanana viga taharira ma ka mutera na Isiraelita ga oga i berarogata. Ma na Isiraelita ka gava tanga i Tatema na hinua na para nganganihaga.

¹⁰Ngekana ngaira ka kasia na leta tangara o hegoata o Juta, ka vi: “Na enoni ahuroto rihigami ka haku me viga mutegami. O Timoti kani bêngenira. Igami kami bani gava banu igê na hinua na para nganganihaga kami ruku igê. I ngekê ngaira ka sugi henahuraua na hinua ma ka mutegami.

¹¹

¹²Ga rako na hitangimami ga bani me. Râ me, kamu hagatahigami.

¹³Ngaira ka bani mutera na mane hato na Siu i na apanena i Tobe, ka bani henahuraura na gete iata henira na kareta ma ka bani rurugugi na nahuninga iata. Na ararina na rehagaro na mane ka bani mute.”

¹⁴Na leta ngekana ka tomania mênga, matena na ani getera na mane tora tamasinga ga ata me. Ngaira ka bani tarisigi na tuguni iata, suria i rugu na obata. Ngaira ka torea me na rongoha tenia i Galilea.

¹⁵Ngaira ka vi: “Na mane ni me tenigi i Potolemaisi, i Taire, i Sitone ma i Galilea hagenani ngaira ka haku, hanana viga mutegami.”

¹⁶Matena o Juta ma na enoni ka rongo vikana, ngaira ka katoa na hekarigiana raha, hanana viga tamanira na goata ga mamasiaga ngavê, suria na merongata ka taharira.

¹⁷O Juta ki vi tanga o Simone o veogana, ki vi: “Gu atera tani na mane ni me, kamu râ kamu hagatahira na goaka na Siu i Galilea. O vesikerua o Jonatane menê kamuru page arâ i Gileata.”

¹⁸O Juta ki panira so i Jutea na mane ni me ga pe râ, hanana ga anumasia. Ngaia ki kasirerua na meraha gi rua o Asaria mo Josepo karena o Sekaria, karu bâsurira na enoni.

¹⁹Ngaia ki bonasirerua, ki vi: “Igamurua nga kanimuru bêngenira na enoni agê. Siana kamuru arâ kamuru meraheariha na enoni ahuroto, mataro me kami aporo me.”

²⁰Hoi, na 3000 na mane ni me ka tavo uga henia o Simone tanga i Galilea, ma na 8000 na mane ni me ka tavo uga henia o Juta tanga i Gileata.

²¹O Simone ki râ i Galilea ma ki meraheariha hagarako na enoni ahuroto i ngekana ma ki kahu teharira.

²²Ngaia ki tarigenira rârâ ma ki tariha i hinua i Potolemaisi. Ngaia ki mutera na ararina na 3000 ma ki rurugu tenira.

²³Hemuri ngaia ki torera na Siu ga oga i Galilea ma i Arabata henira na gete iata ma na kareta ma henigi na nahuninga hato iata ma ki meraporo tanga i Jutea. Ngaira hato ka vagevage bâraha.

²⁴Igê na matena ngekana o Juta Makabeo mo Jonatane o vesina karu bani tarêhia na ve i Jotano ma ka bani tavo uga banu igê na bagamasusu raha surigi na tangiani gi oru.

²⁵Ngaira ka tarahura tani na Nabateo ga koro tangara ma ka hagarongora renigi na mani tarani ga tarahura na Siu i Gileata.

²⁶Ngaira ka hagarongo vi na ahuroto ka urarihira rako na Siu, ga ruku igê na hinua raha na para nganganihaga i Bosera, i Bosore, i Alema, i Gasopo, i Makete ma i Karanaimi.

²⁷Ma tani ka ruku i hinua sisite i Gileata. Ngaira ka hagarongo nikâ, ka vi: “Na merongata ka bani kato viga taharigi na hinua na para nganganihaga iata na Siu, i gomaha, suria ga obania viga mutera na Siu hato i rarona na tangiana gi tage.”

²⁸Vikana o Juta ma na mane ni me iana ka kariarigu igê na tara i na masusu tanga i Bosera. Ngaia ki henahuraua na hinua i Bosera ma ki mutera na mane hato igê. Ngaira ka rurugua na hinua ma ka hagamakaka.

