Read Kahua 2 MAKABEO 14 Bible Online

2 MAKABEO 14 - Kahua bible

2 MAKABEO 14

¹I murini na harisi gi oru tenia i ngekana, o Juta ma na me iana ka rongo, vi o Temeterio karena o Seluku ki bani toregi rako na haka henira na mane ni me gahu igê na manitava i Tiripoli,

²ki bani nahuirerua karu me na maneraha o Antioko ma o Lisiasi i marupea, ma ki bani têa na agua.

³Ta na mane o Alakimo na atana. Ngaia ki na mane ni vogasiha i teha i nago. Igê na matena na Siu ka meraheariha bê aporo na ahuroto, ga hagamamasiagara, ngaia ki aganaria na ogaha iata na ai ni Gris. Ngaia ki bani girara, vi ngaia ki bara, vige mane ni vogasiha nikâ i teha. Ngaia ki hinarura na Siu, ga usitenia ngavê.

⁴Tahema ngaia ki râ ki bâsia na maneraha o Temeterio igê na harisi 151. Ngaia ki vatea na maneraha renirerua na tarepuri na golo ma na ahana na nini henigi tani na arani na apinige na olive, manga bani hanana ga vatea na ruma ni rotu renigi. Ngaia ma vikana. Ngaia ki pe visia rârâ ta na marâ renigi na katoha iana.

⁵Henaka ma i hemuri ki râ me na matena koro tanga, hanana i meakê me igê na katoha bekabekaga iana, matena o Temeterio ki merahekarigi na mane ni hagaotonga iana ma ki unia ki râ tanga na hekarigiana. O Temeterio ki hagatea renigi na obaniha ma na takoha iata na Siu. O Alakimo ki arami ki vi:

⁶“O Juta Makabeo ma na kariana ka visira mareta viga hagahigasia na rotu ma ka barigia na apanena iata. Ma ngaira ka ageagesigi hete na hearihatani, ka katora tare na enoni ka merongasia na gavumane ma ka hagabarasira na enoni, hanana siana vi ka gâga igê na ramana.

⁷Suria kani ngaira, tahema inê kê hato tenia na tagaraha raha iaku gê mane ni vogasiha i teha, henaka ma ki oto tangê igê na apaparaha. Tahema inê kê râ me ikê,

⁸suria inê kê botage monari renigi na apaneni iamu, go maneraha, ma renia na ogaha koro iata na goaku na Siu nikâ, suria na katoha bekabekaga iata o Juta ma na kariana ka hagamamasiagara ngavê na enoni hato igê na agua.

⁹Maneraha, matena go bani haharirigi hato na tarani hato ngegana, inê kê nungigo, ku hagahatungia na hagamamasiaganiha i tarahura na enoni igê na agua. Gu hagabângenia na korohamu, manga bani hanamu.

¹⁰Matena i tahitahi mênga o Juta, na agua ki asa vige vagevagesia na marapeha.”

¹¹Matena i tamasi hato o Alakimo, ngaia ki na teha tangara na mane ni hagaotonga getera iana na maneraha, hanana viga katoa o Temeterio ki mangariaga tanga o Juta, suria ngaira nogata ka merongasia.

¹²Vikana na maneraha o Temeterio ki atea râ nga o Nikanore, i bêngenira na mane ni me iana igê na elepante, hanana i bâbâsuria i Jutea urusia. Ngaia ki hagatorangenia i Jutea.

¹³Ngaia ki bonasia, hanana i nahuia ki meme o Juta, ki sikirenira na kariana ma ki naka o Alakimo ki mane ni vogasiha i teha igê na ruma ni rotu, i rongo raha ngavê na atana i maveta hagenani.

¹⁴Na ahuroto hato i Jutea, ga bani gavatenia o Juta, ngaira ka hakunia o Nikanore, suria ngaira ka takusia, viga page akê me bâkoro, manga vi na Siu ma ka votavota se i tarahura na bagabevoani.

