Read Kahua 2 MAKABEO 1 Bible Online

2 MAKABEO 1 - Kahua bible

2 MAKABEO 1

¹“Igami na Siu i Jerusaleme me Jutea kami hagamauru koro tangagamu na goamami na Siu i Esipito. Na marapeha ke aharêsigamu.

²God ke korokoro tangagamu ma ke hagamonaria na suruheri iana henira o Abarahamo, o Isako mo Jakobo ga totosuria tare.

³Ngaia ke katogamu, kamu gunahia nga kamu rahesia ma kamu arâ surigi na obaniha iana igê na mêrihami hagenani.

⁴Ngaia ke katogamu, kamu aganarigi ma kamu aitangisigi na ramata ma na hagesuringa iana igê na buka apuna, ma ke haganahunigamu renia na marapeha.

⁵Ngaia ke aganarigi na nunginungiha iami, ke bonotenigi na tasi iami ma ke pe rumakaka renigamu igê na mateni na bagabevoani.

⁶Igami i Juta kami nungia God tangagamu.

⁷Igê na harisi 169, matena na ruata o Temeterio i maneraha i Siria, igami kami sege tangagamu vikê. ‘Na mamasiaganiha ma na bagabevoani ka tarahugami surigi na harisi i murina o Jasone i kasia râ igê na arahanga iana God henia na agua apuna.

⁸O Jasone ma na me iana ka hagamakakagi na maani para ni ruma ni rotu ma ka mutera igê na enoni ga hagakoro obana God. Igê na matena ngekana igami kami avarasia na Araha ma ngaia ki aganarigami. Igami kami susu tanga renira na ganiani, kami vogasia renigi na koni, kami tangagi na laiti i ruma ni rotu, ma kami nakagi na bereti apuna igê na atohani.’

⁹Tahema igami kami nungigamu nga, hanana mu hagarahasigi na tangiani raha ni rotu igê na hageha na Kisileve. Igami kami sege igê na harisi 188.”

¹⁰“Igami na Siu i Jerusaleme me Jutea, na hekarigiana iata na meraha mo Juta, igami kami hagamauru koro tangagamu hato: tangago igo o Arisitobulu go tenia na hagosi ninuni iata na mane ni hagarahenga ma ko mane ni hagesuringa iana na maneraha o Potolemeo, ma tangagamu hato na Siu i Esipito. Na ramana ke hagarêsigamu.

¹¹Igami kami visia koro God, suria i hagatahigami tenia na bagaperenga raha. Ngaia nga kani pane henigami tanga na maneraha.

¹²Ngaia nga kani tarigenira hura na merongamami tenia na hinua apuna.

¹³Matena na maneraha o Antioko ki ata i Pesia henira na mane ni me iana, ga bâ manga viga tehateha tare, na mane ni vogasiha ni ataro ka Nanea ka hagabekasira ma ka metametarira igê na ngêsu iana ka Nanea.

¹⁴Na maneraha o Antioko ki râ i na ngêsu henira tani na mane ni hagaotonga i takotogo renira, hanana vi auragia na ataro ngekana ma ngaia ki tenia vi nahunigi hete na ruruguha igê na ngêsu manga vi na mahatanga ni auragiha tanga.

¹⁵Na mane ni vogasiha iana na ataro ka Nanea ka nakagi mave na ruruguha igê na ngêsu. O Antioko henira tani na me iana ki banu igê, hanana vi tavogi na ruruguha. Matena i oga i rarona, na mane ni vogasiha ni ataro ka purusigi na maani ruma na ngêsu.

¹⁶Ngaira ka tangahigi na makuruha pinihi i haha ma ka arihahunira vato ngaia ma na me iana renigi na hê. Ngaira ka tapi metametarigi na gahuata ma ka kasigi hura na bêta tangara na enoni i metara.

¹⁷Ge hagarahasia God iaka, suria i hagaitangira na eragani nuni ngegana! Ge hagarahasia igê na ara ni marâ hato!

¹⁸Igê na tangahuruta gi rua matara gi rima na tangiana igê na hageha na Kisileve igami kami page hagarahasia na tangiana raha ni hagapunariana aporo na ruma ni rotu, tagenana ma manga mi hagarahasigi na tangiani raha ni rotu. Igami kami takusia, vi i tuguhigami vigami hagatakusigamu renia, hanana vi igamu nogami kamu hagarahasia na tangiana raha ngekana henia na tangiana raha na gi. Vikana igamu kamu page takusia aporo na tangiana i riki me igê na gi, matena o Nehemia i susu tanga God i murina i bani tagarahia aporo na ruma ni rotu henia na bea ni vogasiha.

