Read Kahua 2 MAKABEO 10 Bible Online

2 MAKABEO 10 - Kahua bible

2 MAKABEO 10

¹O Juta Makabeo ma na me iana ka henahuraurerua na ruma ni rotu ma na hinua i Jerusaleme, suria na Araha ki tamanira.

²Ngaira ka hogegi na bea ni vogasiha ni ataro, na enoni ahuroto ga bani tagarahigi igê na agua ni hohoronga ma ka ruhuruhugi na ngêsu iata na ahuroto.

³Ngaira ka hagamatarotaroa na ruma ni rotu ma ka tagarahia na bea ni vogasiha haoru igê. Hemuri ngaira ka rikisia na gi haoru ma ka tanga na gi ni vogasiha renia. Ngaia ki na vogasiha hagenago i muriterua na harisi gi rua. Ngaira ka sungigi na marâ i sigini koro, ka tangagi na laiti ma ka nakagi na guani na bereti apuna igê na atohani.

⁴I hato vikana ma ngaira ka aba so hatara i ano ma ka nungia God, hanana siana ke nakagi na bagabevoani vigana ke tarahura nikâ, manga vi ngaira ma ka page tasitasi aporo nikâ. Ngaira ka nungia nga, hanana vi takira hete, matena i hagaitangira, ma siana ki tagarenira tangara na enoni ahuroto, ga pe nahuni takiha ma ka pe botage renia God.

⁵Ngaira ka hagapunaria aporo na ruma ni rotu igê na tangahuruta gi rua matare rima na tangiana igê na hageha Kisileve. Ngaia nga ka na tangiana ma na hageha na enoni ahuroto ga bani hagaerasia igê na ruma ni rotu.

⁶Ngaira ka vagevagesia na hagapunariana aporo ngekana surigi na tangiani gi varu mangagi na tangiani raha ni ruhu. Ngaira ka takusigi aporo igê na tangiani raha ni ruhu, ga kahu hagarahasigi râ me, matena ga gâga mêngara mangara na marâ vasiga igê na hungani ma igê na vaba.

⁷Tahema ngaira ka migirâ na apinige igê na mahe, na ahani na nini, ma na arani na apinige, ma ka kiki ka hagarahasia God i katoa ki tavoraha bâkoro na hagapunariana aporo na ruma ni rotu iana marena.

⁸Na ara ni enoni hato ka heaganari, vi na Siu hato ki tuguhira, viga hagarahasia na tangiana ni hagapunariana aporo na ruma ni rotu i na ara ni harisi.

⁹Nga hanana na tarani ga hagaratena ki me o Antioko Epipanesi kani ngegana.

¹⁰Hoita, i ngekê igami kami tamasigi na tarani ga akê me igê na matena iana o Antioko Upatore, o karena na eragani nuni o Antioko. Igami kami hagatarobêgi na mamasiaganiha, ga akê me surigi na hearihatani iana.

¹¹Matena ngaia ki vora re na maneraha urusia o vaemana, ngaia ki atea ta na mane, o Lisiasi na atana ki bâsuria na gavumane. O Lisiasi ki bâsuria i nago na apanena i Selesiria me Punisia, urusia o Potolemeo Makarone.

¹²O Potolemeo Makarone kani hagenago ki bâsuria na apanena ngekana. Ngaia ki katora bâkoro na Siu ma ki komanira, suria i uhungia vi marungira igê na otoha.

¹³Tahema tani na kariana na maneraha ka râ i pasina o Upatore ma ka hagagege renia o Makarone. Ngaira ka tuguria vi ngaia kani harikato renia na maneraha, suria i pania na marê i Saepero. O Pilometore na maneraha i Esipito ki bani naka na marê ngekana ki oga i ruguhana o Makarone, i aharo tanga o Antioko Epipanesi. I monari, na enoni hato ka visia vi o Makarone ki harikato renia na maneraha. Suria na enoni ki hato vige hagahigasia nikâ igê na tagaraha iana, tahema ngaia ki tono na marâ ni mera, ki me.

¹⁴Matena o Sosiasi ki bâsuria i Itumea, ngaia ki vatevatera na mane ni me mahuara ma ki taharira na Siu igê na ara ni mateni i takusigi viga koro tanga.

¹⁵Ma nikâ ngaira mareta na ai ni Itumea ka ogasigi na ruma na para nganganigaga ga hagagara koro ni hearihatana ma ka hagamamasiagara tare na Siu. Ngaira ka unira banu na ani ga gava tenia i Jerusaleme ma ka ama ni uhungia nga na hearihatana tatarê.

¹⁶Vikana o Juta Makabeo ma na me iana ka avarasia God ki tamanira. Ngaira ka râ ka taharigi na ruma na para nganganihaga iata na ai ni Itumea.

¹⁷Ngaira ka teharira na merongata ga meraheariha bême igê na para ma ka henahuraugi na ruma na para nganganihaga. Ngaira ka mutera ngaira hato ga tarahura igê. Ngaira ka na 20.000 na enoni.

