Read Kahua 2 MAKABEO 12 Bible Online

2 MAKABEO 12 - Kahua bible

2 MAKABEO 12

¹Matena na Siu ma na ai ni Siria ka bani aganaria na suruheri ni marapeha, o Lisiasi ki aporo i pasina na maneraha ma na Siu ka aporo tange na tagaraha iata i mu.

²Ma tani na mane ga bêngenira na mane ni me i ngekana ka ama ni merongasira nga na Siu. Ngaira ka no Timoti, mo Apolonio karena o Genaeo, ma o Hieronimo mo Temopone henia o Nikanore, i bêngenira na mane ni me ni Saipero, i vatevatera.

³I na matena ngekana nikâ na ai ni Jopa ka unisukera ngavê na Siu ga oga i berarogata i hinua iata. Ngaira ka hagaparu viga komanira na Siu. Ngaira ka unira ngaira ma na ahemata iata ka tage barebare henira igê na haka ga huna i ngekana.

⁴Suria na enoni hato i hinua ka bani harikato vikana, na Siu ka pe hinarua rârâ ta na marâ. Ngaira ka agana, suria ga obanira viga komanira. Ma na matena na haka ka ataha ngavê i asi, na ai ni Jopa ka korogi na haka ma ka tono ka me na 200 na Siu i raroni.

⁵Matena o Juta ki rongoa na unisukeana i erataga ngavê tangara na Siu na goana, ngaia ki hagarongora na me iana renia.

⁶Ngaira ka avarasia God, i surira tare na enoni igê na otoha, ma ka taharira na eragani nuni ga hagatunumira ka me na goata. Matena i bungi, ngaira ka sungia na maanitava, ka sungigi na haka hato ma ka mutera na enoni hato ga ahiahi i ngekana.

⁷Suria ga purupuru na maani para ni hinua, tahema o Juta ki aporo, ma ngaia ki togeaga vi page rugurugu me nikâ i ta na matena, hanana i mutera na enoni hato igê.

⁸O Juta ki rongo, vi na ai ni Jaminia ka harikato, viga mutera nogata na Siu ga oga i berarogata i hinua iata.

⁹Tahema igê na bungiana, ngaia ki taharia i Jaminia, ki sungia na maanitava ma ki sungigi na haka igê. Na ai ni Jerusaleme ka bâsia me na vavatana na gi, henaka i hagatê na 45 kilomita tenia.

¹⁰O Juta ma na me iana ka râ pania i Jaminia, hanana ga meheariha o Timoti. Matena ga tariha na ararina na 2 kilomita tenia i Jaminia, na 5000 ma ki asiba na mane ni me ni Arabia ga tavo uga henira na 500 na mane ni me igê na hosi ka taharira.

¹¹Ngaia ki na hearihatana i raramohaga teha ngavê. Ma suria God ki tamanira na Siu, tahema ngaira ka teharira na me ni hotonga ngegana. Hemuri ngaira ka kahu nungia o Juta, hanana vi ngaira ma na Siu ka hekomaniheri. Ngaira ka suru, viga vatera na Siu tani na togoha ma ka tamanira igê nikâ na tarani getigi.

¹²O Juta ki takusia, vi na hekomaniha iata ki girara i tamanira igê rako na tarani. Tahema ngaia ki aganaria na suruheri ni hekomaniha henira. Hemuri na ai ni Arabia ka aporo tange na ruma na gahu iata.

¹³Hemuri o Juta ki taharia i Kasipini na hinua na para nganganihaga ngavê. Na enoni i hinua ngekana ka oga hetorariga igê na ahuroto.

¹⁴Ngaira ka hagêgurigi na para nganganihaga iata ma na ngêra ga bani rurugi igê, i araria na matena na merongata ka ogarihia igê na hinua iata. Tahema ngaira ka rurusira ma ka guharira o Juta ma na me iana, ma ka tamasi erasia God.

¹⁵O Juta ma na me iana ka avarasia na Araha raramohaga hunia, i nahunigi na ara ni marâ hato ma ki bani hogegi vato na para ni hinua i Jeriko igê na matena iana o Josua, mareha vi renigi na marâ ni tahakuruha se vi renigi na marâ ni arihateniha ni hê. Hemuri ngaira ka kahu taharia ramo na para ni hinua.