²⁹Ngaira ka pania i ngekana tanga na hinua na para nganganihaga i Tatema.

³⁰Igê na kahuagana na tangiana o Juta ma na mane ni me iana ka bâsira râ na mane ni me gahu, ga taharia na hinua na para nganganihaga. Ngaira ka toregi na marara, na bea ma na bogona na apinige ni tahakurunga, hanana viga henahuraua na hinua.

³¹Matena o Juta ki rongogi na rotaha, na ngerengereha ma na ringeni na ahuri tenia na hinua, ngaia ki kahu girara, vi na hearihatana ki kahu haganega.

³²Tahema ngaia ki vi tangara na mane ni me iana, ki vi: “Meraheariha na merongaka, kamu hagatahira na goaka na Siu!”

³³Ngaia ki bonasira na mane ni me iana ka voasira ka vora gi oru ma ka râ ka haritaha i murita na merongata. Ngaira ka taharira, matena ga uhigi na ahuri ma ka nunginungi raha.

³⁴Matena na mane ni me iana o Timoti ka bâsia râ vi ngaia ka no Juta Makabeo, ngaira ka kariarigu ka gava. O Juta ki tê erasira ngavê ma ki mutera na ararina na 8000 na mane igê na tangiana ngekana.

³⁵Hemuri o Juta ki râ ki taharia na hinua i Atema. Ngaia ki henahuraua ma ki mutera hato na mane igê. Ngaia ki rurugua na hinua ma ki hagamakaka.

³⁶Hemuri ngaia ki râ nga ki henahuraugi i Gasopo, i Makete, i Bosore ma na hinua getigi i Gileata.

³⁷Hato vikana o Timoti ki garira nikâ na mane ni me ma ki tênga i avorana i Rapone i na apanena tarê na ve.

³⁸O Juta ki hagatorangenira tani na me ka râ bâbâ igê na tênga, ma ka meaporo me na rongoha tanga, ka vi: “Na enoni ahuroto hato igê na apanena ngekana ka bani pane henia o Timoti ma ka vora na mane ni me gahu.

³⁹O Timoti ki bani vatevatera nikâ na mane ni me ni Arabia, hanana viga tamania. Na me ngegana ka tênga i avorana tarê na tênga iana o Timoti ma ka nanê viga taharigo igo o Juta.” Ngekana o Juta ki râ hanana i meraheariha.

⁴⁰Matena o Juta ma na mane ni me iana ka hagarangia me noga na ve, o Juta ki vi tangara na mane ga bêngenira na mane ni me iana, ki vi: “Manga i arâ me ma ki rekereke tarê me hagenago, igia ki bara tangagia vige teharia. Igia ka page soso nga renia.

⁴¹Ma ki manga vi ngaia ma ki taunga vê i na apanena tarê, hoi, igia ka rekereke tarê, ka taharia ma ka teharia nga.”

⁴²Matena o Juta ki mataro me i na akerena na ve, ngaia ki bonasira na mane ga segegi na atata na mane ni me, ki vi: “Siana kamu naka ta na mane ni me ki gâga i na apanena ikê. Mu bonasira na ara ni mane ni me ka arâ nga tanga na hearihatana.”

⁴³O Juta ki hagenago ki tarêhia na ve ma na ara ni mane ni me hato iana ka mumuria. Na merongata ka totoko, ka kasigi râ na tangaruha iata ma ka gava tanga na ngêsu i Karanaimi.

⁴⁴O Juta ma na me iana ka henahuraua na hinua ma ka hagamakaka na ngêsu henira na enoni hato igê. Na enoni ahuroto ki bara tangara vige meheariha bê aporo o Juta, suria ga tê tara renia i Karanaimi.

⁴⁵Hemuri o Juta ki hagahakura na Siu hato ga oga i Gileata, na ani ga nahuni ramoha ma na ani purua, ma ki mera-aporo tanga i Jutea henira na gete iata ma na kareta ma henigi na nahuninga hato iata.

⁴⁶Ngaira ka ata i hinua raha i Eperone, i nahunia na para nganganihaga. I bara vige râ rihia i na anima na apanena. Tahema na tara ki banu ototo râ nga vurusia na hinua.