¹⁸Henaka ma na 9000 na merongata ka girara viga gava ka rukuruku igê na ruma na para nganganihaga gi rua, garu bara ngavê vige henahuraurerua, ma i raroterua ka oga igê na ara ni marâ ga hagabungira re na merongata, ga ogarihira ka taharira, henaka vige arihu manga i he.

¹⁹O Juta ki tuguhia i arâ tangagi na agua, ga obania bâraha tangagi. Tahema ngaia ki panirerua so o Simone ma o Josepo henira o Sakeo ma na mane ni me iana. Na mane ni me ngegana ka uhu, hanana viga ama ni gâga rihirerua nga, ka taharirerua.

²⁰Ma tani na hitangita na mane ni me iana o Simone ka hagatage haga. Matena na merongata ka vatera re na 70 kilo na siliva, ngaira ka nakara tani na merongata ka gava tenirerua na ruma na para nganganihaga.

²¹Matena o Juta ki rongo vikana, ngaia ki hagahakura na mane ga bêngenira na mane ni me iana ma ki tugurira, ka hagavuringenira na goata, suria ga nakara na merongata ka hura ka râ ka meraheariha na goata nikâ.

²²Ngaia ki haribona, ka mutera na me ga kato vikana ma ki kahu henahuraurerua ototo râ nga na ruma na para nganganihaga gi rua ngegana.

²³O Juta ki tehateha tare igê na hearihatani. Ngaia ki henahuraurerua na ruma na para nganganihaga ma ki mutera na 20.000 ma ki asiba na mane ni me igê.

²⁴I nago na Siu ka bani teharia o Timoti igê na hearihatana, ma i ngekê ngaia ki bani hagahakura rako na mane ni me igê na hosi tenia i Asia henira na mane ni me mahuara gahu i vatevatera. Ngaia ki râ me ki taharia i Jutea, hanana vi henahuraua.

²⁵Matena ngaia ma na me iana ka arâ me mênga, o Juta ma na me iana ka avarasia God. Ngaira ka hagesuru kakaga, ka kuhuigi na bêta renigi na momo.

²⁶Ngaira ka tâ ka aba so i maana na bea ni vogasiha ma ka avarasia God, ki tamanira, ki meraheariha na merongata ma ki merongasira, manga i bani surua igê na buka ni ramata.

²⁷Matena ga avarasia hato God, ngaira ka tangaru, ka râ hagatê tenia i Jerusaleme ma ka tênga igê na bungiana igê na agua i pe hagatê tenira na merongata.

²⁸Matena i tangi me, ngaira ma na merongata ka haganega ka heariha. Hanana ga tehateha, na mane ni me na Siu ga hagêgurirerua na ramoha iata mareta ma na Araha igê na hearihatana, ga hagêguritogo renia. Ma na merongata ka hagêguria ma na ramoha iata mareta igê na hearihatana.

²⁹Matena na hearihatana ki akê me ramo ngavê, na merongata na Siu ka bâsira i vavearo na mane gi rima, ga tuguni bâkoro ma ka tagirira na hosi henigi na varo ni hagaotonga na golo. Ngaira ka bêngenira na mane ni me na Siu.

³⁰Na mane gi rima ngegana ka urarihia o Juta ma ka anumasia renigi na tangaruha iata mareta ma ka rangisira na merongata renigi na mage ma na marangeia. Vikana na merongata ki bara tangara vige bâbâ maninga. Ngaira ka tugupu ma ka haganega ka totoko. Na Siu ka mutera erasira ngavê.

³¹Ngaira ka nahuira ka me na 20.500 na mane ni me ga tavo uga ma na 600 na mane ni me igê na hosi.

³²Ngaia marena o Timoti ki gava ki ruku igê na ruma na para nganganihaga ngavê i Gesere. O Gereasi o vesina ki bêngenira na mane ni me igê.

³³O Juta ma na me iana ka agana ngavê ka ogarihia na ruma na para nganganihaga surigi na tangiani ge he.

³⁴Na merongata i rarona ka hagêguria na ruma na para nganganihaga ga oga igê. Ngaira ka ngirira vato na Siu, ka guha erasira ma ka tamasi erasia ngavê God.

³⁵Ki tangi me na rimata na tangiana, na tangahuru gi rua na mane ni me iana o Juta, ga mangariaga ngavê renigi na guhata ngegana, ngaira ka pe magu ma ka agari tagere igê na para ma ka atani nahu mavê, henaka vi o ti.

³⁶Ma tani nikâ ka agari tagere i ta apanena na para na ruma na para nganganihaga ma ka sungigi na bebetehe igê. Ngaira ka tangagi na page na ario ma ka sungira hemêri igê na enoni ga tamasi erasia God. Ma tani nikâ ka hogegi na maani para. Ngekana na mane ni me getera iana o Juta ka girara ga bêbanu ma ka henahuraua na hinua.

³⁷O Timoti ki ahi igê na vaba na vekaru ma ngaira ka nahuia ki me henirerua o Gereasi o vesina ma o Apolopanesi.

³⁸Matena i hato na hearihatana ngekana, na Siu ka vagevage. Ngaira ka ki ka hagarahasia na Araha ma ka ki ka visia koro, suria ngaia ki koro ngavê tangara ma ki katora ka teha.