¹⁶Ngaira ka henahuraua na hinua, suria God ki obania vikana. Na Siu ka mutera rako teha ngavê na enoni. I bâ manga na rano i 400 mita tenia na hinua, i vunu ahaharê renigi na gaputa na enoni ngegana.

¹⁷O Juta ma na me iana ka pania i Kasipini ma ka râ na ararina na 137 kilomita ka rârâ ma ka tariha i Garaka, ga oga igê na Siu tenia na hagosi ninuni iana o Tobiane.

¹⁸Ma ngaira ka pe tarahua o Timoti i ngekana, suria ngaia ki bani râ tenia na apanena ngekana. O Timoti ki asa vige katoa ta na marâ i ngekana, nga noga ma i pania so i hinua gi tage na haku na mane ni me ramo.

¹⁹O Tositeo ma o Sosipatere, na hitangita na mane ga bêngenira na mane ni me iana o Juta, karu taharia na haku na mane ni me ngekana ma karu mutera hato na 10.000 na mane ni me ga ogasia na hinua ngekana.

²⁰Hemuri o Juta ki voasira na mane ni me iana, ka vora na apaneni me gi rua. Ta apaneni me ki bêngenia ngaia marena, ma ta apaneni me karu bêngenia ngairerua o Tositeo ma o Sosipatere. Ngaira hato ka gaha suria o Timoti, i nahunira na 120.000 na mane ni me ga tavo uga ma na 2500 na mane ni me igê na hosi.

²¹Matena o Timoti ki rongo, vi o Juta ki râ me noga, hanana vi taharia, ngaia ki hagatorangenira na gete ma na kare, ka miginanago na toraha tanga na hinua i Karanaimi. Na hinua ngekana ki kere bara vige henahuraua se vige taua râ, suria ga rako na teha tagere tanga.

²²Matena na apaneni me hagenago iana o Juta ka ata râ igê, na merongata ka bubununuga ma ka tugupu, suria ngaira ka bâsia na girarana God, i bâsigi na ara ni marâ hato. Ngaira ka magu ngavê ma ka hegavagavasi ka hagamamarira so heri ma ka mutera so mareta heri.

²³Hoi, o Juta ma na me iana ka tarigenira ramo ngavê ma ka mutera na eragani nuni ngegana: na ararina na 30.000 na merongata.

²⁴Na mane ni me i ruguhaterua o Tositeo mo Sosipatere ka ranguia o Timoti. Ngaia ki na mane ni takoha ma ki hagabekasira, ki vi, vi ngaia ki têra rako na enata ma na goata i pasina ma ka page me, manga vi ngaira ma ka pe naka ke aporo purunguni i pasina.

²⁵Matena ga tamasi arihu rârâ ki hato, ma ngaia ki bani suru tangara, vi nakara vê na enata ma na goata ka aporo purunguni i pasita, ngaira ka naka vê ki aporo i pasina, suria ngaira ka obania viga hagatahira na enata ma na goata.

²⁶O Juta ki taharia na hinua i Karanaimi, i oga igê na ngêsu iana na ataro ka Ataragati. Ngaia ki mutera na 25.000 na mane.

²⁷Ngaia ki ruhuruhurerua ngavê na hinua ma na ngêsu. Hemuri ngaia ki taharia i Eperone, na hinua na para nganganihaga, ga oga igê o Lisiasi ma na enoni tenigi rako na agua getigi. Na mane ni me ramo na gapu haoru ka ura harahara i metara na para ni hinua ma ka ramo igê na hearihatana. I rarona na hinua ka bani pagegi igê na marâ ni hearihatana.

²⁸Na Siu ka avarasia na Araha, i menamenaria na raramohata na merongana. Vikana ngaira ka henahuraua na hinua ma ka mutera na ararina na 25.000 na enoni.

²⁹Tenia i ngekana ngaira ka gaha tanga na hinua i Betesure i 110 kilomita tenia i Jerusaleme.

³⁰Na Siu i ngekana ka hagarongoa o Juta, vi na enoni i hinua ngekana ka koro tangara ma ka tamanira bâkoro igê na bagabevoani.

