Read Kahua 2 MAKABEO 15 Bible Online

2 MAKABEO 15 - Kahua bible

2 MAKABEO 15

¹Matena o Nikanore ki rongo, vi o Juta ma na me iana ka oga i na apanena i Samaria, ngaia ki kato vi taharia igê na tangiana ni mamaroha, suria i apu tangara na Siu vige meheariha bê aporo.

²Na Siu, i tugurira ka hakunira na mane ni me iana, ka vi: “Siana ko mutera vikana. Siana ko nahunahu hagatavatavara. Na tarana ngekana ki pe ararira na enoni. Gu hagahigasia hete na tangiana, God, i bâsigi na ara ni marâ hato, i bani hagahigasia me ma ki bani hagapunaria ngavê.”

³Ma o Nikanore na eragani nuni ki hagatera, ki vi: “I hega, ta na araha raha i marungia na vavearo ki gâga ma ki bonasigamu, vigamu hagahigasia na tangiana ni mamaroha?”

⁴Na Siu ka arami, ka vi: “Mako! Na Araha ni mêriha, i marungia na vavearo, ngaia nga kani bonasigami, kami hagahigasia na tangiana ni mamaroha.”

⁵Ma o Nikanore ki arami, ki vi: “Inê nga kanigê marungia nga na maveta ma inê kê bonasigamu, hanana mu tangaru ma kamu arâ suria na bonasiha iana na maneraha.” Henaka, ma na katoha erataga iana ki pe akê me.

⁶Igê na paroparoha iana o Nikanore ngaia ki tamasi ageagea, vi pagegi na tangaruha iata o Juta ma na mane ni me iana, hanana ga takusia tare, vi ngaia ki teharira.

⁷Ma o Juta ki tako togo, vi na Araha ki tamania. Tahema ngaia ki hagaramonira na mane ni me iana, hanana vi siana ka magutenira na merongata.

⁸Ngaia ki kanukanura, hanana viga takusigi na ara ni mateni i nago God raramohaga hunia i bani tamanira me ma ka tongesuria gatagata nga, vi ngaia ki page katora ka tehateha nikâ i ngekê.

⁹Ngaia ki tomanigi tani na apaneni tenia na buka ni ramata ma tenigi na tamasinga iata na poropete. Vikana ngaia ki hagaramonira ma ki hagatakusira renigi na hearihatani, ga bani teharira igê na merongata.

¹⁰Ngaia ki vi tangara, viga hinarura na ahuroto ma ka pe tako togo renira, suria ngaira ka pe hagamonarigi rârâ na suruha iata. Vikana ngaia ki hagananêra na me iana tanga na hearihatana ma ki bonasira ka tangaru.

¹¹Ngaia ki hagatangarua na ara ni mane ni me iana, mareha vi renigi ma na tangaruha mangagi na bêata ma na ora ga hagêgurigi, ma renigi nikâ hete na tamasinga ni hagaramoniha. Ngaia ki hagagatagatanira nikâ, suria i hagarongora renia na maruteha iana i tonga na girarana.

¹²Na maruteha iana ki manga ikê. Igê na maruteha iana ngaia ki bâsia o Oniasi, i mane ni vogasiha i teha i nago. Ngaia ki na mane koro teha ngavê, i haritagi, ki hekomani ma ki girara i tamasi. Haganega tenia na matena i sisite ngaia ki hagesuringenia na ogaha i hagakoro obana God. Igê na maruteha o Juta ki bâsia, vi o Oniasi ki tagarenigi akê na rimana ma ki nungia God tangara na Siu hato.

¹³Hemuri o Juta ki bâsia nikâ ta na mane i ura manga o Oniasi ma ki nunginungi nogana. Ngaia ki merahaga ngavê, ki bâ hahaneaga, ki bâ hahanetaga ma ki bâ raramohaga.

¹⁴O Oniasi ki vi: “Na poropete iana God ngekana. Ngaia ka no Jeremia, i takuira na goana na Siu. Ngaia ki nungia hagarako God tangagia ma tanga i Jerusaleme na hinua apuna.”

¹⁵Hemuri o Jeremia ki tagarenia râ na rimana i otona ma ki vatea o Juta na tatapa borahu na golo ma ki vi:

¹⁶“Na tatapa borahu apuna ikê ki na mahatanga i râ me tenia God. Gu tavoa ma ko mutera na merongamu renia.”

¹⁷Na tamasinga ni hagaramoniha iana o Juta ki hitarira ngaira hato ma ki hagagatagatanira, vi siana ka magu, ma ki hagaramonira na mane haoru, hanana ga ramoramo igê na hearihatana mangara na mane mêamêataga. Suria o Juta ma na mane ni me iana ka pe obania, vi na merongata ke hagaerasigi na hinua, na rotu ma na ruma ni rotu iata, ngaira ka pe tênga. Ngaira ka pe hagarihu ma ka râ ototo râ nga hete ka taharira ramo na merongata, ma ka tarêhetanga na rimata na mane ma na mane, hanana vi page manga i he na berarogata.

¹⁸Ngaira ka tako bâraha renira na ahemata iata hegitigi ma na goata ma ka tako bâraha ngavê renia na ruma ni rotu apuna.

