Read Kahua 2 MAKABEO 13 Bible Online

2 MAKABEO 13 - Kahua bible

2 MAKABEO 13

¹Igê na harisi 149 o Juta Makabeo ma na me iana ka rongoa, vi o Antioko Upatore henira na mane ni me gahu ki râ me tanga i Jutea, hanana vi taharia.

²O Lisiasi, i marupea na maneraha haoru ma ki bâsuria na gavumane urusia, ngaia ki râ henia. Ngairerua karu nahunira na mane ni me ni Gris: ngaira ka na 110.000 na mane ni me ga tavo uga, na 5300 na mane ni me igê na hosi, na 22 elepante, ma na 300 na kati ni me henigi na naihi ga masi ga tâ igê na akereni na wili.

³O Menelao ki takusia, vi ngaia ki na matena koro tanga. Tahema ngaia ki pane henia o Antioko ma ki hagaramonia renia na katoha iana. Ngaia ki kato vikana, mareha vi suria i tako renia na ogaha i na agua, ma suria hete i obania, vi na maneraha ke atea nikâ ke mane ni vogasiha i teha.

⁴Ma God na Araha iata na maneraha ki katoa o Antioko ki mangariaga ngavê tanga o Menelao. O Lisiasi ki hagatanga monari tanga o Antioko, vi na eragani nuni ngekana ki na hunani na ara ni eraha hete. Vikana o Antioko ki haribona, ka torea râ i hinua i Berea ma ka nahuia ki me igê na tarana ni nahuta i ngekana.

⁵I ngekana ki oga igê na bebetehe i 50 mita i akê. Ngaia ki vunu renigi na rahu. I avorana ki oga igê na marâ manga na pi i vararaheri ma ki so ki tariha igê na rahu. Na maana bê tagere ki mave ma ki râ marere tanga so kerevato.

⁶Na enoni ga hanago tenia na ngêsu ni ataro se ga katogi na tarani ga erataga ngavê, ka meratagere ma ka kasira vato igê, ma ngaira ka meme.

⁷Nga hanana ga nahuia ki me o Menelao ngekana i bani kasia na rotu. Ngaira ka pe bagia.

⁸Nga na tarana i araria ngekana, suria i hagaerasigi hagarako na bea ni vogasiha, na gi igê ma na rahu igê ga apuna. Tahema ngaia ki me renigi na rahu.

⁹Na maneraha o Antioko ki ama ni me togeaga nga na katoha erataga iana. Ngaia ki banu i Juta, hanana i têtê erasira ngavê na Siu teharia o vaemana.

¹⁰Matena o Juta ki rongo vikana, ngaia ki bonasira na enoni, ka avarasia na Araha surigi na tangiani ma na bungiani, suria i era ma ka têtara renigi na ramata iana o Moise, na apanena iata ma na ruma ni rotu apuna iata. Tagenana manga i nago, i ngekê nikâ ngaira ka obania bâraha, vi God ke tamanira ma ke anumasira,

¹¹hanana siana na enoni ka votavota i rimata na ahuroto erataga, suria ga kahu manava tarata.

¹²Surigi na tangiani gi oru na ara ni enoni hato ka aba hatara i ano, ka harihari ka angiangi ma ka avarasia na Araha ni takiha. Hemuri o Juta ki kahu haganaku parongata ma ki hagaramonira, hanana viga nananêa na hearihatana.

¹³Hemuri o Juta ki merahekarigi na meraha iata na Siu ma ki naka vi arâ nga igê na raramohana God tanga i meheariha na maneraha o Antioko ma siana ki naasia na matena o Antioko ki bani banu i Jutea ma ki ogarihia i Jerusaleme.

¹⁴Hoita, o Juta ki naka na hearihatana i rimana God, i hagavora na maveta, ki hagaramonira na me iana ka ramoramo igê na hearihatana ma ka agana ka meme renigi na ramata iana o Moise, na ruma ni rotu apuna i Jerusaleme, renigi na apanena ma na tauha iata. Ngaira ka tênga hagarangia na hinua i Moteini.

¹⁵O Juta ki hagarongora na me iana, vi na harigoeha ni hearihatana ki manga ikê: ‘God ki teha’. Ngaia ki atera na mane ni me mêamêataga ni hearihatana ma igê na bungiana ngekana ngaia ki taharia na agua i oga igê na ruma na gahu iana na maneraha ma ki mutera na ararina na 2000 na mane ni me. Ngaira ka nahuia nikâ ki me na elepante, na ani i raha teha, henira na mane ni me i rarona na bebetehe igê.

¹⁶Na mane ni me hato igê na tênga iana na maneraha ka bubununuga ma ka tugupu.

¹⁷Igê na kahuagana na tangiana o Juta ma na me iana ka aporo. Ngaira ka teha, suria na Araha ki tamanira ma ki ngahisira.

¹⁸Hoi, na maneraha o Antioko ki hatamia vi na Siu ka raramohaga ngavê igê na hearihatana. Tahema ngaia ki uhungia, vi hagabekasira, hanana i raugi na hinua na para nganganihaga tenira.

¹⁹Ngaia ki râ ki taharia i Betesure na hinua na para nganganihaga iata na Siu. Na ara ni mateni i taharia, na Siu ka tahuru pusia bê aporo. Ki rârâ ma ngaia ki so renira.

²⁰O Juta ki hagatorangenigi na marâ, na me iana ga ura pusia na hinua ngekana, ka obanigi.

²¹Ma ta na mane ni me na Siu, o Rotoko na atana, ngaia ki hagarongora na merongata na Siu renia na tarana ngekana, i araria vi pinihi. Matena i hato vikana, na Siu ka tarahua, ka ranguia ma ka nahuia ki me.

²²Na ruata na matena na maneraha ki merahekarigi igê na ai ni Betesure renia na suruheri ni marapeha. Ngaira ka aganaria. Na maneraha ki merarâ vê na mane ni me iana ma ki taharia o Juta, ma o Juta ki teharia nikâ.

²³Na maneraha o Antioko ki bani pania so o Pilipo i Antioko, hanana i bâsuria na gavumane urusia. Ma i ngekê na maneraha ki rongoa, vi o Pilipo ki merongasia. Na maneraha ki gasuga ma ki konetenia na tarana vikana. Tahema ngaia ki aganaria na suruheri ni marapeha henira na Siu. Ngaia ki aganarigi na tamasinga iata na Siu, ma ki tohe vi arâ surigi. Hanana i hagagatagatania na suruheri ni marapeha, ngaia ki vuria na vogasiha tanga na Araha ma ki mahata tanga na ruma ni rotu, suria i hagahigasia.

²⁴Ngaia ki unia o Juta Makabeo ki râ me ki bâsia ma ki koro tanga. Hemuri na maneraha ki atea o Hegemonitesi, hanana i bâbâsuria urusia na apanena i haganega i Potolemaisi ki tariha i Gerara.

²⁵Ngaia marena ki arâ i Potolemaisi. Na enoni i ngekana ka mangaria renia na suruheri ni marapeha henira na Siu ma ka obania, viga hagamagahurua râ.

²⁶O Lisiasi ki tagere igê na bea ni tamasinga ma ki tamasi tangara na enoni ma ki uhungia nga vi bugurenia na suruheri ngekana. Ngaia ki tamasi tangara ka ape haritagi ma ka tahetara vi na suruheri henira na Siu ki koro. Hemuri ngaia ki aporo tanga i Antioko. Hoi, na tahariha iana na maneraha o Antioko ki vora re na sugaha bê aporo.