¹⁵Na Siu ka rongo, vi o Nikanore ki râ, hanana vi taharira ma na enoni ahuroto ka tamania. Tahema ngaira ka kuhuira mareta renigi na momo ma ka avarasia na Araha God iata, i bani atera na Siu ka na anina tare ki bê ki arâ ma ki tamanira me tare igê na mateni na bagabevoani.

¹⁶Hemuri o Juta, i bêngenira, ki bonasira na Siu, hanana ga arâ ototo râ nga ka meraheariha na merongata hagarangia na hinua i Atasa.

¹⁷O Simone o veogana o Juta ki meheariha o Nikanore, ki vota tatage, suria na merongata na Siu ka hagakakangi me.

¹⁸Henaka, ma o Nikanore ki pe obania, vi na hearihatana ma kani girara, suria i bani rongo, vi o Juta ma na me iana ka heariha ramo pusia na apanena iata ma ka pe magu rârâ.

¹⁹Ngaia ki hagatorangenira hete o Positonio, o Teototo ma o Matatia, hanana ga naka na suruheri henira na Siu.

²⁰I murina ga aganarigi haku na manitarani igê na suruheri, o Nikanore ki hagarangora na mane ni me iana renia. Ngaira hato ka aganaria tagenata na suruheri.

²¹Ngairerua o Nikanore ma o Juta karu naka na tangiana tanga garu hekarigi igê. Tenirerua na tênga iaterua hegitigi ka torererua hura me na âgâga gi rua tonganirerua.

²²O Juta ki hinarua o Nikanore. Tahema ngaia ki nakara na mane ni me iana henigi na tangaruha iata igê na agua ga hagagara koro ni hearihatana, suria i era ma o Nikanore ki hagabekasia. Ma na hekarigiana iaterua ki râ maninga ma.

²³I murina ngekana o Nikanore ki oga sisite i Jerusaleme. Ngaia ki pe katora bera rârâ na Siu, ma na enoni ahuroto, ga bani hakunia, ngaia ki kasira ka aporo i pasita.

²⁴O Nikanore ma o Juta karu hetarisurige, suria o Nikanore ki manatangenia o Juta.

²⁵O Nikanore ki vi tanga o Juta vi auragi ma ki panepane ruma. O Juta ki êragi, ki oga tonge ma ki vagevagesia na ogaha iana.

²⁶Matena o Alakimo ki girara, vi o Nikanore ma o Juta karu hekomani bâkoro, ngaia ki merâ tahana na pepa igê na suruheri tanga na maneraha o Temeterio. Ngaia ki hagarongoa na maneraha, vi o Nikanore ki harikato renia na gavumane, suria i atea o Juta na merongana na maneraha ki page urusia.

²⁷Na maneraha ki mangariaga ngavê, suria i tongesurigi na hagatorainga ngegana iana na eragani nuni ngekana. Igê na mangariaganiha iana ngaia ki sege tanga o Nikanore, ki vi, vi ngaia ki pe obania na suruheri ngekana ma ki bonasia, hanana vi rakua o Juta Makabeo ma ki hagatorangenia ototo râ nga i Antioko.

²⁸Matena na leta ki tarahua o Nikanore, ngaia ki hataera ngavê ma ki tugupu suria i pe obania vige aharêngia na suruheri henia o Juta, suria o Juta ki bani hagamonaria me tare na apanena iana na suruheri.

²⁹Henaka, i bara tanga vige usitenia na bonasiha iana na maneraha. Tahema ngaia ki naasia na matena koro tanga, vige hagabekasia o Juta.

³⁰Ma ngaia o Juta ki bâsia, vi na tauhana o Nikanore ka pe koro bê me tanga manga i nago, ma ki tamasi bârahaga tanga, matena garu hetarahu. O Juta ki bani girara vi na tarana i hagahinaru. Tahema ngaia ki hagahakura rako na me iana ka ngahisia ma ki gava ki ahi.

