Read Kahua 2 MAKABEO 3 Bible Online

2 MAKABEO 3 - Kahua bible

2 MAKABEO 3

¹Matena o Oniasi ki mane ni vogasiha i teha, na hinua apuna i Jerusaleme ki oga igê na marapeha ma na ramana. Na enoni igê ka marupegi na ramata, suria o Oniasi ki totosuria God ma ki kitenia na eraha.

²Na maneraha i Siria me Esipito ka hagahigasia na ruma ni rotu ma ka mahata tanga na ruma ni rotu renigi na mahatanga ga raha na meni.

³O Seluku na maneraha i Asia ki vuripusigi na vogasiha i ruma ni rotu renigi na haga iana marena.

⁴Ma ki oga ta na mane tenia na hagosi ninuni iana o Biliga. Ngaia ki no Simone. Ngaia ki bâsuria na ruma ni rotu. Ngaia mo Oniasi ki tora hetatari na obaniha iaterua renigi na hohoronga i hinua.

⁵Suria i bara tanga o Simone vige okea me o Oniasi, tahema ngaia ki râ i pasina o Apolonio karena o Taraseo i bâsuria i Selesiria urusia na maneraha.

⁶O Simone ki hagarongoa, vi na kiboru ni ruruguha i ruma ni rotu ki vunu mamasuaga renigi na ruruguha, i bara vige tomanigi. Na haga igê ki raha teharia ngavê na haga, ga obanigi viga vurivuri pusigi re na vogasiha. Ngaia ki vi, vi na maneraha ki araria i taugi.

⁷O Apolonio ki râ ki bâsia na maneraha, hanana i hagarongoa renigi na haga ngegana. Na maneraha ki bonasia o Heliotoro, i bâsurigi na haga iana na maneraha, ki râ ki toregi me na haga ngegana tanga.

⁸O Heliotoro ki tavoraha ototo râ nga ma ki naka igê vi vatugigi na hinua i Selesiria ma i Punisia.

⁹Matena i bani ata râ i Jerusaleme ma na mane ni vogasiha i teha ma na ai ni hinua ka bani unia banu, ngaia ki tamasia mataha na tarana i râ me renia ma ki hagate renia na sihonga renigi na haga, manga vi i monari se i mareha.

¹⁰Na mane ni vogasiha i teha ki hagarongoa, vi na eragani nuni o Simone ki hagaparu. I monari tani na haga ki oga igê na kiboru ni ruruguha i ruma ni rotu, ma ngaira ka nakagi i ngekana tanga ma i gâga maninga igê. Ta apanena na haga ki oga tangara na gete na nâ ma na kare banogo, ma ta apanena ki na anina o Hirikano. Ngaia ki no karena o Tobia ma ki nahuni ramoha. Na mane ni vogasiha i teha, ki visia nikâ, vi na haga hato igê ki vora na 15.000 kilo na siliva ma na 7.500 kilo na golo.

¹²Ngaia ki vi nikâ vi i apu ngavê ta na enoni vige tavogi râ na haga tenira na enoni ga nakagi na haga iata igê, suria ga tako hagêguria na agua apuna ngekana, vi na haga ka oga maninga i ruma ni rotu, i rongo raha na atana i maveta hagenani.

¹³Ma o Heliotoro ki togeaga vi na haga ki arâ nga igê na kiboru ni haga iana na maneraha, manga i bani haribona.

¹⁴Ngaia ki naka na tangiana tanga i tavogi igê na haga. Igê na tangiana ngekana ngaia ki banu i ruma ni rotu, hanana i tomanigi na haga, vi gi hita kaniga oga i ngekana. Na tarana ngekana ki hagakangia na hinua hagenani.

¹⁵Na mane ni vogasiha, ga tuguni renigi na gahu ni hagarahenga, ka aihu ka abahigi na obata i maana na bea ni vogasiha ma ka nungia God, hanana vi hagatahigi na haga, suria ngaia nga kani nakagi na ramata renigi na haga, na enoni ka nakagi i ruma ni rotu, hanana i tâtâ bâkoro.

¹⁶Na enoni hato ga bâsia na mane ni vogasiha i teha, ngaira ka takia ngavê igê. Na maana ki siki, suria i nahuia na maguha.

¹⁷Na apena ki tatata, suria i bubununuga. Ngekana ki hagabângenia, vi ngaia ki mamasiaga ngavê igê na aitangihana.

¹⁸Na enoni ka tango hura tenigi na ruma iata tanga na ruma ni rotu, hanana vi ga avarasia igê God, hanana i hagabarasia o Heliotoro, vi siana ki hagaerasia na ruma ni rotu.

¹⁹Na gete, ga hogovoro kakaga ma, kaniga aharêsigi na tara. Na kere gete, ga oga kunikuni i ruma, suria na enata ka manimanira vige huhura, ngaira ka tango hura, tani tangagi na maani para, tani tangagi na para ni hinua, ma tani ka kikirihi hura igê na mabaha i ruma iata.