⁴⁷Ma na enoni i ngekana ka urapusira vige banu vurusia na hinua. Ngaira ka page na hê pusigi na maani para na hinua.

⁴⁸Ngekana o Juta ki kasia na tamasinga ni marapeha tangara, ki vi: “Mu nakagami kami banu vurusia na apanena iami, hanana mi aporo tanga i pasimami. Igami kami pe râ me tanga vigami erasigamu. Igami kami obania ma, vigami aharêvoro.” Henaka ma ngaira ka usi vige tangahigi na maani para ni hinua.

⁴⁹Ngekana o Juta ki vi tangara na ara ni Siu hato ka tênga, nga noga ma na mane ni me.

⁵⁰Ngaia ki bonasira na mane ni me ka nanê, hanana ga taharia na hinua. Ngaira ka meheariha na hinua suria na tangiana ngekana ma suria na bungiana hagenani rârâ ma ka henahuraua.

⁵¹O Juta ki mutera na mane hato ni Eperone, ki ruhuruhua na hinua ma ki hogea. Hemuri ngaia ma na mane ni me iana ka tavoraha banu vurusia na hinua. Matena ga arâ, ngaira ka purigi so na gahuata na merongata.

⁵²Ngaira ka tarêhia na ve i Jotano ka banu igê na bena raha i avorana i Betesane.

⁵³Igê na râha hagenani o Juta ki ama ni hagasura nga na enoni ga babeaga ma ki ama ni hagaramonira nga na enoni mataro me ka ata i Jutea.

⁵⁴Ngaira ka vagevage, matena ga tagere igê na hungana i Sione, hanana ga visia koro God ma ka susu tanga, suria ngaira hato ka aporo me bâkoro ma ki mareha rârâ tani vige me.

⁵⁵Matena o Juta mo Jonatane karu oga i Gileata ma o Simone o goaterua ki taharia i Potolemaisi i Galilea,

⁵⁶o Josepo mo Asaria, garu bêngenira na mane ni me i Juta, karu rongo, vi ngairerua karu ramo igê na hearihatana ma karu teha.

⁵⁷Tahema ngairerua karu hetamatamasi, karu vi: “E, nika, garu râ karu meraheariha na merongaka rihigia, hanana ge rongo raha na atakerua.”

⁵⁸Ngekana ngairerua ma na mane ni me iaterua ka taharia i Jaminia.

⁵⁹O Sosiasi ma na mane ni me iana ka hura tenia na hinua, hanana ga meraheariha.

⁶⁰Ngaira ka teharirerua o Josepo ma o Asaria ma ka tarigenirerua rârâ ma ka tariha igê na pereperegana i Jutea. Na ararina na 2000 na mane ni me na Isiraelita ka me igê na tangiana ngekana.

⁶¹Na Siu ka so igê na hearihatana, suria na mane garu bêngenira, karu obania vi rongo raha na ataterua ma karu haritohera o hegoata o Juta.

⁶²Nikâ ngairerua karu mareha vi na Makabeo God ki bani atera, hanana vi ga hagatahira na Isiraelita.

⁶³Na Isiraelita hato ma na enoni ga pe Siu ka hagahigasira ngavê o hegoata o Juta. Matena na enoni ka rongo tarohata,

⁶⁴ngaira ka râ i pasita ma ka vagevagesira.

⁶⁵Hemuri o hegoata o Juta ka râ ka meraheariha na ai ni Etome bêrâ tanga i Negeve. O Juta ki taharigi i Heberone ma na hinua hagarangia. Ngaia ki hogegi na para ni hinua i Heberone ma ki hagamakakagi na bebetehe rihia.

⁶⁶Hemuri ngaia ki tavo uga banu i Pilisitia ma ki aharêvoro i Marisa.

⁶⁷Igê na tangiana ngekana tani na mane ni vogasiha ka me igê na hearihatana, suria ga obania vi rongo raha na atata. Ngaira ka bagatatako tanga ga râ igê na hearihatana.

⁶⁸O Juta ki kariarigu ki râ tanga i Asote i Pilisitia. Ngaia ki hogegi na bea ni vogasiha ni ataro, ki hagamakakagi na nunuta na harasita, ki rugurugugi na hinua iata ma hemuri ki aporo tanga i Jutea.