³¹Matena o Nikanore ki tahetara, vi o Juta ki katoa ki hagaroha era, ngaia ki râ i ruma ni rotu apuna ngavê igê na matena na mane ni vogasiha ka vogasia na Araha, ma ki bonasira, ka tagarenia me o Juta tanga.

³²Na mane ni vogasiha ka tohe, vi ngaira ka pe hagarea rârâ, vi i he ki ahi igê o Juta.

³³Vikana o Nikanore ki tagarenia akê na rimana na otona ma ki usia râ na ruma ni rotu ma ki tohe, ki vi: “Manga mu pe rakua o Juta ma kamu pe tagarenia tangê, inê kê page ruhuruhua na ruma ni rotu, inê kê page hogea na bea ni vogasiha ngekê, ma kê page tagarahia igê ne ngêsu bâkoro tanga o Tioniso na ataro.”

³⁴Hemuri ma ngaia ki râ. Na mane ni vogasiha ka tagarenigi akê na rimata ma ka avarasia God, i bani tamanigia me tare, igia na Siu.

³⁵Ngaira ka nunginungi, ka vi: “Araha, igo ko pe obania rârâ ta na marâ. Henaka, ma igo ko ageagesia, vi na ruma ni rotu ki gâga ikê, hanana go gâga i berarogamami.

³⁶Igo getego ma ko apuna ngavê. Hoi, gu anumasia tare na ruma ni rotu iamu, mi kahu hagamatarotaroa, i era ma ka hagaerasia aporo nikâ.”

³⁷Tani na enoni ka hagarongoa o Nikanore, vi ta na hitangita na meraha i Jerusaleme, o Rasisi na atana, ki pane henira na Siu. Ngaira ka vi, vi ngaia ki tamanira na Siu igê na manitarani, ma ngaira na Siu ka hagahigasia ngavê ma ka visia vi o vaemata na Siu.

³⁸I nago igê na matena na Siu ka haganega ka meraheariha na ahuroto, ngaia ki kasi manavana pusia na ogaha iata na Siu ma ki oga igê na tamasinga suria i totosuria.

³⁹O Nikanore ki obania vi hagabângenia mave, vi ngaia ki merongasira na Siu. Tahema ngaia ki hagatorangenira na 500 ma ki asiba na mane ni me, hanana ga rakua o Rasisi.

⁴⁰Ngaia ki takusia, vi manga i rakua o Rasisi, ngaia ki tahuru pirasira na Siu.

⁴¹Ngaia ki bonasira na mane ni me iana ka henahuraua na bebetehe na para nganganihaga i oga igê o Rasisi. Ngaira ka hogegi na purupuruni na maani para ma ka sungigi. Matena o Rasisi ki tahetara, vi i bara tanga vige gava, ngaia ki ahurangenia i matona marena na tatapa borahu iana.

⁴²Ngaia ki togeaga ki me vikana, suria i era ma na eragani nuni ngegana ka ranguia, ka hagatavatava igê na tarana i pe marisina ngaia na meraha.

⁴³Suria o Rasisi ki ahura susu, tahema na tatapa borahu ki atarahia na tavani mera ma ki pe me renia. Matena na mane ni me ka harihogo banu me, ngaia ki hatani tagere na para ma ki gatagata ki asireke vato hurira na enoni i ano.

⁴⁴Ma na enoni ka hatani sugare hegitigi, ma ngaia ki vota so ki hita i ano.

⁴⁵Ngaia ki tahitahi mênga. Ngaia ki mangariaga ngavê. Henaka na gapuna ka gogogo me igê na maara iana, ma ngaia ki aharaga, ki tango i guputa na enoni, ki tagere igê na bagaverake raha ma ki ura igê.

⁴⁶Na gapuna ki gogo hato tenia. Renirerua na rimana gi rua ngaia ki okegihura na angena ma ki kasigi vato hurira na enoni. Matena i kato vikana, ngaia ki nungia na Araha ni mêriha ma ni roga ni mêriha, hanana i haganahunia aporo renirerua. Nga hanana i me ngekana.