²⁰Ngaira hato ka tagarenigi akê na rimata tanga God ka nunginungi.

²¹Na mane ni vogasiha i teha ki oga igê na mamasiaganiha raha ma ki tugupu, ma na enoni hato i hinua ka anumanuma ngavê ma ka abahigi na maata. Na tarani ngegana ka bâ hetaki ngavê.

²²Matena ngaira hato ka avarasia nga na Araha raramohaga hunia, hanana vi hagatahigi na haga, ga nakagi i ruma ni rotu, suria ga hagêguritogo renia,

²³o Heliotoro ki tâ nga igê na katoha iana.

²⁴Igê nga na matena ngaia ma na me iana ka tariha râ igê na kiboru ni ruruguha, na Araha iata na angero ma na higona ki vora me i bâ hahanetaga ngavê tangara. O Heliotoro ma na me iana ga pe magu vige bêbanu i ruma ni rotu, ngaira ka kahu magu ngavê, ka bubununuga ma ka mameaga ngavê, matena ga bâsia na Araha raramohaga hunia.

²⁵Ngaira ka bâsia na hosi henia na mane igê. Na ara ni marâ i apena na hosi ka bâkoro ngavê. Na mane ni me igê ki bâ mamagutaga ma na ara ni marâ i apena ka na golo. Na hosi ki parama ma ki tango râ tanga o Heliotoro, ki ura hagaotoa ma ki tahurua renirerua na misini na rimana.

²⁶O Heliotoro ki bâsirerua nikâ na mane na gapu haoru, garu raramohaga ngavê ma ki bâkoro na apeterua, ma karu tuguni bâkoro ngavê. Ngairerua karu ura hetangenia ma karu ama ni ramusia nga.

²⁷O Heliotoro ki apuri ototo râ nga ma ki bagamame. Na me iana ka hagatâhia igê na bea

²⁸ma ka torea hura. Ki page arihu i nago tarana ma ngaia henira na me iana ma na mane ni me ga anumasia, ki banu igê na kiboru ni ruruguha, ma ngekana nga, ngaira ka tugia hura, i arutaveo ngavê na apena. Hoi, ngaira hato ka vi, vi God ki raramohaga hunia.

²⁹O Heliotoro ki tâ so ma. Ngaia ki bara vige tamasi ma ki pe tako ni tahinga, suria na raramohana God ki hagaitangia.

³⁰Na Siu ka hagarahasia God raramohaga hunia, suria i anumasia na ruma ni rotu renia na mena. Na enoni i ruma ni rotu, ka magu ma ka bubununuga ma i ngekê ka kahu vagevage ma ka ageage.

³¹Tani na kariana o Heliotoro ka hatani râ ka nungia o Oniasi, na mane ni vogasiha i teha, hanana vi nungia na Araha God ke hagatahia o Heliotoro, i sugi meme noga.

³²Ngekana na mane ni vogasiha i teha, ki vogasia God, hanana vige hagatahia o Heliotoro, i era ma na maneraha ki takusia ma, vi na Siu kaniga nahuia ki meme na mane tora tamasinga iana.

³³Matena o Oniasi ki vogasia God, na mane na gapu haoru gi rua ngegana, garu tuguni manga i nago, karu vora me nikâ tanga o Heliotoro, ma karu vi tanga, karu vi: “Gu visia koro na mane ni vogasiha i teha, suria na Araha ki hagatahigo suria ngaia.

³⁴Gu girara nga, vi na Araha God kani hagaitangigo. Hoi, gu râ ku tarohenia na raramohana raha God tangara na enoni hato.” Hato vikana, ma ngairerua karu magahuru râ.

³⁵Hoi, o Heliotoro ki vogasia na Araha ma ki surugi rako na marâ tanga God i bani hagatahia. Hemuri ngaia ki aria o Oniasi ma ki aporo henira na mane ni me iana i pasina na maneraha.

³⁶Ngaia ki tarohenigi na mena, na Araha God raha teha ngavê i katogi, ma ki bâsia re maana marena.

³⁷Matena na maneraha ki hagatea o Heliotoro, vi o ti kani araria ngavê, vige hagatorangenia ke râ i Jerusaleme ke katoa ta na tagaraha tanga, ma ngaia ki arami, ki vi:

³⁸“Manga i gâga ta na merongamu se ta na enoni i harikato renigo, hoi, ngaia nga. Ngaia ki page aporo me baro apaparoroga, manga i page aporo me, suria God raramohaga kani anumasia na hinua ngekana.

³⁹Na Araha God ki anumasia na ruma ni rotu. Ngaia ki page nahuia ki meme na anima na enoni i rapasia na ruma ni rotu.”

⁴⁰Nga na sihonga renia o Heliotoro ma ki manga i he God ki hagatahigi na ruruguha i ruma ni rotu ngekana.