³¹Tahema o Juta ma na me iana ka visira koro na enoni ngegana ma ka hagaramonira, hanana viga ama ni komanira nga na Siu i hemuri me. Hemuri ngaira ka aporo tanga i Jerusaleme, suria i hagarangi me na tangiani raha, ga visia koro God igê renigi na ngauha. Na tangiani raha ngegana ka hêtani nikâ vi Pentekosite.

³²I murina na Pentekosite o Juta ma na me iana ka gaha ka râ ka taharia o Sosiasi, i marungia i Itumea.

³³O Sosiasi ki merarâ me na 3000 na mane ni me ga tavo uga ma na 400 na mane ni me igê na hosi, hanana i meraheariha na Siu.

³⁴Ta kereani na Siu ka me igê na hearihatana.

³⁵O Tositeo ki na Siu tenia na hagosi ninuni iana o Tobiane ma ki na mane ni me ramo igê na hosi, ngaia ki ranguia na aruhana o Sosiasi. Ngaia ki okerataratagenia raha ngavê, suria i pe obania vige nahuia ke meme na eragani nuni ngekana. Ma ta na mane ni me igê na hosi ni Tarasia ki gaha râ tanga o Tositeo ma ki retea râ na rimana. Vikana o Sosiasi ki gava tanga na hinua i Marisa.

³⁶Na mane ni me na Siu i ruguhana o Esetiriasi ki me na apeta, suria ga ura arihu igê na hearihatana. Tahema o Juta ki avarasia na Araha, hanana i tamanira ma ki bêngenira igê na hearihatana.

³⁷Hemuri o Juta ki ngere ki hagaramo igê na tamasinga iana marena ma na Siu ka kahu hagakakangi ka taharira o Sosiasi ma na me iana ma ka hagavasira.

³⁸I murina na hearihatana o Juta ki merarâ na mane ni me iana tanga na hinua i Atulama. Ngaia ki na tangiana ni tatêha tanga na tangiana ni mamaroha. Ngaira ka hagamatarotarora mareta surigi na ramata igê na rotu iata na Siu ma ka kahu hagahigasia na tangiana ni mamaroha.

³⁹I murina na tangiana ni mamaroha, ngaira ka aruma ngavê ga ruguni haku na gahuata na mane ga me igê na hearihatana ma ka bagira surigi na matahuta na hagosi ninuni iata hegitigi.

⁴⁰Ma igê na gahuana na ara ni hitangita, i raroni na tuguni iana, ka tarahugi igê na nunuta na ataro, na ai ni Jaminia ga hagarapera. Na tarana ngekana ki apu ngavê tangara na Siu surigi na ramata iana o Moise. Vikana ki vaga me mave vi tanu hega kaniga me.

⁴¹Ngekana ngaira hato ka hagarahasia na Araha renigi na tauhana, i surira oto tare na enoni ma ki ranganigi mave na marâ ga pinihi.

⁴²Ngaira ka hagarahe ma ka nungia na Araha ki bonotenia ngavê hagetage na tasi ngekana iata na mane ni me ga me. O Juta na mane koro ma ramo ki hagaramonira na enoni, vi siana ka tasitasi, suria ga bâsia re maata na tarana i tarahura na ani ga tasi.

⁴³Nikâ ngaia ki tavo haga tenira na mane ni me iana ma ki tarahugi na 2 kilo na siliva, ma ki hagatorangenigi tanga i Jerusaleme, hanana i vuria re na vogasiha ni bonoteniha ni tasi. O Juta ki katoa na tarana koro ngekê, suria ngaia ki tongesuria, vi na enoni ga me ka page mauri aporo.

⁴⁴Manga vi ngaia ma ke pe tongesuria, vi na enoni ga me ka page mauri aporo, henaka vi ngaia ma ki nungia God tangara na ani ga me, na tarana vikana ke râ bekabekaga ma, ma ke bara vige tamanira na ani ga me.

⁴⁵Ma ngaia ki tongesuria gatagata, vi God ki page vurira bâkoro na kariana hato ga totosuria. Tahema o Juta ki vuria na vogasiha ni bonoteniha ni tasi tangara na ani ga me, hanana God ki bonotenigi na tasi iata.