Read Kahua 2 MAKABEO 11 Bible Online

2 MAKABEO 11 - Kahua bible

2 MAKABEO 11

¹I murina i me o Timoti, o Lisiasi, i marupea na maneraha, suria ka na goana ma ki teha igê na gavumane, ngaia ki mangariaga, matena i rongo vikana.

²Ngaia ki hagahakura na 80.000 na mane ni me ga tavo uga ma ngaira hato na mane ni me iana igê na hosi. Ngaia ki râ, hanana i meraheariha na Siu. Ngaia ki obania, vi horoa i Jerusaleme ki voravora re manga na hinua iata na ai ni Gris.

³Ngaia ki obania, vi naka na vuriha ni takesi pusia na ruma ni rotu mangagi na agua ni vogasiha ni ataro iata na enoni ahuroto. Ngaia ki obania nikâ, vi hagavuringenia i na ara ni harisi na tagaraha iana na mane ni vogasiha i teha tanga na mane i vuria raha teharira na ani getera.

⁴Ngaia ki pe takusia rârâ na raramohana God ma ki hagêgurira hete rako na rehagaro na mane ni me iana, na ani ga tavo uga ma na ani igê hosi, ma na 80 na elepante.

⁵Ngaia ki banu i Jutea ma ki taharia na ruma na para nganganihaga i Betesure, i hagatê na 30 kilomita tenia i Jerusaleme. Ngaia ki ogarihia.

⁶Matena o Juta ma na mane ni me iana ka rongo, vi o Lisiasi ki ogarihigi na ruma na para nganganihaga iata, ngaira ma na enoni hato ka gegege ma ka angiangi ka avarasia na Araha, hanana vige hagatorangenia me ta na angero koro iana, ke hagatahira.

⁷O Juta ki hagenago tatare ki tangaru ma ki hagaramonira na me iana, vi ga katokato vikana nogata, hanana ga henahu pusira na goata, henaka ga meme vari. Ngaira ka agana ngavê ma ka râhaku ka râ.

⁸Matena ga arege râ tenia i Jerusaleme, ngaira ka parama ma ka bâsia ta na mane igê na hosi. Ngaia ki tuguni siki ma ki tangaru renigi na tangaruha na golo. Ngaia ki bêngenira.

⁹Ngaira hato ka visia koro God ototo râ nga, suria i takira ma ki hagaramonira ngavê, hanana ga girara ga taharira mareha vi na mane ma, ma nikâ hete na marâ vasiga ga ramo ngavê ma ka hogegi na para na aiani.

¹⁰Ngaira ka tavo uga harahara, ma nikâ na ani, na Araha i hagatorangenia me ki râ henira, suria i takira, hanana i tamanira igê na hearihatana.

¹¹Ngaira ka taharira na merongata mangara na laione. Ngaira ka mutera na 11.000 na mane ni me ga tavo uga ma na 1600 na mane ni me igê na hosi ma ka hagavasira na ani ga hita râ ka tango tange na manavata.

¹²Rako na hitangita ga gava ka mamari ma ka kasigi na tangaruha iata. O Lisiasi ki gava nogana, suria i magu. Ngekana ngaia ki hagamakia so marena.

¹³O Lisiasi ki mareha vige pe takotako. Ngaia ki takotako, renia vi tanu hega kani pe teha, ma ki kahu tahetara, vi God raramohaga hunia kani tamanira na Siu igê na hearihatana. Tahema ngaira ka tehateha tare. Vikana ngaia ki hagatorangenia na mane tora tamasinga tangara na Siu.

¹⁴Ngaia ki uhungia vi hagaharora na Siu, hanana vi ga aganaria na suruheri ni marapeha. Ngaia ki suru tangara, vi katogi na ara ni tarani ga oto ma ki rêre murina na maneraha ki korokoro tangara na Siu.

¹⁵O Juta Makabeo ki aganarigi na tamasinga iana o Lisiasi, suria i takusigi viga koro tangara na enoni. Na maneraha ki aganarigi na ara ni takotakoha, o Juta i bani segegi so igê na leta tanga o Lisiasi.

¹⁶Na leta i segea o Lisiasi tangara na Siu ki manga ikê: “Inê o Lisiasi, kê hagamauru koro tangagamu na Siu.