¹⁹Na enoni ga oga vê i Jerusaleme, ka anumanuma ma ka tako bâraha, vi manga i he kani page bâ na hearihatana igê na bena.

²⁰Na enoni hato ka tateaga, vi o ti kaniga page tehateha igê na hearihatana. Na merongata na Siu ka râ me harahara noga: na mane ni me ga tavo uga i gupu; na mane ni me igê na hosi igê na akeretaheri ma na elepante igê na agua ga hagagara koro tangara.

²¹Matena o Juta Makabeo ki bâsira râ na merongana gahu henigi na ani mavê na tangaruha hehegitigi ma henira na elepante ramo iata, ngaia ki avarasia God. Ngaia ki tagarenigi akê na rimana ma ki avarasia na Araha, i katogi na mena, suria i girara vi na Araha ki katora ka tehateha na ani i ararira viga tehateha, mareha vi na ani ga nahunira na mane ni me gahu.

²²O Juta ki avaravara, ki vi: “Araha, igê na matena o Hisikia ki maneraha o Juta, igo ko hagatorangenia me na angero iamu, ki mutera na 185.000 na mane ni me iana na maneraha o Saneheribi.

²³Hoi, Araha God, i ngekê nikâ gu hagatorangenia me na angero koro iamu ke hagakangira na merongamami ke bubununuga.

²⁴Gu mutera na enoni ngegana renia na raramohamu raha, suria ngaira ka tamasi erasigo ma ka râ me ka taharira na kariamu, go bani atera.” Nga na avarasiha iana o Juta ngekana.

²⁵O Nikanore ma na mane ni me iana ka râ me, matena ga akê me na ringeni na ahuri ma na ki ni hearihatana.

²⁶O Juta ma na mane ni me iana ka tango vurusira ka meraheariha, matena ga avarasia God.

²⁷Matena i tarêhetanga na rimata ma ka avarasia God igê na aitangihata, na Siu ka mutera na 35.000 ma ki asiba na merongata. Ngaira ka vagevagesia ngavê na hetamaniha iana God.

²⁸Matena i hato na hearihatana ma ka aporo ngaira ka ki gogogo, suria ga teha, ngaira ka tarahua o Nikanore i me ki tâtâ i ano henigi na tangaruha hato iana i apena.

²⁹Hoi ngaira ka ngere ka hagarahasia na Araha igê na tamasinga iata mareta.

³⁰O Juta Makabeo, i bani urapusira me na goana na Siu i mêrihana hagenani ma ki bani henahu pusia me na apanena iana haganega me tenia na matena i kere mane mênga, ngaia ki bonasira na me iana, ka retenguria na bêna ma ka rete mukuna na rimana na otona o Nikanore ma ka torererua tanga i Jerusaleme.

³¹Matena o Juta ki ata râ i Jerusaleme, ngaia ki unira haku me na enoni hato, ki nakara na mane ni vogasiha ka ura i maana na bea ni vogasiha, ma ki bonasira na mane ni me igê na ruma na para nganganihaga, ka râ me.

³²Ngaia ki hagabâsira renirerua na bêna na eragani nuni o Nikanore ma na rimana, i usia na eragani nuni ngekana igê na paroparoha iana renia na ruma ni rotu apuna iana God raramohaga hunia.

³³Hemuri ngaia ki akaroa hura na meana o Nikanore, i tamasi erasia tare God, ma ki haribona, viga hagangêra tatage na manu renia, ma ka kuharenia na rimana i na apanena râ na ruma ni rotu, na mena na bekabekaganiha iana.

³⁴Na enoni hato ka atakê ma ka visia raha na Araha raramohaga i tamanira, ka vi: “Ge hagarahasia na Araha, i hagatahia na ruma ni rotu tenia na hagaerasiana.

³⁵O Juta ki kuharenia na bêna o Nikanore igê na para na ruma na para nganganihaga, hanana vi na enoni hato ka girara maninga, vi God kani tamanira.

³⁶Na enoni hatohato ka heaganari, viga takusia tare na tangiana ngekana ma ka hagahigasia i na ara ni harisi igê na tangahuruta matare oru na tangiana igê na tangahuruta matarerua na hagaha, na Aramea ka visia vi na Atare. Ngaia ki na tangiana i nago tarana na tangiana raha iana o Moretekai.

³⁷Nga na tarani ga tarahua o Nikanore ngegana. Haganega me tenia na matena ngekana na Siu ka nahunia tare i Jerusaleme. Tahema inê kê hatungia so ikê na sihonga iaku.

³⁸Manga igamu ma kamu takusia vi na sihonga iaku ki koro ma kê topa surigi ki oto, inê kê vagevage renia. Ma ki manga i pe manga ngekana ma kamu pe magemagesia, ma na ta nikâ? Ma inê kê bani uhungia.

³⁹Igia ka bani girara, vi na vaini se na ve taranina ki tamania na apekoroha iaka, ma na vaini hetorariga renia na ve, ngaia ki tono koro ma ki katogia ka obakoro. I tagenana ma na sihonga koro, ga topetopea ki ototo, ngaia ki hagakoro obata na enoni ga tomania. Ngaia nga ngekê.