¹⁹I na matena ga henahuraura igê na êvarika tanga i Pesia tani na mane ni hagarahenga, ga toto suria God, ngaira ka tora tani na gi tenia na bea ni vogasiha ma ka pinihigi i rarona na vekaru mamata igê na vaba. Ngaira ka pinihigi maninga ngavê, i asa ta na enoni vige tarahugi.

²⁰Na harisi rako i muri, igê na matena God i obania, na maneraha i Pesia ki hagatorangenia aporo o Nehemia tanga i Jerusaleme. O Nehemia ki vi tangara na raraha iata na mane ni hagarahenga ngegana, hanana viga garigi na gi. Ngaia ki hagarongogami, vi ngaira ka pe tarahugi rârâ na gi, nga noga ma na ve i sugusuguraga. O Nehemia ki vi tangara ka râ ka apegi me tani tanga.

²¹Matena na ario ma na ganiani ka nanê igê na bea ni vogasiha, o Nehemia ki vi tangara na mane ni hagarahenga, ka karangigi na ve sugusuguraga igê na ario ma na ganiani.

²²Ma ngaira ka kato vikana. Ki rârâ ma na arito ki marava me igê na vaha ma ka parama na ara ni marâ hato igê na bea ni vogasiha ma ka raboa renigi na gi. Na enoni hato ka konekone ngavê,

²³matena na gi ki ngêgi na ganiani. O Jonatane na mane ni vogasiha i teha ki bêngenira na enoni igê na hagarahenga. O Nehemia na mane ni hagarahenga ma na enoni hato ka aramia.

²⁴O Nehemia ki nunginungi vikê: “Araha God, igo ko hagavorara na ara ni marâ hato. Igo ko bâ hahanetaga ma ko raramohaga ngavê. I oto tare na parongamu ma ki raha i pasimu na takiha. Igo getego ma ko maneraha. Igo getego ma ko korokoro tangara na enoni.

²⁵Igo getego ma ko mahata ma ki oto tare na tauhamu. Igo ko raramohaga hunigo ma ko gâga tare ma tarema. Igo ko nanê tare hanana vi go hagatahia i Isiraele tenigi na bagabevoani. Igo ko bani atera na êvarimami, ka vora re na kariamu, go hagamatarotarora.

²⁶Gu aganaria na vogasiha ngekê mi tagarenia renira na Isiraelita hato. Gu anumasigami na kariamu go bani ategami ma ku hagamatarotarogami.

²⁷Gu hagahakura me na goamami ga oga totoko surigi na apanena iata na ai ni ahuroto, ga henahuraura tange. Gu takira na goamami, na ahuroto ga hagamamasiagara ma ka ruhira, hanana na ahuroto ka tahetara, vi igo ka na God iamami.

²⁸Gu hagaitangira na enoni ga hagamamasiagagami ma ka merongasigami, suria ga paroparo.

²⁹Gu hagaporosigami na kariamu kami oga aporo igê na apanena apuna iamu, manga i bani surua o Moise.”

³⁰Ma hemuri na mane ni hagarahenga ka kirigi na ki.

³¹Matena na gi ki ngêgi hato na ganiani, o Nehemia ki haribona ka karangigi na ve ga hita râ surigi na hê raha.

³²Na gi ki vavata ototo râ nga, ma na vavatana na gi igê na bea ni vogasiha ki hunia.

³³Na tarotarohana na tarana ngekana ki râhigi na ara ni agua. Na maneraha i Pesia ki rongo, vi na ve ngekana ka bani tarahua igê na agua na mane ni vogasiha ga pinihia igê na gi na bea ni vogasiha i nago tarana ga henahuraura vê. Ngaia ki rongo nikâ, vi o Nehemia ma na kariana ka hagapunarigi na ganiani igê na bea ni vogasiha renia na ve ngekana ma ka sungigi re.

³⁴Matena na maneraha ki garia na tarana ngekana, ngaia ki tarahua, vi i monari. Ngaia ki penarihia na agua ngekana, ki vora re na agua apuna.

³⁵Ngaia ki atera na mane i obanira, ka bâbâsuria ma ki meratongani na haga raha ga bêbanu me igê.

³⁶O Nehemia ma na kariana ka hêtana na ve ngekana vi Nepetare, i vivi Hagamatarotaroha, ma ka rako na enoni ga hêtana vi Napata.