¹⁷O Joane ma o Abasalome, na mane tora tamasinga iami, karu bani tagarenia tangê na leta, mu hagatorangenirerua karu torea me tangê. Ngairerua karu nungiê, hanana vigê aganarigi na takotakoha igê.

¹⁸Inê kê bani hagarongoa na maneraha renigi na tarani i tuguhia vige giraragi ma ngaia ki bani aganarigi na tarani i takusigi viga koro.

¹⁹Manga igamu ma kamu ama ni tototo suria nga na gavumane, inê nogaku kê page uhungia nga i hemuri kê hagakoroa na ogaha iami igê na ara ni tarani, ga mataku tangê.

²⁰Inê kê bani vi tangara na mane tora tamasinga iami ma na aniku, hanana viga hakuhaku henigamu, hanana ngaira megamu kamu hekarigi renigi na mani tarani igê.

²¹Mu mauru koro. Ikê ki na tangiana na tangahuruta gi rua matare he igê na hageha na Tiosikorintio igê na harisi 148.”

²²Na leta, na maneraha i segea tanga o Lisiasi ki manga ikê: “Inê na maneraha o Antioko kê hagamauru koro tangago o goaku o Lisiasi.

²³Hoi, o vaemaku ki bani torari ataro. I ngekê inê kê obanira na enoni gê marungira, hanana viga bâbâsurigi suri parongata mareta na ogaha iata. O vaemaku ki obanira na Siu viga arâ suria na ogaha iata na ai ni Gris.

²⁴Ma inê kê bani girara, vi na Siu ka usitenia, ma ka obania ma na ogaha iata mareta. Tahema ngaira ka bani nungia, vige hagamarumungenira ke oga surigi na tauha ma na ramata iata mareta.

²⁵Suria inê kê obanira vige oga purunguni mangara na enoni igê na agua getigi, gê marungigi, tahema inê kê haribona, vige vatera aporo na ruma ni rotu ma ke hagamarumungenira ke oga surigi na tauha iata na êvarita.

²⁶I koro, ko hagarongora nga renia na haribonaha ngekê ma renia na hetamaniha iaku tangara, hanana ngaira ka bâbâsurigi suri parongata mareta na ogaha iata ma ka gâga purupurunguniaga.”

²⁷Na leta na maneraha i segea tangara na Siu ki manga ikê: “Inê na maneraha o Antioko, kê hagamauru koro tangagamu na meraha iata na Siu ma tangagamu hato na Siu.

²⁸Na ara ni marâ hato ke tavoraha bâkoro tangagamu. Inê kê mêri koro ma.

²⁹O Menelao ki bani hagarongoê, vi igamu kamu obania, vigamu aporo i pasimi ma kamu bâbâsurigi na ogaha iami maremi.

³⁰Hoita, igamu na Siu, mu page aporo i pasimi i nago tarana na tangahuruta gi oru na tangiana igê na hageha na Santiko, siana kamu hinarua ta na marâ.

³¹I koro, kamu arâ surigi na tauha iami renigi na ngêra ma na ramata getigi iami, manga bani hanani, ma igami ki asa, vigami page hagaitangigamu renigi na tarani mu aharê purupuru igê.

³²Inê kê hagatorangenia o Menelao, hanana i haganaku parongami.

³³Mu mauru koro. Ikê ki na tangahuruta matare rima na tangiana igê na hageha na Santiko igê na harisi 148.”

³⁴Na ai ni Roma ka segea na leta tangara na Siu nogata, ka vi vikê: “Igamirua o Kuinto Memio ma o Tito Manio, muru mane tora tamasinga iata na ai ni Roma, igamirua kamuru hagamauru koro tangagamu na Siu.

³⁵Igamirua kamuru aganarigi ngavê na tarani hato o Lisiasi o goana na maneraha ki bani hagamarumungenigi tangagamu.

³⁶Igamirua kamuru râ noga tanga i Antioko. Hoi, mu haharirigi maninga na tarani o Lisiasi ki hagarongoa na maneraha renigi. Ma i murina ngekana mu hagarongogamirua ototo râ nga renigi na takoha iami, hanana igamirua kamuru girara, muru tamasi urusigamu tanga na maneraha renigi na obaniha iami. Mu aramigamirua me rêrê.

³⁷Siana kamu hagarihu, hanana igamirua kamuru giraragi na takotakoha iami.

³⁸Mu mauru koro. Ikê ki na tangahuruta na tangiana igê na hageha na Santiko igê na harisi 148.”